চা খোম্মৈ, নোংমাইথেম কিরনকুমার অমসুং রাহুল হিদংদা মথংশিৎনা মণিপুর স্টেট এৱার্ড ফোর লিটরেরচর, ট্রান্সলেসন অমসুং মণিপুর স্টেট নহা খোরিরোলগী মনা ২০২৫ পীরগনি
ইম্ফাল, নভেম্বর ০৫ : মণিপুর লৈঙাক্না লিটরেরচর চাওখৎহন্নগীদমক হিরমসিদা থৌদাং লৌবশিংবু তোঙান-তোঙানবা কেতেগোরিশিংদা খংগৎলগা শেল য়াওনা মনা পীদুনা ইকায়খুম্নবা উৎলকপগী মখা তারকপদা ময়াম্না চা খোম্মৈ হায়রগা খঙনবা চান্দম খোম্মৈনা ইবা ‘শজিগী লৈবাক্তা’ হায়বা মণিপুরী নোভেলদা মণিপুর স্টেট এৱার্ড ফোর লিটরেরি, ২০২৫ পীরগনি হায়না লৈঙাক্কী ডিরেক্টোরেট ওফ লেঙ্গুয়েজ প্লানিং এন্ড ইমপ্লিমেন্টেসন, মণিপুরগী ডিরেক্টরগী চেরোল অমনা ফোঙদোরক্লি।
মনা অসিদা প্লাক অমা, সাইটেশন অমা, সাল অমদি শেল ওইনা লুপা লাখ ৩ য়াওরি। চা খোম্মৈনা লৈঙাক্না পীবা মনা অসি ফঙবা ১৮শুবা অইবা ওইরগনি।
মণিপুরী লোল অমদি খোরিরোল চাওখৎহন্নবা পান্দমদা লৌখৎলকপা খোংথাংশী শরুক অমা ওইনা লৈঙাক্না নহা ওইরিবা অইবশিংগী থোইদোক হেন্দোকপা থৌদাংবু শকখঙবিদুনা মনা অসি লান্থোকপনি। লৈঙাক্না শেম্বা মণিপুর স্টেট এৱার্ড ফোর লিটরেরচর ২০২৫গী জ্যুরি মেম্বরশিং অমদি এডভাইজরি বোর্ডনা মনা অসিগীদমক অইববু খংগৎপনি হায়রি।
অমরোমদা, নোঙমাইথেম কিরনকুমারগী ‘লৈশাবী মচা অমগী ডাইরি’ হায়না মিংথোন্বা ট্রান্সলেসন লাইরিক্তা মণিপুর স্টেট এৱার্ড ফোর লিটরেরচর (ট্রান্সলেসন ২০২৫) পীরগনি হায়রি। মনা অসিদা প্লাক অমা, সাইটেশন অমা, সাল অমদি শেল ওইনা লুপা লাখ ২ য়াওরি। লৈঙাক্না পীবা অহানবা ট্রান্সলেসন এৱার্ড ফঙবা মীশক নোঙমাইথেম কিরনকুমারনা ওইরগনি হায়রি।
লোয়ননা মণিপুর স্টেট নহা খোরিরোলগী মনা ২০২৫ (মণিপুর য়ঙ রাইটার্স এৱার্ড ২০২৫) না রাহুল হিদংনা ইবা ‘মহৌশাগী ইফুৎ’ হায়না মিংথোনবা মণিপুরী শৈরেং লাইরিক্তা পীরগনি। মনা অসিদা প্লাক অমা, সাইটেশন অমা, সাল অমদি শেল ওইনা লুপা লাখ ১ য়াওরি হায়রি।
সোর্স - হুইয়েন লানপাউ
0 কমেন্ট:
কমেন্ট তৌবিয়ু