ইম্ফাল, সেপ্টেম্বর ১0 : হুয়েল লাংলোন থা-তা এসোসিয়েসন মণিপুরনা শীন্দুনা ৬ শুবা নোর্থ ইস্ত থাঙ-তা ফেস্তিভেল ২০২৩ ঙসি নোংমাইজিং নুমিৎতা এসোসিয়েসন অসিগী য়ূম্নাম হুইদ্রোম ইম্ফাল ওয়েস্ততা লৈবা থাঙ-তা শঙলেন্দদা হৌদোকখ্রে।

মিনিস্ত্রি ওব কালচার গভর্নমেন্ত ওব ইন্দিয়াগী মতেঙগা লোয়ননা নুমিৎ ১০ চূপ্না চত্তগদা ফেস্তিভেল অদু হৌদোকপগী থৌরম ঙসি নুংথিল হুয়েল লাংলোন থাঙ-তা এসোসিয়েসন মণিপুরগী প্রেসিদেন্ত হুইদ্রোম প্রেমকুমার সিংহনা চীফ গেস্ত, থাঙ-তা ফেদরেসন ওব ইন্দিয়াগী হান্নগী সেক্রেটরি তিঐচ প্রিয়োকুমার সিংহনা থৌরমগী প্রেসিদেন্ত অমসুং লুৱাং থাঙ-তা একাদেমি খুরায় কোংপাল সাজোর লৈকায় ইম্ফাল ইস্তকী প্রেসিদেন্ত নোংথোম্বম নোরেন মৈতৈনা গেস্ত ওব ওনার ওইনা শরুক য়াদুনা পাঙথোকখি।

ফেস্তিভেল অদুদা থাঙ-তাগী লুপ ১৭ তগী থাঙ-তা শঅন্নরোয় অমসুং থাঙ-তাগী শিন্তাকপা য়াওনা পূন্না ১৫৪ না শরুক য়ারি। থৌরম অদুগী চীফ গেস্তকী ৱারোল পীরদুনা থাঙ-তাগী গ্রান্দমাস্তার প্রেমকুমারনা হায়খি, থাঙ-তা হায়বা আর্ত অসি লাইওইখ্রবা ইপা-ইপুশিংনা য়েক্নবদগী ঙাকথোক্নবা হোৎনবদা শীজিন্নবা অমসুং য়োকখৎপীরম্বা তাঙলবা শা-লানগী মহৈ অমনি। মহৈ অসি খুদক্কী ওইনা পকশেমদা শেমজিনবা মহৈ নত্তে।

মহৈ অসি মণিপুর খক্তদা য়োকখৎপা অমসুং চাওখৎহনবা য়াবা নত্তে। মসিনা মরম ওইদুনা হৌখিবা চহী ৪০।৫০ অসিদা ভারতকী তোঙান তোঙানবা স্তেত কয়াদা ত্রেনিং সেন্তারশিং শেমদুনা হাংদোক্লে। মসিগী মথক্তা নেসনেল অমসুং ৱার্ল্ড ফেদারেসন শেমদুনা মালেম লৈবাক কয়াদা শন্দোকখ্রবা মহৈ অমনি।

মহাক্না মখা তানা হায়খি, থাঙ-তা অসি কালচারেল খক্তনি হায়দুনা থাঙ হাইদুনা, থাঙলোন চৎপা খক্তা নত্তনা মালেমগী মফম কয়াদা শন্দোক্তুনা মারেমগী মীয়ামদা মসিবু খঙহন্দুনা হেন্না পাম্নবা হায়বা য়াম্নমক মরু ওইরক্লি। মসিগী ৱাখল্লোন্দা তপ্না তপ্না লৈবাক কয়াদা মহৈ অসি শন্দোকখিনবা হনবা লৈতনা থাঙ-তাগী নেসনেল অমসুং ইন্টারনেশনেল ফেদারেসন্না হনবা লৈতনা হোৎনরক্লি। মসিগী মহয়সু তপ্না তপ্না ফংবা হৌরক্লে।

মহৈ অস লমদম অসিগী মীপূম খুদীংমক্কী তাংলবা লননি হায়না লৌদুনা মশান্না অসিবু মালেমগী লৈবাক পূম্বদা শন্দোক্নবা হোৎনবদা লমদম অসিগী লৈঙাক্কী মরু ওইরবা থৌ পুরিবশিং অমসুং মীয়াম্না অঙম্বা মতেঙ পাংবীয়ু হায়না থৌরম অদুগী খুদোংচবা লৌরদুনা প্রেমকুমারনা আপিল তৌখি।