ইম্ফাল, সেপ্তেম্বর ১০ : চাইনাগী ঝেজিয়াং প্রোভিন্সকী হাংঝৌদা সেপ্তেম্বর ২৩ দগী মথং থা ওক্টোবর ৮ ফাওবা পাঙথোক্কদবা ১৯ শুবা এশিয়ান গেমসতা শরুক য়ারুগদবা ইন্দিয়াগী নুপা সেপাকতাক্রো তিম্বু লুচিংনবা খঙেম্বর নিকেন সিংহবু তিম কেপ্টেন ওইনা খল্লকপদা য়ুথ এমেচর ওয়েলফেয়ার এসোসিয়েসন (য়াৱা) শীংজমৈ লৈশাংথেম লৈকায় ইম্ফালনা নুংঙাইবা ফোঙদোকরক্লি।

য়াৱাগী প্রেসিদেন্ত এল মোবিনা মহাক্কী থাগৎ ৱারোল অমদা হায়, হাংঝৌগী এসিয়ান গেমস অদুদা ইন্দিয়াগী রিপ্রেজেন্ত তৌদুনা তোঙান তোঙানবা মশান্নশিং দা মণিপুরগী শান্নরোয় কয়ানা কম্পিত তৌরুগনি। অদুবু হেন্না নুংঙাইরিবদি মহাক্কী এসোসিয়েসনগী হৌরকখিবা অমসুং হৌজিক হৌজিক য়াৱাগী শান্নরোয় অমা ওইরিবা নিকেনবু ইন্দিয়াগী সেপাকতাক্রো তিম্বু লুচিংনবা কেপ্টেন ওইনা খল্লকপা অসিনি।

নিকেনবু তিম কেপ্টেন ওইনা খল্লকপদা য়াৱাগী মায়কৈদগী নুংঙাইবা অমসুং থাগৎপা ফোঙদোক্লি। কম্পিটিসন অদুদা মহাক্না অমসুং ইন্দিয়ানা মায় পাকপা ওইরসনু হায়না ঈশ্বরদা থৌনিজরি হায়না মোম্বীনা মখা তানা ফোঙদোরক্লি। ইং ২০১৮ জাকার্তা এসিয়ান গেমস ইন্দোনেসিয়াদা ইন্দিয়ানা সেপাকতাক্রো মশান্নদা ব্রোঞ্জ লৌরকখি। গেমস অদুদা ইন্দিয়াগী তিম অদুনা মেদল লৌনবা হোৎনবদা নিকেন্না তিমগীদমক অচৌবা থৌদাং লৌখিবনি।

হাংঝৌ এসিয়াদতা শরুক য়াগদবা ইন্দিয়াগী নুপা সেপাকতাত্রো তিমদা নিকেন্দো নত্তনা মণিপুরগী ই অরুন, লাইশ্রম জোন মৈতৈ, ৱাহেংবম হেনরি সিংহ, আকাশ য়ুম্নাম, সোরোখাইবম মালেমঙানবা সিংহসু য়াওরি, অদুগা নুপী তিমদনা মণিপুরগী অয়েকপম মাইপাক দেবী, এলাংবম লৈরেন্তোম্বী, এলাংবম প্রিয়া দেবী, ওইনাম চাওবা দেবী অমসুং অয়েকপম প্রিয়া দেবী য়াওরী।

সোর্স: পোক্নফম