ইম্ফাল, সেপ্টেম্বর ০৭ : পেট্রিওটিক রাইটার্স ফোরাম (পি এ দব্লিউ এফ) মণিপুরগী চহী ৩গী থৌ পুগদবা থৌবুরোইশিং খনবগী মীফম অমা ঙসি নুংথিল পুং ১ তবা মতমদা ফোরামগী ময়াই শঙলেন, কৈশামথোং হোদাম লৈরক্তা পাঙথোকখিবগা লোয়ননা খল্লবা থৌবুরোইশিং ৱাশক লৌখ্রে হায়না পেট্রিওটিক রাইটার্স ফোরাম মণিপুরগী সেক্রেটারী রাকেস নাউরেমনা থাদোরকপা চেরোল অমনা ফোঙদোরক্লি।

পি এ দব্লিউ এফ মণিপুরগী নৌনা থৌ পুগদবা থৌবুরোইশিং অদুদি প্রেসিদেন্ট ওইনা নাউরোইবম খম্বা লুৱাং, ভাই প্রেসিদেন্ট ওইনা পি বিপরাচন্দ্র, সেক্রেটারি ওইনা রাকেশ নাউরেম, ট্রেজারার ওইনা য়ূম্নাম দেভরাজ, এসিষ্টেন্ট সেক্রেটারি ওইনা লাইমুজম প্রতাপ সিংহ, এগজিক্যুটিভ মেম্বার ওইনা ওইনাম মৈরা, এ কে জ্ঞানেশ্বরি, য়াইস্কুল খ্বাইরাকপম, নবকুমার ওইনাম, চুংখাম রনবির অমদি সোবিতা মোংজমনি।

চেরোল অসিনা মখা তারদুনা হায়, ঙসি খনখ্রবা ফোরামগী থৌবুরোইশিংনা মণিপুরী লোল, লিটরেচর অমদি কালচার চাওখৎনবা অমত্তা ওইনা থৌদাং য়ামিন্নবা, লাক্লিবা সেপ্টেম্বর ২৬ তা লময়ানবা হিজম ইরাবত লৈখিদবগী নীংশিং থৌরম পাঙথোকপা য়াওনা তোঙান-তোঙানবা ৱারেপ কয়াসু লৌখি হায়রি।

পনবা য়াবদি, পেট্রিওটিক রাইটার্স ফোরাম মণিপুরনা হেক শাফোঙ-লকপদগী তোঙান তোঙানবা থবক থৌরমশিং পাঙথোক্তুনা মণিপুরদা অমদি মপান্দা লৈবা মণিপুরগী অইবা-অইবীশিংবু য়োকখৎনবা হোৎনবগা লোয়ননা মণিপুরী খোরিরোলবু হেন্না অৱাংবা থাক্তা পুখৎনবা হোৎনদুনা লাকখিবনি।

সোর্স: হুইয়েন লানপাউ