হাউসনা সনামহি লাইনিংগী ৱারেপ চেৎশিনখ্রে
ইম্ফাল, আগস্ট ৫: সনামহি লাইনিংবু সেন্সস রিপোর্টতা মনুং চলহনবগা লোয়ননা সেন্সস ওপরেসনদা লাইনিং অসিগী তোঙানবা কোদ অমা পীবিয়ু হায়না ইন্দিয়া গবর্ণমেন্টতা তকশিনবগী মতাংদা হাউসনা মমাংদা লৌখিবা ৱারেপ অমা ঙসি রিফোর্ম তৌখ্রে। ১২ শুবা মণিপুর লেজিসলেটিব এসেমব্লীগী অনীশুবা মীফমগী ঙসি অরোইবা নুমীৎকী অরোইবা এজেন্দা ওইনা এমএলএ খোংবানতাবম ইবোমচানা হান্নগী ৱারেপ রিফোর্ম তৌনবগী ৱাফম প্রাইবেট মেম্বার রিজোলুসনা ওইনা পুখৎলকপনি।
প্রাইবেট মেম্বার রিজোলুসন অদু পুথোক্নদুনা বিজেপিগী এমএলএ কেঐচ ইবোমচানা হায়, ২০০২ গী জুলাই ৩১ দা মতম অদুগী এমএলএ ওক্রম জয়না প্রাইবেট মেম্বার রিজোলুসন অমা সনামহি লাইনিংগী মতাংদা হাউসতা পুখৎখি। নুমীৎ অদুদা হাউস কম্মিটি অমা শেমখি, অমদি ২০০৩ গী আগস্ট ১ দা সনামহি লাইনিং সেন্সস রিপোর্টতা মনুং চলহনবগা লোয়ননা সেন্সস ওপরেসনদা তোঙানবা কোড অমা লাইনিং অসিগী পীবিয়ু হায়না ইন্দিয়া গবর্ণমেন্টতা তকশিনবা হায়না হাউসনা ৱারেপ লৌখি হায়না মহাক্না মখা তাখি।
কেঐচ ইবোমচানা হায়, মণিপুর মর্জর এগ্রিমেন্ট ১৯৪৯ গী মমাংদা মণিপুর অসি কৈদৌনুংদা ইন্দিয়াগী শরুক অমা ওইরমদে, মনিংতম্বা নিংথৌ পানবা লৈবাক ওইরম্মী। মণিপুর মর্জর এগ্রিমেন্টতা য়াওরিবা ৱাফমশিংগী মনুংদা ইন্দিয়ানা মণিপুরগী সোসিও-ইকোনোমি, লাইনিং, নাৎ অমদি চৎনবি ঙাক শেনগনি অমদি ফ্রিদম পীগনি হায়বতা নত্তনা মসিগী মথক্তা লৈবাক অসিগী কন্সটিট্যুসন্না মীপুম খুদিংমক্তা অপাম্বা লাইনিং চৎপগী অয়াবা পীরি অমদি মীশিং য়ামজদবা ফুরুপশিং ঙাক শেনবগী ৱাফমসু পল্লি হায়না ফোঙদোকখি।
মরম অসিনা ২০০৩ গী এজেন্দা অমদা লৌখিবা ৱারেপ অসি রিফোর্ম তৌসি হায়না মহাক্না হাউসতা হৌদোকখি। এমএলএ কে মেঘচন্দ্রনা প্রাইভেট মেম্বার রিজোলুসন অদু শৌগৎপগা লোয়ননা হেীজিক্কী মতমদা তঙাইফদনা তৌদবা য়াদবা অমনি হায়বা ৱাফম ফোঙদোকখি। হাউসকী লুচিংবা ওইরিবা সিএম এন বিরেননসু ৱারেপ অসি লৌবদা করিসু কায়দে হায়না ফোঙদোকখি অমদি তুংদা হাউসনা হান্নগী ৱারেপ অদু রিফোর্ম তৌখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু