শক্নাইরবা লৈখিদ্রবা নবচন্দ্রগী বার্থ এনিভার্সরিগা মরী লৈননা ‘তুম তুম খোংলি উথুমনা’ মিংথোনবা মিউজিকেল ইভিনিং জেন এন ডান্স একাদেমিদা পাঙথোকখ্রে
ইম্ফাল, নভেম্বর ২৯ : নিংথৌজম নবচন্দ্র সিংহ ফাউন্দেসন অমদি ওল মণিপুর মতম ঈশৈ কাঙলুপ (অম্মিক) কা পুন্না খুৎশম্নদুনা শক্নাইরবা লৈখিদ্রবা নিংথৌজম নবচন্দ্র (নব ভোল্যুম) গী বার্থ এনিভার্সরি থৌরমগা মরী লৈননা ‘তুম তুম খোংলি উথুমনা’ মিংথোনবা মিউজিকেল ইভিনিংগী থৌরম অমা ঙসি জৱাহরলাল নেহেরু মণিপুর ডান্স একাদেমীগী ওদিটোরিয়ামদা পাঙথোকখ্রে।
ঙসিগী থৌরম অদুদা ইমিনেন্ট থিয়েটার পার্সোনেলিটি হৈস্নাম সাবিত্রিনা চীফ গেস্ত, সেন্ট্রেল ব্যুরো ওফ কম্ম্যুনিকেসন রিজনেল ওফিস ইম্ফালগী ডা. ইবোমচা শর্ম্মা অরিবম অমদি অম্মিককী প্রেসিদেন্ট খাইদেম থোইবনা গেষ্ট ওফ ওনার অমসুং নিংথৌজম নবচন্দ্র সিংহ ফাউন্ডেসনগী চেয়ারম্যান মুনিশ নিংথৌজমনা প্রেসিদেন্ট ওইনা শরুক য়াখি।
লৈখিদ্রবা শক্নাইরবা শৈশকপা নিঙথৌজম নবচন্দ্রদা কত্থোকপা অমদি ঈকায়খুম্নবা উৎপগী থৌরম অদুগী ওয়েলকাম স্পিচনা নিংথৌজম নবচন্দ্র সিংহ ফাউন্দেসনগী জেনারেল সেক্রেটারি বিমোলচন্দ্র লাইরেঞ্জমনা পীখি। থৌরম অদুগী মখা তারকপা ওইনা অম্মিককী প্রেসিদেন্ট খাইদেম থোইবনা ফোঙদোকখিবদা, লৈখিদ্রবা শক্নাইরবা শৈশকপা অমদি আর্টকী লমদা থোইদোক হেন্দোক্না শীংথানিংঙাই ওইবা থবক থৌরম পাঙথোকপীরম্বা নবচন্দ্রবু নীংশিংবগী থৌরম অমা পাঙথোরকপা মতমদা অম্মিকপু নীংশিংবীরক্তুনা করিগুম্বা খরা পাঙথোকপা ঙম্নবগী তাঞ্জা পীবীরকপা অসিগীদমক নিংথৌজম নবচন্দ্র সিংহ ফাউন্দেসনগী মীওইশিংবু থাগৎপা ফোঙদোকচরি।
মতম অমদা অম্মিকপু লিংখৎপীরম্বা মীওইশিং অসি অয়াম্বনা শক্নাইরবা মীওই ঙাক্তনি। ঙসি ঐহাক্না অম্মিককী প্রেসিদেন্ট অমা ওইনা থৌ পুজরিবা অসিসু মখোয়না তাকপী তম্বীরম্বা লিক্লমশিং অদুগী মতুংইন্না পাঙথোকপনি। অম্মিক লিংখৎপীরম্বা ওজাশিং অদুনা ঈশৈগী লমদা চোইনা তাদুনা লৈরিবা শৈশকপশিংবু অমত্তা ওইনা পুনশিন্দুনা মপাঙ্গল কনবা আর্ট অমা ওইবা ঙম্নবা হোৎনবীরমখিবনি। মদুগী মহয় ওইনা ঙসিদি ঈশৈগী লমদা লৈরিবা পুম্নমক পুনশিন্দুনা অমত্তা ওইনা থবক তৌবা ঙম্লে হায়নসু ফোঙদোকখি।
ঙসিগী থৌরম অদুগী মনুং চন্না সেন্ট্রেল ব্যুরো ওব কম্ম্যুনিকেসন রিজনেল ওফিস ইম্ফালগী ডা. ইবোমচা শর্ম্মা অরিবম, ইমিনেন্ট থিয়েটার পার্সোনেলিটি হৈস্নাম সাবিত্রি অমদি নিঙথৌজম নবচন্দ্র সিংহ ফাউন্দেসনগী চেয়ারমেন মুনিশ নিঙথৌজমনা লৈখিদ্রবা শক্নাইরবা নিঙথৌজম নবচন্দ্রগী মরমদা ৱাফম কয়া ফোঙদোক্তুনা মহাকপু ঈকায়খুম্নবা উৎখি। ঙসিগী থৌরম অদুগী শরুক অমা ওইনা মায় ফাদার এ পার্ফোর্মার হায়বা মিউজিকেল ইনসেম্বল অমসু লোঞ্চ তৌখি। থৌরমগী মখা চত্থরকপা ওইনা লৈখিদ্রবা নিঙথৌজম নবচন্দ্রবু ঈকায়খুম্নবা ওইনা লাকখো হল্লকখো হায়বা ঈশৈ অমা আর্টিষ্টশিংনা শকখি।
লোয়ননা থৌরম অদুগী মনুং চন্না অখন্নবা লৈখিদ্রবা নিংথৌজম নবচন্দ্রগী ঈশৈশিং তোঙান তোঙানবা শৈশকপশিংনা শকখিবগা লোয়ননা শক্নাইরবী শৈশকপী লাইশ্রম মেম্মানা ঐগী শুরদা; শক্নাইরবা শৈশকপা শামুরাইলাৎপম নব শর্ম্মা (নবভোলকানো) না লায়রবা; শক্নাইরবী শৈশকপী এল প্রেমাবতিনা লাও মরূপ ইনাক্তা লাও; শক্নাইরবা শৈশকপা এল সোলেন্দ্রনা নঙতা লৈবীয়ু; শক্নাইরবা শৈশকপী বিদ্যামনিনা নুংশিবী কৈশুমশঙদা; শক্নাইরবা শৈশকপা হুইদ্রোম নাওবোইনা পোইনু লৌবুক্তা অমদি নহা ওইরিবী শক্নাইরবী শৈশকপী জেনা খুমন্থেমনা তুম তুম খোংলি উথুমনা হায়বা ঈশৈশিং অসি শকখি।
থৌরম লোইশিল্লকপা ওইনা লমদম অসিগী শক্নাইরবা শৈশকপা/শৈশকপীশিংগী অপূনবা শুরদা তুম তুম খোংলি উথুমনা হায়রিবা ঈশৈ অসি শক্তুনা ঙসিগী লৈখিদ্রবা শক্নাইরবা শৈশকপা নিংথৌজম নবচন্দ্রনা কত্থোকপা থৌরম অদু লোইশিনখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু