image

মীতৈ অমসুং য়েলহৌ ফুরুপশিংদা মীতোপ্না শাগৈ ওনশিল্লকপা য়াহল্লগুমসি: নন্দো লুৱাং

ইম্ফাল, ওক্টোবর ২৪: হৌজিক ঐখোয়না চেকশিনগদৌরিবসি মীতৈ অমসুং মণিপুরগী য়েলহৌ ফুরুপশিংদা মীতোপ মীয়ানচাশিংনা শাগৈ ওনশিল্লকপদা য়াহন্দবগী থবক অসিনি হায়রদুনা করিগুম্বা শাগৈ ওনশিল্লক্লবদি ঈ তিন্নদবা ওইরক্কদবনা মখোয়না মণিপুর কন্নবগীদমক্তা লেপ্লক্লোই অমসুং মণিপুর কল্লোই হায়না অমুকোগী প্রেসিদেন্ট ফৈরোইজম নন্দো লুৱাংনা ফোঙদোকখ্রে।

ৱাফম অসি ঙসি কোনুং লম্পাক্তা লৈবা চন্দ্রকৃতি ওদিটোরিয়ামদা পাঙথোকখিবা ওল মণিপুর ৱীমেন্স ভোলন্টরি এসোসিয়েসন (অমোভা) শাফোঙলকখিবগী ৩৩রক শুরকপা মপোক কুমওন থৌরমদা শরুক য়ারদুনা ফোঙদোকখিবনি। থৌরমগী মনুঙ চন্না তোঙান তোঙানবা লূপশিংগী থৌমীশিং অমদি মীদিয়াগী মীওইশিংদসু অচম্বা খুদোলশিং তমখি। থৌরমগী লোইশিল্লকপদা ঈশৈ নোংমাইগী থৌরম ‘লিক্লাং পরেং’ পাঙথোকখি।

অমুকোগী প্রেসিদেন্টনা মখা তানা হায়, মীতোপ মীয়ানচা অমনা শাগৈ ওল্লকপা মতমদা শাগৈ অদুগী অহল অদুনসু অয়াবা পীরমগনি। অদুগা সনা কোনুংদগীসু অয়াবা লৌরম্বা য়াই। অদুবু হায়রিবা অয়াবশিং অসি মতৌ করম্না পীখিবনো হায়বদুসু মীয়াম্না খন্নবীয়ু। মীতোপ মীয়ামচানা শাগৈ ওনশিল্লকপা মতমদা ওনশিল্লক্লিবা শাগৈ অদুগী মায়কৈদগী ইকায়বা করিমত্তা ফাওদ্রবরা হায়বসিসু হংনীংই হায়খি।

খরা অমনা লৈরক খুল্লক্তা মীতোপ চঙশিল্লকপা য়েংগনি অদুগা অতোপ্পা খরা অমনা অশানবা কাদা চবু চবু কৌশিন্দুনা থমগনি হায়রদুনা মীতোপ্না নারোন্দা শাগৈ ওনশিল্লক্কনি। মসিদা য়েলহৌমী হায়বসি কনাবু কৌগদৌরিবনো। ইশাগী শাগৈদা ওনশিল্লক্লবদি ঐ ইশাগা চপ মান্নগদৌরিবনি হায়খি। লোয়ননা মখোয়গা ঐখোয়গা ঈ তিন্নবসু নত্তে হায়রদুনা শক-চুদা মান্নগদ্রা নৎত্রগা ইপা ইপুগী ৱারীদা মান্নগদ্রা অমসুং ৱাখল মান্নগদ্রা হংখি। পূম্নমকসিগী মথক্তা লমদম অসিগী পূক্নিংগী ঈহুলদসু মান্নগদ্রা হংখি।

শাগৈ ওনশিল্লকপগী থৌদোকশিং মতাং মতম চানা থিদোক্কদবনি। মসিদা সী এস ওশিংসু থিদোকমিন্নবা চঙই। মণিপুরদা চঙলক্লগা শাগৈ ওনশিল্লক্লবা ফাওবদা য়েংদুনা লৈগদবা মতম নৎত্রে। ফুরুপ অমা, লৈবাক অমা য়োৎশিন্নবগী লাল্লোং অসি ঐখোয়না য়েংগদবনি। হৌজিক্কী অনৌবা চৎনরকপদা মোবাইলদা মচি অমদা লেপ্লগা মখোয়গী পোত্থোক ফিজেৎ চাকচাদা চঙশিনহন্দুনা হোংহন্নবা হোৎনরক্লি। তোঙান তোঙানবা বেঙ্ক কয়া লিংখৎলগা শেল পুদুনা চৎখ্রবা মতুং ঐখোয় মছেল ফূনহৌবা য়াওরে হায়খি। লোয়ননা ঐখোয়গী নিংঙোল কয়া লৌরম্লে অদুগা নিংঙোলশিং অদুগী মরক্তগীনা মপি তাদুনা লৈহৌবদা মখোয়দা ওনশিন্দুনা কল্লক পেল্লি হায়দুনা চৈবগী মতম নত্তে। মাঙজরিবদি য়েলহৌ ফুরুপ ওইবা ঐখোয়দনি হায়খি।

মরম অসিনা ইনাৎ মশক খঙবা, পুৱারী খঙজবা ঙম্লবা মতমদা থৌনা লৈরক্কনি। ঐখোয়গী চীং, পাৎ অমদি তুরেলনচিংবা মপান্দগী লাকপশিংনা য়োমশিল্লকপদগী মাঙশিল্লক্লিবনি। মণিপুরদা ফংলিবা ঈশিংগী মনুংদা চাদা ৯৮ গী চাংদি থকপদা শীজিন্নবা য়াবা ঈশিংনি। মালেমগী ওইনা য়েংলবসু অসিগুম্বা ফীভম অসি লৈতবা মরম্না ঐখোয়গী লৈজরম্বশিং মাঙহন্নবা হোৎনরকপশিং য়েংহৌগদবনি। য়েলহৌমী ওইরিবা ঐখোয় পংথবগী মতম নৎত্রে, পূনশিল্লসি। শাগৈ ওনবদা য়ারিবা শাগৈদু মখোয়গী মপা মপুদা লংজবা অমসুং খুন্নাইদা লংজবনি হায়খি।

ঙসিগী থৌরমদা অথোইবা মীথুং ওইখিবা প্রোফেসর তোইজম তম্ফানা ফোঙদোকখিবদা ইচল-ইচে হায়বদগী ইমা হায়বগী মীঙ্গৌ লাক্লবা মতমদদি ইমাগা মায়োক্নবদা খোঙফম খরা হেন্দাকপা ঙাক্তনি। মরম অদুনা ইমাগী মীংথোল লাকপা হায়বসি ইচে ইচলশিংদগীনি। নুপীশিংনা ইমুংগী থবক ইনখাং লোইরগা থোরকপা মরম্না খুরৌ থাংবা ওইহল্লিবসি নুপাশিংনসু খঙবীগদবনি হায়খি।

থৌরম অসিদা সোসল সাইন্টিষ্ট ডা. ধনবির লাইশ্রম অমুসং এম য়ুগী এসোসিয়েট প্রোফেসর ডা. চীংলেন মৈস্নাম্নচিংবা শক্নাইরবা মীওই কয়ানসু অখন্নবা ৱাঙাঙলোই ওইখিবগা লোয়ননা চিতুৱাগী প্রেসিদেন্ট এম পুর্ণিমাসি লৈমা অমসুং কংলামৈগী প্রেসিদেন্ট ৱাই লৈরিকলৈমসু ৱাঙাঙলোইশিং ওইদুনা শরুক য়াখি।

সোর্স: হুইয়েন লানপাউ.

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু