গুৱাহাটিদগী থৌনাওজম শ্যামনা ইবা নোভেল ‘ইচে থবাতোন’ ---কোরৌবী
ইচে থবাতোন হায়রিবা ৱারী লিশাং অসিবু ইবা থৌনাওজম শ্যাম সিংহ কাছার দিষ্ট্রিক্ট, আসামগী চান্দম লৈকাইদা পোকই। হৌজিক মহাক গুৱাহাটিগী বেলতলাদা লৈরে। মহাক সাইন্সকী ওজা ওইান থবক তৌরি। পেত্রিওটিক রাইটার্স ফোরাম, গুৱাহাটি ব্রাঞ্চকী ফাওন্ডার প্রেসিদেন্টনি। শৈরেং, ৱারীমচা অমসুং ৱারী লিশাংদা খূৎ থাই। হান্না শৈরেংগী লাইরিক অহুম অদুগা ৱারীমচাগী লাইরিক অমা ফোঙখ্রে। খোরিরোলগী মনাশিং-১) ডাক্তর সরোজ নলিনী লিটরেরি এৱার্দ-২০১৬, ২) ডা: অম্বেদকর নেসনেল ফেলোসিপ এৱার্দ-২০১৬ অমসুং ৩) অসম ভাষা গৌরব অচনি’ স্কিমগী মখাদা আসাম সরকার-২০২১ না পীবা শেলগী মনা ফংখ্রে।
ইচে থবাতোন হায়রিবা লাইরিক অসি মণিপুরি সাহিত্য পরিষদ, আসামগীদমক বিনামনি সিংহনা ইং ২০২২ দা ফোঙবনি। লমা ১০৮ পাল্লি, মমল লুপা ২২০ পী। মখুমগী লাই অহৈবম পদ্মা সিংহনা য়েকপনি। থবাতোন কৌবা নুপী অমনা লাইরিক অসিগী মপূং ওইবা কেরেক্টরনি। অতৈ মরুওইবা করেক্টরশিংদি থবাতোনগী মৌপ্বা লনচেনবা, লনচেনবগী মরুপ বিজেন্দ্র, বিজেন্দ্রগী নুপী রমনি। থবাতোনগী লমচৎ ফিদম্নীংঙাই ওই। ৱাহৈ-ৱাতা চম্মী, ইরিবা ৱারীগী খূৎইদা অনৌবা টেক্নিক্কী মশক উবা ফংদে।
অদুম ওইনমক লাইরিক অসি পাবদা নুংঙাইবা অমদি পোকই, পারুরবদি লেপ্নীংদবা ওই। য়াম্না ৱানা পু-পাং শুদ্রবা থবাতোন অমসুং মৌপ্বানা লেল্লকপা পুন্সি অসিনা মোইরাং কংলৈরোলগী খম্বা অমসুং খম্নুনা লেল্লকপা পুন্সি অদুবু নীংশিংহল্লি। নুংশিবগী অরেপ্পা ফিরেপ অমসু উৎননবা অইবা শ্যামনা য়াম্না কন্না হোৎনবগী মওং অমা উবা ফংই।
ৱারী ঃ
ৱারী লিশাং অসিগী অহানবা চেপ্টরদা অঙাং ওইরিবা থবাতোন অমসুং মাগী মৌপ্বা লনচেনবগী অৱাবা পুন্সি অসুম্না তাক্নদুনা ইরি, “থবাতোন নৌনা মমা মপানা হুন্দোক্লম্বগী মরাইবক থীরবী নিঙোলনি। পুন্সিগী শৈহৌমক্তদা পলেম পন্থৌনা থবা মমৈ ৱাইখিবদগী অৱা মৈশানা লাইরিক মপূং ফানা তমথবা ঙমহৌদে। অদুনা মৌপ্বা লনচেনববুদি লাইরিক নীংথিনা তমহনগে খল্লি। মসি মহাক্কী থম্মোয়নুংগী অচেৎপা ৱাখলনি। অদুবু মখুরা মনিতোননা মাগী নুপীগী থৌইনশিন্দগী লৌ, ইঙ্খোল পুম্নমক খোপচিনকিবদগী থবাতোন মচিন মৌপ্বাগী ফীভম অসি য়ৌনা শোকচিনখিবনি।”
মতমগী মতুংইন্না থবাতোন অমসুং লনচেনবা পাখং লৈশাবী ফারকখি। লনচেন্বা সিলচরগী কলেজ অমদা মিং চন্দুনা লাইরিক তম্লকই। লনচেনবগা উধারবন্দগী বিজেন্দ্র কৌবা বিএসসি অরোইবা চহী থাগদবা মহৈরোই অমগা লৈমিন্নখি। মখোয় অনীগী লৈফম অদুদা থবাতোননা হেক হেক লাক্তুনা চাক থোংবিরম্মী। অসুম্না নকশিন্নবদগী থবাতোন্না বিজেন্দ্রবু নুংশিখি, অদুবু ফোঙদোকপদি ঙমখিদে। বিজেন্দ্র বিএসসি পাস তৌদুনা ইম্ফালদা লাইরিক তম্বা চৎখি। মনিপুর য়ুনিভার্সিটিদা এমএসসি তম্লিঙৈদা রমা কৌবী মহৈরোই অমগা শক খঙনদুনা নুংশিনরকখি। কোন্নথংদা লাইরিক তম্বা লোইদুনা থবক ইনখাং তৌনরবা মতমদা বিজেন্দ্রনা রমাগা লুহোংখি অদুগা লনচেনবনা বিজেন্দ্রগী মচননুপী বেমবেমগা লুহোংখি।
লনচেনবা লৈঙাক্কী লাম্মী অমা ওইদুনা অরাপ্পা লমদা পোষ্টিং তাদুনা চৎখ্রিঙৈ তাঞ্জাদা ময়ুমদা নুপী ঙাক্তা লৈহৌবদু খুদোংচাররোই খন্দুনা মচে থবাতোন অমসুং মাগী নুপী বেমবেমবু মবাই বিজেন্দ্রগী য়ূমদা থম্লম্মী। অসুম্না থবাতোন অমসুং বিজেন্দ্র নকশিন্নরকপগী তাঞ্জা অমা লাকখি। থবাতোন অমসুং বিজেন্দ্রগী মীৎয়েং নায়েংদগী রমানা মখোয় অনীসি নুংশিনরে হায়না চিংনরকখি। থবাতোনদি তশেংনা বিজেন্দ্রবু নুংশিরুবগী মপুন্সিদা য়ুম পাল্লরোই খনখি। মদুনা অফবা ফিরেপ ওইরোই খল্লকপদগী কায়নথংদা থবাতোনদু মাবু লোন্না নুংশিজরম্বা বিরেন্দ্র কৌবা দাক্তর অমদা লুহোংখি। অসুম্না ৱারী লিশাং অসি অৱাবনা হৌরগা নুংঙাইবনা লোইশিনবা হায়বুদ ওইহল্লি।
লোন্দা পুদাঃ
মণিপুরদা লৈবা মৈতেগা মনিপুরগী মপান্দা লৈব মৈতৈগা লোল-লি খরা অসুম্মক খেন্নবা তাবনি। হৌনশানি। নুপা অমা মখোঙনা ‘য়াম্না থুনা চৎলি’ হায়বসি মণিপুর মপানগী মৈতৈশিংনদি ‘য়াংনা চৎলি’ হায়নৈ। শ্বায়গী লাইরিক অসিদসু ‘থুনা’ হায়বগী মহুৎ য়াংনা হায়বসি শীজিন্নৈ। লাইরিক অসিগী অহানবা লমায়দা সিমিলি শীজিন্নদুনা ইরি, “খুল অসিগী অৱাং থংবদা ফিরাংজি ফিদাগুম পাক্না শন্দোকখ্রিবা শংবান্নরবা ষঞ্জেনবুংদা খুঞ্জাশিংগী ষণবী-ষন্নাও পাং কয়াগা লোয়ননা...।” ৱাহৈ পরেং অসিদা য়াওরিবা ‘ষঞ্জেনবুং’ হায়বসি মণিপুরগী মৈতৈশিংনা ‘ষঞ্জাবুং’ হায়নৈ।
অনিশুবা লমায়দা য়াওরিবা ৱাহৈশিং-‘খুলদুগী অৱাং মায়কৈদা লৈবা ষঞ্জেনবুংদা ষণ ফালা শেল্লি’। মসিদা য়াওরিবা ‘ষণ ফালা’ হায়বসি মণিপুরগী মৈতৈশিংনা শীঞ্জিন্নদে, খঙসু খঙনদে। মথংগী ৱাহৈ পরেং অমগা ‘লাপতক্না মচেনা পোত্থাপোৎ ময়োম পুদুনা লাকপা উবদা কয়াদা হরাওজরি।’ মসিদা য়াওরিবা ‘পোত্থাপোৎ’ হায়বসি মণিপুরদা শীজিন্নদে, ‘হৈত্থা পোত্থা’ হায়না শীজিন্নৈ। ষণ শেনবা নৎত্রগা লৌরাং শুবা মীনা চাননবা পোৎ থিনবা অদুবু হৈথা পোত্থা কোই। মচেনা মৌপ্বাগী ফি ইষ্ট্রি তকথোকপীবদু শ্যামনা মহাক্কী লাইরিক অসিদা ‘ইষ্ট্রি চাথোকপী’ হায়দুনা ইরি (লামায় ৫)।
বিজেন্দ্রনা ইম্ফালদা লাইরিক তম্বা চৎনবগীদমক থোরকপদা লনচেনবনা এয়ারপোর্ট ফাওবা থিন্দোকপগী মতাং অমা য়াওরি। থিন্দোকপা হায়বা ৱাহৈসি লৈতদুনা (শীজিন্নদবনা) তৌরিবরা ইংলিসকী ৱাহৈ ‘সি ওফ’ হায়না ইরি (লমায় ১৫)। বিজেন্দ্র অমসুং লনচেনবা অনি উনবদু ‘ফংনরে’ হায়বা ৱাহৈ শীজিন্নৈ। মণিপুর য়ুনিভার্সিটিদা মিং চনববু ‘এদমিসন লৌরে’ হায়না ইরি (লমায় ১৭)। এদমিসন হায়বা ইংলিসকী ৱাহৈ শীজিন্নবা তারবদি ‘এদমিসন তৌরে’ হায়গদবনি। লমায় ৩৫ দা য়াওরিবা ‘কৈদৌরবগে রাম? নঙবু লাইনকা ফংনরবা য়াৎল হায়মী? অঙাউবীদৌনা তৌরিসিবু?’ মণিপুরদদি মী অমা ইখং খঙহৌদনা ঙাওনা ফৈনা নারকপদা লাই ওক্নরমাল্লে হায়নৈ, লাইনা ফংনবা শুকহায় হায়নদে। ফংনরক্তবজাৎলা হায়গদবসিসু ফংনরবয়াৎলা হায়না ইরি।
শ্যামনা মাগী ৱারী লিশাং অসিদা ফজরবা ইমেজরি কয়া শীজিন্নবা থেংনৈ। খূদম ওেইনা লামায় ৩৮ দা য়েংসি-‘‘মণিবাবুগী অসিগুম্বা ৱাহংদুদা থবাতোন মশাদু শ্বাই লাউখি। মবুক্নীংদা চিংনবা হৌরকখি। খল্লি, থীনা চৈরসিদা হায়দুনা। অদুবু করিসু হায়দনা তুমীন্না অশাউবদু ফাথদুনা ফিরৈদা য়েপ্তুনা থমখি।” অসিনি শৈরেংগী মওং মানবা খুৎফোঙদোক। শক্তম শাগৎনবগী মশক অসি লামায় ৪৪দসু য়াওবা থেংনৈ-‘‘নিপান্নি পানবা থাজসু উচেক মতু মাল্লবা শাজৎনা লৈচিলগী দোলাই তোংদুনা কোইপাই পাইদুনা শান্নরি। অতিয়া খেৎনা শন্দোকখ্রিবা শজিক থাবা, চুংশেন নুপীনচিংবা থৱানমিচাক কোটি কোটিনা ঙসি হায়বা নুমিৎসিদগী পাখং কোটি কোটিনা ঙসি হায়বা নুমিৎসিদগী পাখং লৈশাবী মিংথোল হোংদুনা মৌগীশিংদা চনখিগদৌরবা নুরা পাখঙ অনীবু মমিৎ কুপ্তবমখৈ য়েংথরক্লি।”
য়ূম্বান মরীবু মেটাফর ওইনা পুথোক্তুনা ইরি (লামায় ৪৭তা)-“নৌনা য়ূম্বানবগী মরীগী থুম্লবা খোইহীবু কুইনা চুপমিন্নবা ফংদমখৈ।” (লনচেনবনা লুহোংবতা ঙাইরিবা বেমবেমবু থাদোক্তুনা মাগী থবক মফমদা চৎখিবগী মতাংনি।) অসিগুম্বা ফজরবা ৱাহৈ ৱাতা কয়ানা শ্যামগী ৱারী লিশাং অসিগী লৈতেং ওইরি।
নুংশিবাঃ
নুংশিবগী থিমদা শাগৎতুনা ইবা শ্যামগী ৱারী লিশাং অসিদা খ্বাইদগী মরু ওইরিবা কেরেক্টর থবাতোনগী তমজনীংঙাই ওইবা অরেপ্পা পুকচেলগা লোয়নবা নুংশিববু উৎননবা হোৎনরি। থবাতোন পুকচেল হোংদবী নুপীনি। নুপী ওইবীগী লৈতেং ওইরিবা ইকাইথীবগী মতৌনা থম্মোয়গী অনীংবা ৱাফম ফোঙদোকচবা ঙমখিদে। লোইশিল্লকপদা ফজরিবদি অৱা পেলোই ওইগদবা ৱারী অসি শ্যামগী হৈ-শিংলবা খূৎশেম্না নুংঙাইবগী পোলোইদা পুশিল্লকপা অসিনি।
কর্টেসি: সঙাই এক্সপ্রেস
0 কমেন্ট:
কমেন্ট তৌবিয়ু