মণিপুরী লোনবু ওফিসিয়েল লেংগ্বেজ ওইনা শকখঙখিববু তৌবিমল খঙবা ঊৎলি
ইম্ফাল, মার্চ ১ : আসাম গবর্নমেন্তনা হন্দক আসামগী দিস্ত্রিক ৪ দা ‘মণিপুরী লোন’ বু এসোসিয়েত ওফিসিয়েল লেংগ্বেজ ওইনা শকখঙখিবা অদুবু ফোক্স (ফেদারেসন ওব সিবিল সোসাইতি ওর্গানাইজেসন), মণিপুরগী মায়কৈদগী তৌবিমল খঙবা ঊৎচরি হায়না ফেদারেসন অসিনা থাদোরকপা চেরোল অমনা হায়রক্লি।
চেরোল অসিনা হায়, মণিপুরদা থা ৯ লোম হেনবা মতম অসি চিন-কুকি নার্কো তেরোরিস্তশিংনা লমদম অসিগী অপূনবা শক্তমদা শীংনদুনা মরুওইনা মৈতৈদা লান্দারকপদগী হৌজিক মীয়াম পূম্নমক তঙদু লৈতাদবা ফীবম অমা মায়োক্নদুনা লৈরি। অসিগুম্বা তাঞ্জা অসিদা হৌখিবা ফেব্রুয়ারি ২৩ দা ফমখিবা আসাম গবর্নমেন্তগী কেবিনেত মীফম অমনা ‘মণিপুর লোন’ অসিবু আসামগী দিস্ত্রিক্ত ৪ মথংশীৎনা কাছার, হায়লাকান্দি, করিমগঞ্জ অমসুং হোজাই হায়রিবা দিস্ত্রিক্তশিং অসিদা এসোসিয়েত ওফিসিয়েল লেংগ্বেজ ওইনা শকখঙলগনি হায়না ৱারেপ লৌখিবা অসি আসামদা চোইনা-চোইনা তারিবা মণিপুরী দাইস্পোরাশিংগী য়াম্না নুংঙাইবা পাউ অমনি। আসাম গবর্নমেন্তনা লৌরক্লিবা ফীরেপ অসি ইন্দিয়ানা মনীং-মখা তম্বা ফংদ্রিঙৈ মতমদগী লৈরক্লবা আসাম অমসুং মণিপুর অনীগী তৎন-থানবা য়াদ্রবা মরী অদুবু খঙবিবা অমসুং ইকায়খুম্ববীবনি হায়না লোই।
আসাম গবর্নমেন্তগী কেবিনেত মীফম
মণিপুরগী পুৱারীগী অমম্বা তাঙ্কক অমা ওইখিবা ইং ১৮৯১-১৮২৬ ফাওবা অৱাশিংনা লান্দারকপদা ইরমদম অসি থাদোক্তুনা লাঞ্জেন্নখিবা চহী তরেৎ খুন্তাক লানশিখিবা থোকখিবনি। মতম অদুগী আসাম লৈবাক্তা শেংলবা চহী কয়া অসি অৱাবা খুদোংচাদবা কয়া মায়োক্নদুনা লৈরকখিবা মণিপুরী লোল ঙাঙবা মৈতৈ অমসুং মৈতৈ পাঙল ইচীন-ইনাওশিংগী ওইনদি থোইদোক্না নুংঙাইরবা পূংফম অমনি। মতম শাংনা গবর্নমেন্তগী খুদোংচবা কয়া মপূং ফানা ফংলমদবা অমসুং মণিপুরীশিংবু শক খঙবিরমদবা অদু ঙসিদি থেঙলবসু থেঙনা তপ্না-তপ্না আসামদা তারিবা মণিপুরীশিংগী ইনাক খুল্লবা লোল অমসুং কালচারবু খঙবিরকপা অসি ঐখোয় পূম্নমক্কী নুংঙাইবা মীকুপ অমসুনি।
আসামাদা খুন্দারিবা মৈতৈ অমসুং মৈতৈ পাঙলগী তোঙান-তোঙানবা সিবিল সোসাইতি ওর্গানাইজেসনশিংনা চোকথবা নাইদনা লীশাং শীৎনা হোৎনজরকপা অদুগী মহৈ ঙসিদি ফংলে। মসিদা আসাম গবর্নমেন্তকী মায়কৈদগী মরুওইনা থৌদাং লৌখিবা চীফ মিনিস্তর দাঃ হেমন্ত বিস্বা শর্মা, লক্ষিপুর এসেমব্লি কন্সতিত্যুয়েন্সিগী এম এল এ কৌশিক রাই, এম পি (সিলচর) অমসুং মণিপুরী লোনবু এসোসিয়েত ওফিসিয়েল লেংগ্বেজ ওইনা শকখঙনবা হোৎনবদা মতেঙ পাংবিখিবা লনাই মী খুদিংমকপুসু ফেদরেসন ওব সিবিল সোসাইতি ওর্গানাইজেসন, মণিপুরনা ঙমখৈ লৈতনা থাগৎপা অমসুং তৌবিমল খঙবা উৎচরি হায়নসু চেরোল অসিনা হায়রি। ।
সোর্স: পোক্নফম
0 কমেন্ট:
কমেন্ট তৌবিয়ু