সঙ্গীত নাটক এৱার্দ পীনবা খনগৎপদা মণিপুরদগী ৫ য়াওরে
ইম্ফাল, ফেব্রুয়ারি ২৮ : সঙ্গীত নাটক একাদেমি, নেসনেল একাদেমি ওব ম্যুজিক, দান্স এন্দ দ্রামা, নিউ দিল্লীগী জেনারেল কাউন্সিলগী মীফম থা অসিগী ২১ অমুসং ২২ দা নিউ দিল্লীদা পাঙথোকখিবগা লোয়ননা ইং ২০২২ অমসুং ২০২৩ গী ওইনা সঙ্গীত নাটক একাদেমি এৱার্দ (একাদেমি পুরস্কার) পীনবা মীওই ৯২ খনগৎপদা মণিপুরদগী মী ৫ য়াওরে। জেনারেল কাউন্সিলগী মীফম অদুনা ইং ২০২২ অমসুং ২০২৩গী ওইনা সঙ্গীত নাটক একাদেমি উস্তাদ বিসমিল্লা খান যুব পুরস্কার পীনবা নহা ওইরিবা আর্তিস্ত ৮০ খনগৎপদা মণিপুরদগী ৪ য়াওরে।
ইং ২০২২ গী ওইনা সঙ্গীত নাতক একাদেমি এৱার্দ পীনবগীদমক খনগৎপদা য়াওরক্লবা মণিপুরগী আর্তিস্তশিং অদুদি ম্যুজিক্তা সাপম কুল্লবি সিংহ (নত-পুঙ), দান্সতা এস নোয়োনশখি দেবী, থিয়েতারদা য়ুম্নাম সদানন্দ সিংহ (মাইম) অমসুং ত্রেদিসনেলগী লমদা চিংথাম রঞ্জিৎ খুমন (থাঙ-তা) নি। ইং ২০২৩ গী ওইনা সঙ্গীত নাটক একাদেমি এৱার্দ পীনবা খনগৎলবা মণিপুরগী আর্তিস্ত অদুদি জগোয়দা লতাসনা দেবীনি।
ইং ২০২২ গী সঙ্গীত নাটক একাদেমি উস্তাদ বিসমিল্লা খান যুব পুরস্কার পীনবগীদমক খনগৎলবা নহা ওইরিবা আর্তিস্তশিং অদুদি জগোয়দা উর্মিকা মাইবম অমসুং নট সঙ্কীর্তন্দা মোইরাংথেম কেন্দ্র সিংহনি। ইং ২০২৩ গী ওইনা খনগৎলবা মণিপুরগী আর্তিস্তশিং অদুদি ম্যুজিক্তা সাইখোম পিঙ্কি দেবী (ক্রিএতিব এন্দ এক্সপরিমেন্তেল ম্যুজিক) অমসুং জগোয়দা পুখ্রম্বম রীপা দেবীনি।
ইং ১৯৫২ দগী পীবা হৌখিবা এৱার্দ অসিনা চহী খুদীংগী ম্যুজিক, দান্স, থিয়েতর, ত্রেদিসনেল, ফোল্ক, ত্রাইবেল ম্যুজিক, ত্রেদিসনেল দান্স, ত্রেদিসনেল থিয়েটর, পপ্পেত্রি অমসুং অতৈ পার্ফোরমিং আর্তশিংদা থোইদোক হেন্দোকপা থৌদাং লৌবা আর্তিস্তিশিং খনগৎতুনা এৱার্দ অসি পীদুনা লাক্লি।
সঙ্গীত নাটক একাদেমি এৱার্দ অসিদা শেল ওইনা লুপা লাক্ষ ১, তাম্রাপত্র অমসুং অঙ্গভস্ত্রম অমমম য়াওরি। উস্তাদ বিসমিল্লা খান যুব পুরস্কার এৱার্দ অসিদা শেল ওইনা লুপা ২৫,০০০, তাম্রাপত্র অমসুং অঙ্গভস্ত্রম অমমম য়াওরি।
সোর্স: পোক্নফম
0 কমেন্ট:
কমেন্ট তৌবিয়ু