মণিপুরী লাইব্রেরি এন্ড রিসার্চ সেন্টারগী তরুক সুবা ফাউন্ডেশন ডে পাংথোকখ্রে
সিলেট ওক্টোবর ১৩ : মণিপুরী লাইব্রেরি এন্ড রিসার্চ সেন্টার (বাংলাদেশ)গী তরুক সুবা ফাউন্ডেশন ডেগী নুমিৎ নিনি চুপ্পা থৌরমগী অহান্বা নুমিৎকী থৌরম হৌখিবা ১০ ওক্টোবর ২০২৫, থাংজ নুমিৎতা মৌলভীবাজার জেলাগী কমলগঞ্জ উপজেলা মনুং চন্না লৈবা মনিপুরী কালচারাল কমপ্লেক্সতা পাংথোকখ্রে।
অহানবা নুমিৎকি থৌরমগী মতাং অমা
নুমিৎ চুপ্পমগী থৌরম অদুদা ৱার্কশোপ, নৈনমিফম, ইকায়খুম্নবা উৎপা অমদি ঈশৈ জগোয়নচিংবা থৌরম কয়া পাংথোকখি। থৌরমগী অহৌবদা মৈরা চুখৎতুনা হৌদোকপিখি ড. মুনিষ নিংথৌজম, কনভেনর, ফুঙ্গা হেরিটেজ, ইম্ফাল মণিপুর। মথংদা মণিপুরগী শক্নাইরবা জগোয়গী ওজা ড. খাঙেম্বম খোনিগী লুচিং মখাদা জগোয়গী ৱার্কশোপ অমসু পাংথোকখি। অহান্বা নুমিৎকী থৌরমপরেংগী অহুমশুবা থৌরম ওইনা শক্নাইরবা কবি একে শেরামনা প্রিসাইড তৌদুনা পাংথোকপা ইকায়খুম্নবা অমসুং নৈনমিফমগী থৌরমদা মৌলভীবাজার জেলাগী এসিস্টেন্ট ডেপুটি কমিশনার(এডিসি) মামুনুর রশিদনা চিফ গেস্ট অমসুং গেস্ট অফ ওনার ওইনা মাখন চন্দ্র সূত্রধর, উপজেলা নির্বাহী কর্মকর্তা (ইউএনও), কমলগঞ্জ, শরুক য়াখি। থৌরম অদুদা মণিপুরগী শক্নাইরবা জগোয়গী ওজা ড. খাঙেম্বম খোনি অমদি বাংলাদেশকী শক্নাইরবা জগোয়গী ওজা লিনথোই দেবী মখোয় অনিবু লেংয়ান অমসুং ক্রেস্ট পিদুনা ইকায়খুম্নবা উৎখি। লোয়ননা কুইজ কম্পিটিশন, লাইয়েক চাংদম্নবদা মায় পাক্লকখিবা মহৈরোয়শিংদসু ক্রেস্ট অমদি মনা য়েন্থোকখি। পনবা য়াবদি, এডিসি মামুনুর রশিদনা চীফগেস্টকী ৱারোলদা ভারত অমসুং বাংলাদেশকী নাৎকী লৈনরিবা মরি অসি হেন্না খুমাং চাওশিন্নবা অতৈগসু পুন্না অসিগুম্লবা থৌরম পাংথোক্নবা হোৎনমিন্নবা চংঙি অদুগা অঙম্বা মখৈ মহাক্কী মায়কৈদগী তেংবাংগনি হায়দুনা ফোংদোকলম্মি। অদুগা থৌরমদুদা মণিপুরী কলচর অমসুং লিতরেচরগী মতাঙদসু ৱাফম কয়া খন্ন-নৈনখি।
অহানবা নুমিৎকি অরোইবা থৌরম ওইনা নুংথিলদা মণিপুর অমদি বাংলাদেশকী আর্টিস্টশিংনা ঈশৈ অমসুং জগোয় উৎখি।
অরোইবা নুমিৎকি থৌরমগী মতাং অমা
মথং নুমিৎকী থৌরম ওইনা ঙরাং ১১ ওক্টোবর, ২০২৫, নোংমাইজিং নুমিৎতা সিলেটকী রাজবাড়িদা লৈবা মান্ডোপতা পাংথোকখি। শক্নাইরবা কবি অমসুং অইবা একে শেরামনা ময়াই তাংবল লৌবা মিফম অদুদা চীফ গেষ্ট ওইনা ড. মুনিষ নিংথৌজম, কনভেনর, ফুঙ্গা হেরিটেজ, মণিপুর, অমসুং স্পিসিএল গেস্ত ওইনা ড. খাঙেম্বম খোনি, এক্সিকিউটিভ ডিরেক্টর, ফুঙ্গা হেরিটেজ, মণিপুর না শরুক য়াখি। থৌরম অদুদা সিলেটকী শক্নাইরবা জগোয়গী ওজা শান্তনা দেবী, ডিরেক্টর, একাডেমি ফর মনিপুরী কালচার এন্ড আর্টস (এমকা) অমসুং শক্নাইরবা জগোয়গী ওজা ড. রাজকুমারী গীতাঞ্জলীবু লেংয়ান অমসুং ক্রেস্ট পিরদুনা ইকায়খুম্নবা উৎখি। পাঙথোকখিবা থৌরমদুদা মণিপুরী কলচর অমসুং লিতরেচরগী মতাঙদসু ৱাফম কয়া খন্ন-নৈনখি। চীফগেষ্টকী ৱারোলদা ড. মুনিষ নিংথৌজমনা বাংলাদেশতা খুন্দা লৈতাদুনা লৈরিবা মণিপুরীশিংনা অসিগুম্বা থৌরম কয়া পাঙথোকপা হায়বসি য়াম্না পূক্লিং থৌগৎনিঙাইনি হায়দুনসু ফোংদোকলম্মি।
নুমিৎ নিনি চুপ্না পাংথোকপা থৌরমগী অরোইবা থৌগল ওইনা মণিপুর অমসুং বাংলাদেশকী আর্টিস্টশিংনা ঈশৈ অমসুং জগোয় মখল কয়া খুদোল তমখি।
0 কমেন্ট:
কমেন্ট তৌবিয়ু