আর কে সি এসকী লাইশিং মণিপুরগী মমল নাইদ্রবা লন ওইহৌরিঃ কে সোবিতা
ইম্ফাল, ওক্তোবর ১৩ঃ লৈখিদ্রবা আর কে সি এসনা হিংলিঙৈদা য়েক্লস্বা লাইশিং মণিপুরগী মমল নাইদ্রবা লন ওইনা লৈহৌরে। মহাকুম্বা আর্তিস্ত অসি অতাঙবনি হায়না মণিপুর গবর্নমেন্তগী আর্ত এন্দ কলচর দিপার্তমেন্তগী হান্নগী দিরেক্তর দাঃ কে সোবিতা দেবীনা ফোঙদোকখ্রে।
দাঃ কে সোবিতানা ৱাফম অসি ঙসি আর কে সি এস বার্থ সেন্তিনরি সেলেব্রেসন কমিতিনা শীন্দুনা চহী অমা চুপ্পা চখরকখিবা লৈখিদ্রবা আর্তিস্ত অসিগী চহী ১০০শুবা বার্থ সেন্তিনরি সেলেব্রেসন লোইশিনবগী থৌরমদা ফোঙদোকখিবনি।
মহাক্না প্রিসাইদ তৌদুনা ঙসি ইম্ফালগী নিত্যাইপাৎ চুথেক্তা সোসাইতি মণিপুরগী হান্নগী প্রসিদেন্ত অরিবম জয়চন্দ্র শর্মা, স্তেত কলা একাদেমি এৱার্দিনা গেস্ত ওব ওনর ওইনা শরুক য়াখি।
থৌরম অসিগা মরী লৈননা দাঃ কে সোবিতা দেবীনা হায়, লৈখিদ্রবা আর কে সি এস অসি লমদম অসিগী অতাঙবা আর্তিস্ত অমনি। ঈরৈবাক-ঈরমদম অসিগীনি হায়রবদি মঙোন্দা চোকথবা নাইদবা অসিনা মহাক্কী থোইদোকপা মগুণনি। মহাক মরৈবাক-মরমদম্বু য়াম্না নুংশিজবা আর্তিস্তনি। মণিপুরগী পুৱারীগী তাঙ্কক কয়াবু মহাক্কী লাইদা মমি তাহল্লমখি। মহাক্বা য়েক্লম্বা লাইশিং য়েংলগা মণিপুরগী পুৱারী অসি লায়না খঙবা য়াই। আর্তিস্ত অসিগী লাই খুদীংমক য়াম্না মপূং ফাবা অমদি য়ান্না কূপথবা ওই। মসিমক্না মহাক্কী মণিপুরগী পুৱারীগী তাঙ্ককশিং লীরিবা লাইশিং লমদম অসিগী মমল নাইদ্রবা লন ওইহৌরিবনি। আর্তিস্ত অসিগী মরৈবাক-মরমদম্বু নুংশিজবগী ৱাখল্লোন অমদি মগুণ অসি ঙসিগী হৌরক্লিবা আর্তিস্তখত্তা নওনা মীপূম খুদীংমক্না তমজনফম ওই হায়না লৈখিদ্রবা আর্তিস্ত অসিবু সোবিতানা অৱাংবা থাক্তা শীংথাখি।
ঙসিগী থৌরম অদুদা সাহিত্য একাদেমি এৱার্দি সরতচান্দ থিয়ামনা ইবা শৈরেং লাইরিক 'খোঞ্জেল অমসুং খোন্থাং' হায়বা লাইরিক অমসু ফোঙখি। লোয়ননা কে ঐচ সদানন্দদা আর কে সি এস বার্থ সেন্তিনরি আর্ত একজিবিসন এৱার্দ অমদি মংশাতাবম সেমসন মীতৈ, য়ুমলেম্বম উদয়নন্দা অনীদা ওনরেবল মেন্সন পীদুনা ইকায় খুম্নখি। থৌরম অসিগী মনুং চন্না সরতচান্দ থিয়ামনা 'গ্লোবেলাইজেসন এন্দ ১০০ ইয়র্স জর্নি ওব আর কে সি এস' হায়বসিদা ৱা ঙাঙখি ।
সোর্স : পোক্নফম
0 কমেন্ট:
কমেন্ট তৌবিয়ু