মণিপুরনা গোল্ড ৫২, সিলভার ৩৮ অমসুং ব্রোঞ্জ ৪০ পূন্না মেদল ১৩০ ফংদুনা ওভরওল চেম্পিয়ন ওইবা ঙমখ্রে
ইম্ফাল, মার্চ ২৩ : নাগালেন্দনা য়ূম্বু ওইরগা হৌজিক চত্থরিবা ৩ লক শুবা এন ঈ গেমসকী ওইনা মণিপুরনা গোল্ড ৫২, সিলভর ৩৮ অমসুং ব্রোঞ্জ ৪০ লৌদুনা ওভরওল চেম্পিয়ন ওইবা ঙমখ্রে। এন ঈ গেমসকী ওইনা নাগালেন্দনা গোল্ড ৪৮, সিলভর ৪২, ব্রোঞ্জ ৪৪ পূন্না মেদল ১৩৪ অদুগা আসামনা গোল্ড ৪৩, সিলভর ৪৪, ব্রোঞ্জ ৫৩ পূন্না মেদল ১৪০ ফংদুনা মথংশিৎনা অনীশুবা অমসুং অহুমশুবা তাখ্রে।
মণিপুরগী ওইনা ঙসি শান্নখিবা ইভেন্টশিংগী ওইনা ফুটবোলগী ফাইনেলদা মিজোরামবু পাঞ্জল ২-১ দা মায়থীবা পীদুনা গোল্ড লৌবা ঙমখিবনি। টিম অনীগী মরক্তা ঙসি শান্নখিবা ফাইনেল মেটচ অদুগী ওইনা অহানবা হাপ লোইবা ফাওবদা মিজোরামনা পাঞ্জল ১-০ দা মাংজিল থারগা লৈবা ঙমখি। মিজোরামগী পাঞ্জল অদু মেটচ অদুগী ৪১ শুবা মিনিটতা ইসাকনা চনখিবনি। অদুম ওইনমক মণিপুরগী হৈ-শিংলবা শান্নরোয়শিংনা অনীশুবা হাফতা পাঞ্জল ২ চন্দুনা মেটচ অদু পাঞ্জল ২-১ দা মায় পাকখিবনি। মণিপুরগী পাঞ্জলশিং অদু মেটচ অদুগী ৭৪ অমসুং ৮৮ শুবা মিনিটতা মথংশিৎনা দেনি অমসুং সনাথোইনা অমমম্ চনখিবনি।
অমরোমদা, আর্চারিগী ওইনা মণিপুরগী উইমেন্স টিমনা গোল্ড অদুগা মেন্স টিমনা ব্রোঞ্জ লৌবা ঙমখ্রে। ইন্দিভিজ্যুয়েলগী ওইনা মেন্স সিঙ্গলসতা জেমিনা ব্রোঞ্জ, মেন্স দবলসতা এলেন অমসুং রোহেনগী পুংবানা ব্রোঞ্জ, মিক্স দবলসতা অনিল কুমার অমসুং মহেশ্বরীনা ব্রোঞ্জ অদুগা উইমেন্স সিঙ্গলসতা মহেশ্বরন সিলভার লৌবা ঙমখিবনি।
বেল্ট রেষ্টলিংগী ওইনা কেজি ৯০ গী কাঙলূপ্ত মোইরাংথেম সনাথোইনা গোল্ড, কেজি ৬৫ গীদা লাইশ্রম চিতম্বলানা সিলভর, কেজি ৫৫গীদা লোংজম ঙান্থোই চনুনা সিলভর, কেজি ৭০ গীদা লোংজম লিপসননা ব্রোঞ্জ, কেজি ৮০ গীদা থোমাস লাইশ্রমনা ব্রোঞ্জ অদুগা কেজি ৭০ গীদা থৌদাম প্রিয়ানন্দনা ব্রোঞ্জ মেদলশিং লৌবা ঙমখি।
টেন্নিসকী ওইনা মণিপুরনা গোল্ড ৫, সিলভর ১; এথলেটিক্স ক্রোস কন্ট্রিগী ওইনা গোল্ড ১ অমসুং ব্রোঞ্জ ১ লৌবা ঙমখি। মণিপুরনা মেদলশিং লৌখিবা দিসিপ্লিনশিং অদুদি আর্চরিদা গোল্ড ৮, সিলভর ৯, ব্রোঞ্জ ৭; এথলেটিক্সতা গোল্ড ৩, সিলভর ৫, ব্রোঞ্জ ৩, বেদমিন্টনদা সিলভর ১, ব্রোঞ্জ ৩; বোক্সিংদা গোল্ড ৫, সিলভর ৩, ব্রোঞ্জ ৭; ফুটবোলদা গোল্ড ১,; পেনকাক সিলাটতা গোল্ড ৬, সিলভর ৫, ব্রোঞ্জ ৯; সেপাক টাক্রোদা গোল্ড ৭, সিলভর ১; টেবল টেন্নিসতা সিলভর ২, ব্রোঞ্জ ৪; ট্রাইক্কোন্দোদা গোল্ড ৪, সিলভর ১, ব্রোঞ্জ ৩; টেন্নিসতা গোল্ড ৫, সিলভর ১; ভোলিবোলদা সিলভর ১; বেল্ট রেষ্টলিংদা গোল্ড ১, সিলভর ৩, ব্রোঞ্জ ২; রেষ্টলিংদা গোল্ড ৬, সিলভর ৪ অদুগা ৱুশুদা গোল্ড ৬, সিলভর ২, ব্রোঞ্জ ২ পূন্না গোল্ড ৫২, সিলভর ৩৮ অমসুং ব্রোঞ্জ ৪০ ফংদুনা মণিপুরনা ওভরওল চেম্পিয়ন ওইবা ঙমখিবনি।
মণিপুরদা দিসিপ্লিন ১৫দা অথোই-অহেন চাংদম্নখিবা অদুগী ওইনা আর্চরিনা মেদল মশীং খ্বাইদগী হেন্না য়াম্না লৌবা ঙমখি। আর্চরি খক্তদা মণিপুরনা গোল্ড ৮ য়াওনা পূন্না মেদল মেদল ২৪ লৌবা ঙমখিবনি। অদুগা বাস্কেটবোলগী ওইনদি মণিপুরনা মেদল অমত্তা লৌবা ঙমখিদে।
এন ঈ গেমসকী ওইনা ফেয়ার প্লেগী এৱার্দ সিক্কিমনা ফংখি অদুগা স্পিরিট ওফ দি ওলিম্পিক এৱার্দনা ত্রিপুরাদা খূৎশিন্নখি। ত্রিপুরাগী শান্নরোয়শিংনা স্পোর্টসমেনশিপ, য়ুনিটি অমসুং এক্সলেন্সকী ভেল্যু খঙনা শান্নখিবা অদুগীদমক স্পিরিটি ওফ ওলিম্পিক এৱার্দ ত্রিপুরাদা খূৎশিন্নখিবনি। এন ঈ গেমসকী আউটষ্টেন্দিং স্পোর্টসমেন এৱার্দনা নাগালেন্দগী ভেনুজো দোহুওদা খূৎশিন্নখি।
মহাক্না দিসিপ্লিন অনীদা গোল্ড মেদল অনী লৌবা ঙমখি। দোহুওনা দিস্কস থ্রো অমসুং শোট পুটতা গোল্ড মেদল অমমম্ অদুগা কেজি ১০০ মথক্কী বেল্ট রেষ্টলিংদা গোল্ড অমা লৌবা ঙমখি। আউটষ্টেন্দিং স্পোর্টস উইমেন এৱার্দসু নাগালেন্দগী সুচোই টিনা ফংখি। মহাক্না এন ই গেমসতা পূন্না গোল্ড মেদল ৪ লৌবা ঙমখি লোয়ননা সিলভর ২ সু লৌবা ঙমখি। গেমস অসিগী ওইনা মিজোরাম, অরুনাচল প্রদেশ, সিক্কিম, মেঘালয়া অমসুং ত্রিপুরানা মথংশিৎনা ৪শুবা, ৫শুবা, ৬শুবা, ৭শুবা অমসুং ৮শুবা মফমদা লৈবা ঙমখি।
সোর্স: পোক্নফম
0 কমেন্ট:
কমেন্ট তৌবিয়ু