• 657
• ২৫শে মার্চ ২০২৪ ইং
• Share on:

পুন্সিদি চৎলি- অমম্বদসু অঙানবদসু

লাইরিক্কী মিং: অমোৎপা পুন্সিগী অৱাবা

অইবী: থোকচোমওংবী কৈনাহান দেবী

অফোঙবা: বাংলাদেশ মণিপুরী সাহিত্য সংসদ

ফোঙবা মতম: ফেব্রুয়ারি, ২০২২

কবি থোকচোমওংবী কৈনাহান দেবী- থোৎ মেংলবা ৱাহৈ-ৱাতা শীজিন্নদুনা কল্পনাগী মরুমদা পুন্সিবু নুংশিনা য়েংলিবা কবিনি। ফজবা-নুংশিবগী হোংবা নাইদ্রবা পুজারি অমা ওইনা চরাংনবা, লম্মাংনরবা খুন্নায় অসিদা ইং-তপ্লবা পুন্সি অমবু খৌরাংজরিবা কবিনি। মহৌশা লাইরেম্বীগী ফজবদা ঙাওজরিবা, অয়াকপা খোঞ্জেলদগী লাপথোকচরগা চৎনবীগী ৱাংমদা লেপ্তুনা রোমান্টিসিস্ট অমা ওইনা মণিপুরী সাহিত্যগী য়েন্দাইদা শৈরেংগী লৈচল হাপতুনা অচেৎপা খোঙফম লৌরিবি কবিনি। মহাক্কী শৈরেংনা অপাবশিংবু তহা তহাদবা খূৎই অমসুং খূৎফোংদোক্না তান্থা নাইবা ঈথক অমদা পুদুনা চৎলি। লাইরিকসিদা য়াওরিবা শৈরেংশিং ফজবা, নুংশিবা, অচুম্বা অমসুং নুংঙায়বা ফঙদ্রবা কবিনা চৈনাগী য়ূম্ফমদগী শাগৎলকপা শৈরেংশিংনি।

লাইরিক অসিগী শৈরেংগী খূৎই, মফোঙদোক অমসুং থীমদা য়েংলগা মরু ওইবা মখল অহুম থোক্না খায়দোকপা য়াই। অহানবদা রোমান্টিক অমদি ট্রেডিশনাল ওইবা শৈরেং; অনীশুবদা মরৈপাক মরমদম্বু শৈথাবা অমদি খুন্নায়গী মথক্তা পেন্দবা, শৈরেং; অহুম শুবদা মীওইবগী শক্তম হোংলকপা অমদি নুং-পান মান্নদবদা পেন্দবা শৈরেং। হায়রিবা মখল অহুমসিগী ৱাংমদসু পুন্সিগী ওইনা কাইনখ্রবা মরূপকিদমক এলিজি, কোভিড ১৯ লৈনাগী মতম্বু শৈথাবা অমসুং বঙ্গবন্ধুবু শৈথাবা  ফজরবা শৈরেং খরসু য়াওরি।

কৈনাহান দেবীগী শৈরেংদা নুপীগী পুন্সিবু ফজনা, থাক ৱাংনা থাঙ্গৎতুনা শৈথাবা থেংনৈ। নুপীনা ময়ূম পাল্লবা মতুংদা ওইরকপা অৱাবগী শক্তমবু কবিনা শৈদম্লকখি। কোকথক্তা অৱা-পোৎলুম পুদুনা ইমুং মনুংগী হোৎনবদা মশাগী ৱাখল খনবগী তঞ্জা ফঙজহৌদ্রবা নুপীগী পুন্সিবু মরিক চুম্না য়েক্লকই। মীৎয়েং তাসি কবিগী খূৎইদা-

‘ইপুরোই-ইচা, ইকু-ইনেম

সংসারগী থবক হোৎনরিঙৈ

করম্না মতম হৌখিবা

ঙমহৌদে খঙবা ইন্দ্রিগী পাম্বৈনা

চৎখি মতমদি তুমিন তুমিন্না।

খঙহৌদনা পুন্সিনা চায়থখিবা

তুংহন্না য়েংবা মতমদদি

য়াচঙখরে কোরৌহনবসু।’ [ঙাইবিরমদে মতমনদি; লমায়-১৯]

ঐখোয়গী খুন্নায়দা নুপীবু নুপাগী মখা থংবা ওইনা কৈদৌঙৈ লৌনরমদে। লৈশেমলোনগী ৱারীদা লৈমরেল সিদবী অমদি লাইরেম্মা তরেৎ হায়না খঙনবা লাইরেম্বীশিংনা কোংলৌতোন লৌথিবনা থাজবা হৱাই থাংপাকপু শমদোন অয়াংবনা নৈখায়বদা মতু-মুমেন ফোইখিবগী ৱা লাই হরাওবদা উৎলিবসিনা লৈশেমঙৈদগী হৌনা মৈতৈ নুপীনা খুন্নায়সিদা লৌরকলিবা থৌদাং তাকই। পৃথিবীদা লৈরিবা নুপী খুন্নায়শিংগা চাংদম্নরবদি মৈতৈ নুপীনা থোয়দোক্না থাক ৱাংনা অঙনবা মতমদগী লৈরম্মি। কবি থোকচোমওংবী কৈনাহনগী মীৎয়েংসু নুপীগী পুন্সিবু থাক হন্থনা নত্রগা অৱাবগী মশক ওইনা য়েংবা নত্তে, হায়বা য়াই নুপীগী পুন্সিগীদমক চাওথোকচরিবা পোংজরিবা মীৎয়েংনি। মীৎয়েং তাসি কবিগী শৈরেংদা-

‘নুপী নঙসে লৈরমদ্রদি

মীওইপোক্তা পোক্তুনা

লাক্লমলোই কনাসু মলেমসিদা।

থা তরা গর্ভদা নাউপুদুনা

পীবা ঙম্বিনি অনৌবা মপোক।

... ... ... ...

নুপী নঙসে মপাল নাইদ্রবা

মীনুংশিতনা থল্লবা থম্মোয়নি।’ [নুপী; ল: ২৭]

মতাংসিদা কবিগী মীৎয়েংসি ফেমিনিস্টকী মীৎয়েংরা হায়বগী ৱাহং অমসু থম্বা য়াই।

নুপী ওইবীগী পুন্সিদা অঙাং পোকপা হায়বসি অনৌবা পুন্সি অমনি হায়নৈ। নুপী ওইবীনা মশক ফজনা খঙবা ঙম্মি পুন্সি অদুগী শক্তম। কবি থোকচোমওংবী কৈনাহননা ‘তাইবংগী লম্বীদা’ হায়বা শৈরেংদা নুপী অমনা শিজর অপারেশনদা অঙাং উন্নবগী ক্ষেণফমদুবু মরিক চুম্না য়েক্লকখি। অঙাং উন্নবগীদমক হাসপাতালদা চৎলবা মতুংদগী হৌদুনা ওটি রুমদা পুশিন্দুনা এনেসথেসিয়া কাপ্পগী মখাদা ওইরকখিবা ফিবমদুবু কবিনা শৈথাজৈ অসুম্না-

‘নুংঙাইবা মঙলান অমনা থাপ্না পুবিখি ঐবু

ফিবাল নাইদ্রবা তুরেলগী পাক্লা ঈপাক্তা।

তাউথখি হিনাউদুদা তোংলদুনা ইতোমতা

ঈশিংগী কল্লবা ঈপোমলক্তা।

কন্না হাইখি হিনাউদো,

কিবনা তনিক্লবা ঐগী থৱায়,

অঙাংনা কপ্পগী খোঞ্জেলদা

হল্লকই লমহুকন্‌রুবা লম্বীদগী

তাইবংগী লম্বীদা মিকপ থোক্লকই।’ [তাইবংগী লম্বীদা; ল: ৩১]

কবিগী পলেম-পন্থৌনা বাংলাদেশকী ভানুগাছ লমদমদগী খুল হোংদুনা মণিপুরগী জিরি হায়বা লমদা চৎখিবাসিনা কবিগী ৱাখলদা চাওরবা মফম অমা কনদুনা লৈখি। মহাক্কী শৈরেং কয়াদা অসিগী মমি উবা ফঙঙি। কাইরবা থম্মোয়গী তেংথাখোল [ল: ১৩], হায়হৌদ্রবা [ল: ২৪],  ৱাহং [ল: ৩৮], ঙমখৈ [ল: ৪১], মঙলানগী ৱারী [ল: ৫৯], ইমা [ল: ৮৫] হায়বা শৈরেংশিংদা ঐখোয়না উরিবসি নিংবা কাইবনি। নিংবা কায়বতা নত্তনা ঈখৌলাংবা অমগীদমক মদোম পূক্নীং নুংশিনা তেংথাজবনি। নিংবা কাইরবা কবিগী লৈকংলাগুম্লবা থম্মোয়না ইংলবা অমৃতগী ঈচেল অমত্তং খৌরাংনা ৱাখলগী উমংদা চঙলগা থিজরি। নিংঙমদবা অমগা ইরোয়ননা কবিনা হায়রকখি-

‘অসুম অসুম লাপথোকখিবনা

তিনখ্রে উপাল ৱাপালগী মরুমদা

উখিদরে পাব-ইমাবু

হাঙলবা লম্বীদুগী চিদায়দা

চৎখিবা মাইকৈবু য়েংলদুনা

লেপ্তুনা লৈহৌরি ঐনাদি।’ [কাইরবা থম্মোয়গী তেংথাখোল; ল: ১৩]

পুন্সিগী শাংলবা খোঙচৎতা পাউদম্বীনবা, থৌনা হাপ্পীনবা লৈরক্ত্রবদা ফোঙদোরকই তেংথারোল-

‘তাবিরমদে কনানসু

ঐগী থম্মোয়গী তেংথাখোল,

অৱা পোত্থাবদা লোয়নবী

খাঙলিবা মোন্নতা তাবিরম্মী।

তাবিরম্মী মীৎলু পিরাংতনা,

তাবিরম্মী অচিকপা অহিংতনা।’ [ৱাহং; ল: ৩৮]

মমা-মপা কায়নরবা কবিনা নোংমা মঙলান্দা মহাক্কী নুংশিরবা পলেমবু উখিবগী ৱারীসু ঐখোয়না খঙবা ঙম্মি ‘মঙলানগীৱারী’ হায়বা শৈরেংদা। পারুবদা তুজুংবা শৈরেংনি। অইবীগী পলেম পন্থৌনা বাংলাদেশ থাদোক্তুনা চৎলমদায়দা হায়রম্বা পাউমেন ৱাহৈ, মচা খাইনরমদায়গী তেংথাবা মতমদুবু নিংশিংদুনা কবিদি তৎতনা তেংথাজৈ, কপহল্লি কবিগী থম্মোয়বু। অদুদগীসু হেল্লদুনা মপাবুঙনা পুন্সি খাইনরমদায় অহীংদা কবিগী মঙলান্দা লাক্তুনা উন্নরম্বা, হায়রম্বা-

‘ঙসিদি নদোম লৈহৌরোকো,

তাইবং খোংচৎ লোইরে ঐগী।

ইচাশিং হৌরগা কপ্লনিদো

নথাদা নঙনা কোন্বীয়ু,

মতম ঐগী লোইরেদো

নখোয়না তুম্লিঙৈ খোঙশাল্লগে,

নুংঙাই য়াইফা লৈহৌরকো।’ [মঙলানগী ৱারী; ল: ৫৯]

শৈরেংসিং অসি পারুবদা থম্মোয় কনবা অপাবগী মীৎলুদগীসু পিরাং চদুম খরদি শিন্থবা শোয়দে।

মীওইবা সমাজনা ‘সিভিলাইজড’ ওইরে হায়না লৌরিবমখৈ লৈখা তারকপগী মশক মতৌনা লাকশিল্লকপা, মীওইবগী ৱাখল পীকথরকক্তুনা থাজনদবগী ৱাখলনা লায়েংবা ঙম্লরোইদবা লাইনাগুম শন্দোরকই। মীওইবগী মনুংদা থাজবা লৈনরক্ত্রবা শক্তম  অসিবু কবিনা শৈথারকই অসুম্না-

‘করম্নানো থাজগদবা

মনুঙ মপান নাইবা

মীওইবগী লীচৎ শাজৎ,

অতোঙ অকুৎ নাইবা চৎনা পথাপ পরিং

মীনা শেম্বা ঙাক্তনি,

কনাবুনো থাজগদবা?’ [ঙমদে থাজবা; ল: ৩৩]

মরাল লৈজদ্রবা অমবু মরাল শিবিবা, ঐ মঙায়রে খনবা নাপলনা অশোনববু মরাল থঙজিনবিবা অসিবু উরুবদা কবিনা তেংথারকই মরাল লৈজদ্রবা অমা ওইনা-

‘শিখ্রবনি ঐদি নুমিত্তুদগী

ইকায়বা, লেমজবা পুম্নমক

হিংলিবসে

হৌজিক শিবগা মান্নরবা

থৱায় য়াওদ্রবা হকচাংনি।’ [ঙমদে থাজবা; ল: ৩৩]

কৈনাহনগী শৈরেংশিংদা মপুং ওইনা পুন্সিদা থেংনরিবা মথোং চাদবা মওং কয়াদা পেন্দবা অমদি নুংনাংবা ফোঙদোকপতা নত্তনা সমাজ অসিদা মীৎকুপ অমা কাংদনা থোকলিবা থৌদোক অমদি চৎনরোলশিংদা করেম্নবনি। মশাবু অশিংবনি, তৌঙম্বনি খঞ্জদুনা পোংজরিবা, মশক মতৌ ফিজেৎ-চাকচেৎতা মী মাল্লবসু মীগী লীচৎ-শাজৎ খঙদ্রবা তুকচ্চবগী শক্তম লৌরিবা খুন্নায়গী শক্তমশিংদুবু শৈথারকই অতোপ্পা শৈরেং অমদা-

‘য়েংঙি মিংশেলদা মায়থোংগী ফজবা

য়েংদে ৱাখল-পূক্নিগী অমোৎপা,

অফবা মী শাশিন্নবগী লমজেলদা

শরূক য়ান্নরি অফবা শানবা,

ইশাগী অশেংববু য়োন্থোক্লগা।’  [নোকশিন্নীংবা; ল: ৩৪]

অতোপ্পা শৈরেং খরদসু খুন্নায় অসিগী মীওই লমচৎকী অমোৎপা, অশোনবা মশক কয়াবু পুথোক্লগা ডি হ্যুমেনাইজেসনগী মশক উৎতুনা শৈরেংগী শক্তম শাগৎলি। লাইরিক অসিদা হৌখবিা মতমগা হৌজিক্কী পুন্সিগা নুং-পানদা ওল্লক্লিবা খেন্নবা অমসুং মীওইবগী মঙগা-তাইবংগা খন্নেবা অসি য়ক্নেবা হোৎনবা তোয়না থেংনরকই। শক্তম হোংলবা মীওইবা পুন্সিনা কবিবু লাংতক্নহল্লি। অচুম অরান মশক খঙলক্তবা খুন্নায়গী শক্তম উরগা কবিনা হায়রকই-

‘মচু শংবা তাইবংপানসিদা

অশেংবা মচু খঙগনি করম্না?

মায়থোংদনা মমোন মিনোক

পূক্নিংদনা অমোৎপা ঙাক্তা।’  [শেংদবা পোৎ; ল: ২৯]

মোডার্নিতিগী মনুংদা চেল্লিবা নাইতোম তাবা (alienation) গী অর্থদি পেন্দবা অশাওবা উৎপতনা ওইদে। মীওইবগী য়াইফনবগীদমক্তা হেন্না ইনভোলভমেন্ট লৈবা, হেন্না কমিটমেন্ট লৈবা হায়বসিসু মোডার্নিতিগী শকলোন অমনি। লাইরিক অসিদা য়াওরিবা অয়াম্বা শৈরেংদি মীৎয়েংদা ওইনা ইন্তিগ্রেল ওইরকই। মরমদি কবিগী নুংনাংবা, অশাউবা ক্রিটিকেল এটিচিউড অসিগী মনুংদা মীওইবগী স্বার্থনা ময়ায়দা থম্লগা য়েংবা মীৎয়েং, মীওইববু নুংশিবগী অমসুং হেন্না ফজবা অনৌবা সমাজ অমা ওইহন্নিংবগী মীৎয়েং অমা য়াওরি। শৈরেং খরদা হৌজিক্কী মতমদা থোক্লবা খুন্নায়গী খুরবা মীৎয়েংবু পেল্লক্তদুনা স্বার্থত্যাগনা য়ূম্ফম ওইবা সমাজ অমবু ইখৌলাংজবা উৎখি।

‘পুন্সি’ হায়বা শৈরেংদা মীওইবা পুন্সিবু হিংনবগী লানফমনি হায়বা ৱাখল্লোন ফোঙদোক্তুনা কবিনা মীওইবা পুন্সিগী রিয়েলিটিবু য়েক্লকখি অসুম্না-

‘পুন্সি হায়বসে হকচাংদগী চেন্থরকপা

হুমাং মরীকনি

লম্বীগী ৱাউথাংনরবা উফুলনি

চাকথেক্লবা কালেনগী নুংশানি।’ [পুন্সি, ল: ২৩]

লাইরিক অসিগী মীংথোন শৈরেং ওইরিবা ‘অমোৎপা পুন্সিগী অৱাবা’ শৈরেংসিনা হিউমেনিজমগী ঈচেল অমা চেনশিল্লকপতা নত্তনা অরোইবা নাইদ্রবা মীওইবা পুন্সিগা প্রকৃতিগা থাদোকন্‌বা য়াদনা লৈরিবা মরীবু নিংশিংহল্লি। লাইরিক অসিদা য়াওরিবা  রোমান্টিক শৈরেংগী সুরগা লোয়ননা মতমগী ওইরিবা শক্তমদা চঙশিল্লুরগা থোরক্লিবা নুংহিক্নরবা খোঞ্জেল অসিমক্না অইবীবু লংদাইদা মফম পীবনা হেন্না মতিক চানা থোক্লি। খোঙচৎ অসিদা থেংনরিবা মহৌশা লাইরেম্বীগী শক্লোনশিংবু উরুবদা ফাওরকপা পূক্নীং ইহুলবু থোৎ নৌবা ৱাহৈ ৱাতানা লৈতেংদুনা সাবজেক্টিব ওইনা ফোদোকই। শৈরেং অসিদা খুন্নায়গী কোকচাওবাশিংগী কোট টাই আনোক্কী মরুমদা কুপশিন্দুনা থম্লিবা নোংমা-নোংমগী মরেপ ৱাংখৎলক্লিবা অমোৎপা শক্তম্বু য়েক্লকই, অদুগা অরাম খৌরাংবগী মৈচাক্না চাক্লবা অনিবশিংগী অৱাবা পুন্সিবু শৈথারকই। নুংহিকন্‌বা অমগা লোয়ননা কবিনা হায়রকই-

‘নুংঙাইবনা উদে লাইরবগী অৱাবা

উরবসু উশিন্নদে, লৈতে য়েংবগী মতম

চৎখিবনি মখোয়দি নুংশিবা মনমবু তৈদুনা

চৎখিবনি মখোয়দি মমল য়াম্বা গাড়ি তোংদুনা।

অদুগা অমোৎপা মাদি থনুংদা লোইনৈ

থানবা লৈতে খোঙথাং খুদিং...’ [অমোৎপা পুন্সিগী অৱাবা; ল: ৭৩]

মীচমগী অৱাবা পুন্সিবু শৈথাদুনা ইরম্বা ‘অরেম্বনি’ হায়বা শৈরেংদা কবিনা হিউমেনিজম অমসুং ইউনিভার্সেলিজমগী মীৎয়েংবু মশক তাকপা ঙম্মি। মীচম পুন্সিগীদমক মহাক্কী থম্মোয়না লুপচবা অসিবু মোদর্ন এলিমিনেশন হায়বা য়াই। মীচমগীদমক্তা অসিগুম্বা দিস্তর্বেন্স পোক্লকপা অসিদি মোডর্ন সেন্সিবিলিটিরোমদা খোং থাংজিল্লকপনিসু হায়বা য়াই।

মীৎয়েং তাসি কবিগী খূৎইদা-

‘শোইদ্রগা লোইরে মশাগীতা

নোংমতা খল্লুদে লায়রবশিংগী,

ফিজেৎ’মা মতেং পাংলুগে

লনথুম্না চীংগুম পৈরবসু।’  [অরেম্বনি; ল: ৬৯]

‘অমোৎপা পুন্সিগী অৱাবা’ মীংথোনবা লাইরিক অসিগী শৈরেংগী হিরম, শিজিন্নরিবা লোন অমসুং শৈশক্তা থোৎ নৌবা, লৈনম নম্বা-কুরাক পাইবা শক্তম উরবসু ট্রেডিশনাল শৈরেংগী মশক ওইরিবা খোইমুগী-লৈরাংগী-কোকিলগী-লিরি হুম্বা মলয়াগী শৈরেংদু নত্তে। অদুগা মডার্নিস্টশিংগী মতৌগুম ৱাহংতা মঙায়বা, পাউখুম য়াওদবা, পুন্সিগী অর্থ মাঙখিবগা লোয়ননা অহাংবা ঙাক্তা উরকপা শৈরেংসু নত্তে, নত্তে সুররিয়েলিস্টশিংগী নুংগী অর্থ চেনবা শৈরেংসু। তশেংনা হায়বদা কবি থোকচোমওংবী কৈনাহানগী শৈরেংগী অশেংবা শক্তমসি শৈরেং লাইরিক অমত্তনা লেপথোকপা ৱানা থোকই, মথংগী লাইরক্কীদমক ঙাইখিবা তারি। ময়ামসু ঙায়বিরসি। লেপ্তনা চেন্থবা ওইসনু কবি থোকচোমওংবী কৈনাহান দেবীগী শৈরেংগী ঈচেল।