ভোলাগঞ্জগী মৈতৈশিংদা ফংফম থোকপা চাকথুংশিং ফংহন্নবা হোৎনগনি: সিএম
ইম্ফাল, ওক্টোবর ০২ : ভোলাগঞ্জদা খুন্দারিবা মৈতৈশিং মেঘালয়গী সিটিজেন অমা ওইনা মখোয়গী ফংম থোকপশিং ফংহন্নবা হোৎনগনি হায়না চীফ মিনিষ্টার এন বীরেন সিংহনা ফোঙদোকখ্রে। চীফ মিনিষ্টারনা ৱাফম অসি বি জে পি মণিপুর প্রদেশনা শীন্দুনা থম্বাল শঙলেন্দা পাঙথোকখিবা ফাদার ওব দি নেসন মহাত্মা গান্ধীগী ১৫৩ শুবা মপোক নুমিৎ, লৈবাক অসিগী অনীশুবা প্রাইম মিনিষ্টার লাল বাহাদুর শাস্ত্রিগী ১১৮ শুবা মপোক নুমিৎ অমসুং প্রাইম মিনিষ্টার নরেন্দ্র মোদিগী ৭২ শুবা মপোক নুমিৎ, সেপ্টেম্বর ১৭ তগী চত্থরকপা সেবা পখৱাড়া (সার্বিস ফোর্টনাইট) লোইশিনবগী থৌরমদা ফোঙদোকখিবনি।
পি দি এ (প্লানিং এন্দ দিবেলপমেন্ত অথোরিটি) গী চেয়ারমেন, এম এল এ লৌরেম্বম রামেশ্বর মীতৈনা পাউমীশিংগী ভোলাগঞ্জ খোঙচৎতা থেংনরকখিবা পাউদমগা মরী লৈননা হংবা ৱাহং অমদা চীফ মিনিষ্টার এন বীরেন সিংহনা হায়, স্তেত গবর্নমেন্তনা মণিপুরগী মপান্দা খুন্দারিবা মৈতৈশিং গী অৱাবশিং য়েংশিন্দুনা লাক্লি। মখা তানসু য়েংশিনখিগিনি।
বীরেননা হায়, হন্দক এম এল এ রামেশ্বর (কৈরাও) না মেঘালয়গী ভোলাগঞ্জদা চৎলুবদা মফম অদুদা খুন্দারিবা মৈতৈশিংনা খুদোংচাদবা কয়া মায়োক্নরম্বা, মপূং ওইনা স্তেত অদুদা মাইনোরিটি ওইরগসু মসিগী স্তেতস পীবীদবনা ফংফম থোকপা খুদোংচাবা অমত্তা ফংদনা লৈরি হায়বা খঙবা ঙম্লে। মহাক্না হায়, মফম অদুদা লৈরিবা মৈতৈশিংবু শকখঙবীনবা অমসুং মখোয়গী রাইটস মৎপীদনবা মেঘালয়গী চীফ মিনিষ্টার কোনরাদ সাংমাদা স্তেতকী মায়কৈদগী ৱাফম কয়া থমখিবা লৈরে।
হান্না ভোতর লিস্ত মমিং হাপ্লমদবা অদু হৌজিক্তি য়াওরে হায়রি। মেঘালয়গী চীফ মিনিস্টারনসু জিরিবামদা খাসি খরা লৈরিবা অদুগী মতাঙদা হায়রকখি। জিরিবামদা লৈরিবা খাসিশিংগীদমক্তসু গবর্নমেন্তনা ফনবা তৌগনি হায়খিবা লৈরে। ভোলাগঞ্জদা মৈতৈশিংনা য়াম্না ৱানা লৈরগদি মখোয়বু মণিপুরদা পুরক্লগা গবর্ণমেন্তনা অখন্ননা মখোয়গীদমক লৈফম শীনগে হায়বগী ৱাখল্লোন্দা এম এল এ থারুবনি। ঙসি মহাক্না এম এল এগসু উনরে।
মফম অদুদা লৈরিবা মৈতৈশিং মেঘালয়গী সিটিজেন অমা ওইবগী ফংফম থোকপশিং অদু ফংহন্নবা স্তেত অদুগী চীফ মিনিষ্টারগা ৱারী শানরগনি, অইবা চেরোলসু থারগনি হায়না এন বীরেন সিংহনা ফোঙদোকখি। গবর্ণমেন্তকী হায়দোক্তুনা লৈরিবা থবকশিংগী মতাঙদা পাউমীশিংনা হংবা ৱাহংগী পাউখুম পীরদুনা চীফ মিনিস্তারনা হায়, থাখায় অমগী মনুংদা আই আর বি (ইন্দিয়া রিজার্ব বেটারিয়ান) গী য়াওনা গভর্নমেন্তনা লৌখিবা থবকশিংগী ফল মথং মথং হায়দোক্লগনি। হান্নগী গবর্নমেন্তকী স্ট্রাকচারশিংদা অশোয়-অঙাম য়াওরম্বদু চুমথোকপগী মতম খরা লৌবনি। মীয়ামগী অপাম্বা থুংনবা থবক লৌখিবগী ফলশিং হায়দোক্লগনি।
থৌরমগা মরী লৈননা এন বীরৈননা হায়খি, মহাত্মা গান্ধীনা পামজরম্বা অমসুং প্রাইম মিনিষ্টার নরেন্দ্র মোদিগী অপাম্বগী মতুং ইন্না ঙসিগী থৌরম অসিদা খাদিগী পোৎলমশিং য়োনবা স্তোলসু হাংদোক্লি। গবর্ণমেন্তকী লৈরিবা ওফিসশিংদসু খাদিগী পোৎলমশিং শীজিন্ননবা খঙহনখিবা লৈরে। প্রাইম মিনিষ্টার নরেন্দ্র মোদিগী ‘সবকা সাথ-সবকা বিকাশ, সবকা বিশ্বাস-সবকা প্রয়াস’ হায়বা ৱাখল্লোন অসিদা তুং ইন্দুনা চৎসি। খাদিগী পোৎলমশিং শীজিন্নসি। ইরোমদোম হিংবা ঙম্নবা হোৎনসি। লৈরিবা পুখ্রি, তুরেলশিং লূ-নান্না থম্বা, মহৌশানা পীরকপা নোংগী ঈশিং য়োকশিন্দুনা থম্বা মফম খুদীংমক লুনা-লান্না থম্বা হায়বা প্রাইম মিনিষ্টারগী ৱাখল্লোন্দা পূন্না চৎমিন্নসি হায়না চীফ মিনিষ্টার এন বীরেন সিংহনা ফোঙদোকখি।
প্রাইম মিনিষ্টার নরেন্দ্র মোদিগী মপেকা নুমিৎকা মরী লৈননা মহাক্কী অপম্বগী মতুং ইন্না চত্থরক্লিবা সেবা পখৱাড়া অসিবু মপূং ফাহনবগীদমক মিনিষ্টারশিং, এম এল এশিং অমসুং পার্টিগী ৱার্করশিংবু চীফ মিনিষ্টারনা থাগৎপা ফোঙদোকখি। চীফ মিনিষ্টার এন বীরেন সিংহনা লুচিংদুনা থৌরম অদুদা শরুক য়াখিবা মিনিষ্টারশিং, এম এল এশিং অমসুং বিজেপি মণিপুর প্রদেশকী লুচিংবশিংনা মহাত্মা গান্ধী অমসুং লাল বাহাদুর শাস্ত্রিগী মফমদা হৈকৎ-লৈকৎ তমদুনা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু