image

নেসনেল গেমস মঙানি চনবা নুমিৎতা মণিপুরনা ফেন্সিং অমদি সাইক্লিংদা গোল্ড ২ য়াওনা মেদেল ৪ ফংখ্রে

ইম্ফাল, ওক্টোবর ০৩: গুজরাটনা য়ূম্বু ওইদুনা চত্থীরবা ৩৬ শুবা নেসনেল গেমসকী ঙসি মঙানি চনবা নুমিৎতা মণিপুরনা ফেন্সিং মশান্নদা গোল্ড ১ অদুগা সাইক্লিং মশান্নদা গোল্ড ১, সিলভার ১ অমদি ব্রোঞ্জ ১ পূন্না মেদেল ৪ ফংবা ঙমখ্রে। মণিপুরনা হৌজিক ফাওবদা গোল্ড, ১১, সিলভার ৪, ব্রোঞ্জ ৯ পুন্না মেদেল ২৪ ফংদুনা মেদেল টেলিগী ৭ শুবা মফমদা লৈরি।

ফেন্সিং মশান্নগী নুপীগী ফোইল টিম ইভেন্টকী ঙসি শান্নখিবা ফাইনেলদা মণিপুরনা কেরেলাবু মায়থীবা পীদুনা গোল্ড মেদেল ফঙবা ঙমখি। ইভেন্ট অসিগী ঙসি শান্নখিবা সেমীফাইনেলদা মণিপুরনা মধ্য প্রদেশপু মায়থীবা পীরমখিবনি। মণিপুর রিপ্রেজেন্ট তৌখিবা নুপী ফেন্সারশিং অদুদি ফমদোম অনিতা, লাইশ্রম খুস্বুরানী, ৱাইখোম সোনিয়া অমদি নাওরেম মিনানি।

অমরোমদা, সাইক্লিং মশান্নগী ঙসি নিউ দিল্লীগী ইন্দিরা গান্ধী ভেলোদ্রোমদা পাঙথোকখিবা তোঙান-তোঙানবা ইভেন্ট অহুমদা মণিপুরনা গোল্ড ১, সিলভার ১ অমদি ব্রোঞ্জ ১ ফঙবা ঙমখি। এল রোনাল্ডো, য়াংলেম রোজিত, কৈথেল্লাকপম জেমস অমদি টি চিংলেনসনানা নুপাগী মিটার ৭৫০গী স্প্রিন্ট টিম ইভেন্টতা গোল্ড মেদেল ফংবা ঙমখিবনি। চপ মান্নবা ইভেন্টকী নুপীগী কাঙলূপ্তা ময়াংলম্বম সোনালি, য়ুম্নাম থাজ অমদি তোংব্রম মোনোরামানা সিলভার মেদেল ফংখি। খোইরোম রেজিয়ানা ওমনিয়ম রেসতসু ব্রোঞ্জ মেদেল অমা ফংবা ঙমখি।

অমরোমদা, ফুটবোল মশান্নগী নুপীগী ঙসি শান্নখিবা মেটচতা মণিপুরনা গোৱাবু ৪-০ দা মায়থীবা পীখ্রে। রিনা রোইনা অহানবা হাফ লোইরমদাই শান্নবগী ৪৪ শুবা মিনিটতা মণিপুরগী অহানবা গোল চনবা ঙমখি। প্রমেশ্বরী, বালা অমদি রোজানা অনীশুবা হাফকী শান্নবগী ৬৫, ৭৫ অমদি ৮৬ শুবা মিনিটতা মণিপুরগী মায় পাকপগী ২ শুবা, ৩ শুবা অমদি ৪ শুবা গোল চনবা ঙমখি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু