বাংলাদেশ মণিপুরী সাহিত্য সংসদ (বামসাস)কী ৪৮ শুবা চহীগী মীফম অমসুং অ্যাওয়ার্ড পিবগী থৌরম পাংথোকখ্রে
সিলেট, ডিসেম্বর ৩ : বাংলাদেশতা মণিপুরী লোল অমদি সাহিত্য চাওখৎনবা হোৎনবদা হৌখিবা চহী ৪৮ চুপ্পা থৌদাং চাওনা লৌদুনা লাক্লিবা বাংলাদেশ মণিপুরী সাহিত্য সংসদ (বামসাস)কী ৪৮ শুবা চহীগী মীফম হৌখিবা ১ ডিসেম্বর ২০২৩ ইরাই নুমিৎতা সিলেট সিটিগী ইষ্ট জিন্দাবাজারদা লৈবা হোটেল গোল্ডেন সিটিদা পাংথোকখ্রে। সেশন অহুম থোক্না পাংথোকখিবা নোংমগী ওইবা থৌরমদুদা বামসাসকী চহীগী মীফম পাংথোকপগী থৌরমগা লোয়ননা অ্যাওয়ার্ড লান্থোকপা অমদি শক্নাইরবা অইবা অমসুং কবি এ কে শেরামগী ৱারীমচাগী লাইরিক 'নুমিদাংৱাইরমগী চিগোংলৈ' মায়খুম হাংবগী থৌরমসু পাংথোকখি।
অহান্বা সেশনদা, বামসাসকী জেনারেল সেক্রেটারী নামব্রম শংকরনা থৌরম মপু অমসুং কেএইচ সমেন্দ্র সিংহনা কন্ডাক্ট তৌখিবা অইবা এ কে শেরামগী অনিসুবা ৱারীমচাগী লাইরিক 'নুমিদাংৱাইরমগী চিগোংলৈ' মায়খুম হাংদোকপগী থৌরম পাংথোকখি। বাংলাদেশ বেতার(রেডিও) সিলেট কেন্দ্রগী শৈশকপা ফানজৌবম ভাগ্যনা শৈহৌ ঈশৈ শক্তুনা থৌরম হৌদোকখি অমসুং নৈনরোয় ওইনা মণিপুরী সাহিত্য পরিষদ, ত্রিপুরাগী এক্স-জেনারেল সেক্রেটারী শক্নাইরবা অইবা ওজা এল বীরমঙ্গল, কবি অমসুং অইবা খোইরোম ইন্দ্রজিৎ, সাহিত্য একাডেমী নিউদিল্লীগী মণিপুরী ল্যাঙ্গুয়েজ এডভাইজারী বোর্ড মেম্বার খোইস্নাম ওংবী বিরলা, কবি শেরাম নিরঞ্জন অমদি অহৈবম রণজিত না লাইরিক অদুগী মতাংদা নৈনা চেরোল পাথোকখি। লোয়ননা অইবা এ কে শেরামসু লাইরিক অদুগী মতাংদা ৱারোল থমখি।
এ কে শেরামগী ৱারীমচাগী লাইরিক 'নুমিদাংৱাইরমগী চিগোংলৈ' মায়খুম হাংদোকপগী থৌরম
অনিসুবা সেশনদা শৈরেং শৈদিন্নবগী থৌরম পাংথোকখি। ত্রিপুরাগী কবি এল মিনা দেবীনা গেষ্ট ওব ওনার অমসুং থোকচোম ওংবী কৈনাহন দেবী অমদি রৌশন আরা বাঁশীনা মোডারেটর ওইদুনা পাংথোকখিবা থৌরম অদুদা মণি অবুজম, হামোম প্রবিত, সমেন্দ্র সিংহ, খোইরোম ইন্দ্রজিৎ, পি মিনতী দেবী, খোইস্নাম মংগল, খোইস্নাম ওংবী বিরলা, অৱাংতাবম সমরেন্দ্র, কায়েনপাইবম বৃন্দা, এম উত্তম সিংহ রতন শৈরেং পাবদা শরুক য়াখি।
অহৈবম রণজিৎতা 'ই রবিন মেমোরিয়াল অ্যাওয়ার্ড- ২০২৩' খুৎশিন্নবা
অহুম সুবগী সেশনদা অ্যাওয়ার্ড লান্থোকপগী থৌরম অদুদা বাংলাদেশ মণিপুরী সাহিত্য সংসদকী প্রেসিডেন্ট এ কে শেরামনা থৌরম মপু অমসুং অথোইবা মীথুং ওইনা এডভোকেট এস সি সিনহা, চেয়ারম্যান, নীলিমা-এস সি সিনহা, অখন্নবা মীথুং ওইনা এল বীরমঙ্গল, এক্স জেনারেল সেক্রেটারী, মণিপুরী সাহিত্য পরিষদ, ত্রিপুরা, খোইস্নাম মংগল, জেনারেল সেক্রেটারী, মণিপুরী লিটারারি এন্ড কালচারাল ফোরাম, ত্রিপুরা, এল ইবুংহাল সিংহ শ্যামল, জেনারেল সেক্রেটারী, মণিপুরী ভাষা গবেষণা ও উন্নয়ন সংস্থা, সিলেট শরুক য়াখি। অইবা অমসুং সোশ্যাল এক্টিভিস্ট অহৈবম রণজিৎ ( মৌলভীবাজার ডিষ্ট্রিক্ট, জুরী, ছোট ধামাই)দা ই রবিন মেমোরিয়াল অ্যাওয়ার্ড- ২০২৩ খুৎশিন্নখি। অ্যাওয়ার্ড অসিবু কৎপিরম্বা ই রবিনগী শম্লপ্পা পুন্সি ৱারী পাথোকখি কবি পি মিনতী দেবী অমদি অপর্ণা রানী সিনহা। পনবা য়াবদি, হন্দক্কী সোনামনি মেমোরিয়েল অ্যাওয়ার্ড ২০২৩ অসি কানাডাগী মন্ত্রিয়লদা লৈবা অইবা অমদি কবি হামোম প্রমোদতা পীরগনি হায়না লাউথোকখি অমসুং মহাক্না বাংলাদেশতা লাকপা মতমদা খুদোংচাবা নুমিৎ অমা লেপ্নরগা অ্যাওয়ার্ড অসি খুৎশিন্নগনি হায়খি।
0 কমেন্ট:
কমেন্ট তৌবিয়ু