• 743
• ৩রা ডিসেম্বর ২০২৩ ইং
• Share on:

পুন্সিগী ৱাহন্থোক থিরিবা শান্তিবুসু ঈখৌ লাংলিবা কবি তাহির সাজবমগী “অতিয়া নঙগুম্না” শৈরেং লাইরিক অসিদা মিৎয়েং অমা

লাইরিক্কী মমিং- অতিয়া নঙগুম্না(২০২১)

অইবাঃ তাহির সাজবম

অফোঙবাঃ ফিক্সন এন্দ পোইত্রি ক্লব, মণিপুর

লাইরিক্কী মমলঃ লূপা ২৫০/-

লাইরিক মখলঃ শৈরেং 

লমায় মশিং- ১২০

                                                                                  লাইরিক্কী মখূমঃ বিরেন্দ্রজিৎ নাওরেম

পুন্সিদা অরানবা খরা তৌরুরে খল্লবসু অরানবা খরদুনা পুন্সিবু লৈখা তানা চেন্থাদুনা মাংহনবদি মদু পোকপগী মহৈ য়ান্দবা হায়বদু ওইগনি। ঐখোয়না খঙলে মদুদি রামায়ন ইরম্লিবা বাল্মিকি রতনাকর কৌবা হুরানবা হায়বদু ওইরম্মি। অরানবদু শোয়রে খঙদুনা মদুবু চুম্থোকতুনা অচুম্বা অশেংবা লম্বীদা চৎপা ঙম্বা মহাক অদু লেপ্না থৌজাল ফংলবা মীওই ওই। পোলোইদা ঐখোয় মীওইবনা তান্নরিবসি ইংনা তাইবঙ মপুগী খূয়াদা লৈরাং লৈনম ওইনা তিনখিবদুনি। ৱারবা মিকুপশিংদা মপু মহাকপু নিংশিংবনা আশা অমদি পিরি হিংনিংবগী অমসুং নীংথিজরবা তাইবঙপানশে পেন্না য়েংজবগী তাঞ্জা অমা। লাইনিং লম্বেলদা হেন্না নকশিনবা মখলগী খুলান্থোকতা ইরকপা শৈরেংনি ‘পন্থুংগী লম্বীদা’

তাহির সাজবম কছারগী সিঙ্গেরবন্দ খুঙ্গংদা ১৯৬৪গী মার্চ ১৩দা তাইবঙ খোঙদারকখি। অপোকপগী মিংনা সাজবম সহাদৎ আলী কৌই অমসুং অপোকপীগী মিংনা কৈনৌময়ুম নজিমুন নেছা কৌই। অইবা অসি য়াম্না নৌরিঙৈ মতমদগী হৌনা খোরিলোলদা থৱায় লুপচদুনা লাকই। অঙাং ওইরিঙৈদগী হৌনা মপাবুংনা ইবা শৈরেং, ৱারেং পাদুনা হৌরকখি। গৌহাটি য়ুনিভর্সিতিদগী গ্রেজুয়েট পাস তৌরবা মতুংদা বেঙ্ককী থবক ফংখি অমসুং সেনিয়ার মেনেজর ওইদুনা লৈরি। অকাশবাণী শিলচরগী ঈশৈ ময়েক ইবা অমসুনি। মহাকনা ইবা শৈরেংশিং মণিপুর অমসুং মপান মনিপুরগী মরু ওইবা চেফোঙশিংদা খুদোল তমদুনা লাক্লি। মসিতসু নত্তনা অতোপ্পা লোলদা হন্দোকপা শৈরেং খরসু অতোপ্পা লোলগী চেফোঙ খরদা হাপখ্রে। সাহিত্য একাদেমী, নিউ দিল্লিনা শীনবা সাহিত্যগী থৌরম কয়াদসু শরুক য়াখ্রে। নহারোল খোরিরোল শীল্লুপ, লক্ষীপুরগী চেফোঙ ‘খোরিরোল’ গী  এদিটর ওইরম্মী। ফোঙখ্রবা লাইরিকশিংদি- ‘অমম্বা মরকসিদা (শৈরেং ১৯৯৮), লাক্কনি অমুক হন্না (শৈরেং, ২০১৮) মহাক্কী অনীশুবা লাইরিক অসিদা সাহিত্য সেবা সমিতি, ককচিংনা ‘ক্ষেত্রি নলিনি সাহিত্য মনা ২০২০’, ঈরমদম খোর্জৈ অপূনবা লূপ, মনিপুর হিয়াংলম ৱাবগাইনা ‘মাইবম ওংবী বিমোলা নীংশিং মনা ২০২০’ অমসুং নহারোল রাইটর্স ফোরম, আসাম বাশকান্দিনা ‘কবি খৈরুদ্দিন চৌধুরী সাহিত্য মনা ২০২১’ পীদুনা ইকায়খুম্নখি।

মীওইবনা খম থেংনা ৱারবা মতমদা অশেংবা মশক অমা থোক্লকতবা ঙমদে। মসিবুনি পুন্সিগী মশক হায়না লৌনরিবসিসু। অরোইবা পুংফমদুনা লাক্লবদা করিসু পুদনা হনখিগনি খঙলবসু তাইবঙ ময়া লাংদা থুদুনা পেন্নাইদনা লন থুম পৈশিন্নরি। করাম চাওনা ঈশাগীতা খন্দুনা অৱা অনা তারবশিংদা মতেং খরদং ফাওবা পাংনিংদবা মীওইসু লৈতবা নত্তে। পুন্না হিংমিন্নগদবনি খনবা পুন্সিবু নুংশিনা নিংবা তাইবঙসু লৈতবা নত্তে। অদুবু কল্লক খম্বন চাওবা, লন থুমদা মিকাবা, মশাগীতা খনবা, ঐ হীংলগা লোয়রে খনবা, মীগী মাংনবতা তৌরগা শেন্দোং লৈ খল্লবা মতমসিদা কবিনা ৱাহংশিং হংলি, থিরি অশেংবা লন হায়বদু কদায়দা লৈবগে হায়না অৱাবনা চরৈ ফীশেৎনরবা , নাপলনা মকে শেম্নরবা মীগী মশিংনা হেল্লক্লবা খুনাইদা। অসিগুম্বা য়েংলু য়েংলুবদা অৱাবগী মশক ওইরবা ফিভম অমদা করিবুনো হৈয়েং মতমদো লাক্লগা পুগদবসিবো হায়না থিরক্লি কবিনা। অদুনা ইরক্লি ‘অৱাবা’

পুন্সিনা ফমথরকই/ ইনাক্তা/ থাংথরদুনা/ লুম্লবা লূবাক অমা/ অদুগা/ হায়রকই/ খঞ্জহৌরো/ নঙগী পামজবশিং/ অসোম ৱাংমদা পুননবা।/ য়েংই ঐনা লূবাক মনুংদা/ থিজৈ লাঙতকননা/ অদুবু/ য়াওরমদ্রে অমত্তসু/ পুবা য়াবা…।/ (লাঃ ১)

পুন্সিদা অরানবা খরা তৌরুরে খল্লবসু অরানবা খরদুনা পুন্সিবু লৈখা তানা চেন্থাদুনা মাংহনবদি মদু পোকপগী মহৈ য়ান্দবা হায়বদু ওইগনি। ঐখোয়না খঙলে মদুদি রামায়ন ইরম্লিবা বাল্মিকি রতনাকর কৌবা হুরানবা হায়বদু ওইরম্মি। অরানবদু শোয়রে খঙদুনা মদুবু চুম্থোকতুনা অচুম্বা অশেংবা লম্বীদা চৎপা ঙম্বা মহাক অদু লেপ্না থৌজাল ফংলবা মীওই ওই। পোলোইদা ঐখোয় মীওইবনা তান্নরিবসি ইংনা তাইবঙ মপুগী খূয়াদা লৈরাং লৈনম ওইনা তিনখিবদুনি। ৱারবা মিকুপশিংদা মপু মহাকপু নিংশিংবনা আশা অমদি পিরি হিংনিংবগী অমসুং নীংথিজরবা তাইবঙপানশে পেন্না য়েংজবগী তাঞ্জা অমা। লাইনিং লম্বেলদা হেন্না নকশিনবা মখলগী খুলান্থোকতা ইরকপা শৈরেংনি ‘পন্থুংগী লম্বীদা’

“খল্লি ঐনা নুংতিগী/ লোইরবরা মপোকসে ঙসিনা/ অদুবু নহাক্কী থৌজাল লৈবনা/ উহনবী অমুকসু/ নীংথিবী অয়ুকপু…/ থৌগাই পাঙহৌদ্রবা ননাইনা/ চঙজরি ঙসি নফমদা/ লঙজখিবা পূম্বা ঙাকপিয়ু/ পন্থুংগী লম্বীদা পুবিয়ু।” (লাঃ ১৬)

তাইবঙবু শেম্বীবা মপু মহাক্কি খূৎশেমবু লিক্লাথক্কী লাইজগুম্না তনিক তনিক মিকুপ খরাগী মালংপান্দা হিংলিবা ঐখোয়না করম্না শৈথাদুনা মতিক মগুন শক শোনগনি! লোইনাইদ্রবা ঙমখৈ লৈত্রবা অসিমনি হায়বসু ঙমদ্রবা অদুগুমবা শক্তমদি অশৈবা লীশিংনা শৈথারবসু লোইবা খম্বা লৈরোই। মপুনা শেম্বীবা মালেম পৃথিবী অসিমক অখাং কনবী, চীং লেম্বী, নোল্লুকপি, থৌজাল হৈবী, পীনহৈবী লাইরেম্বী অমগী শক্তমদা শৈথারি কবিনা। তাইবঙ মপুনা শিন্নরিবা থৌদাংপু পরিং নাইনা পাংথোক্লিবা অতিয়ানা কুমশিং নাইনা মথৌ পাংলি। মালেম্না খাংলি অখাং কনবী মতৌ উৎলদুনা। অদুবু নোংমতা খোঞ্জেল থোকনা ৱাকৎপা লৈতে। অনীমক মথৌদাং পাংথোক্লি। অসিগুম্বা মথৌদাংবু পাংথোক্লিবা অতিয়াগুম্না মঙাল পীনিংই কবিসু। শিদয়াই ইরিক খিকনিংই নোংলিক ওইনা শৈরেংনা। অদুননি কবিনা হায়নিংলিবা মহাক্কি মিংথোল ওইরিবা শৈরেং অসিদা

‘অতিয়া নঙগুম্না’    

“অরোইবা ঙমখৈগী/ কনা লৈত্রবা লমদুদা/ খোঙফম চেৎনা লেপতুনা/ শেন্নবিরিবা ঐখোয়বু।/ নশকফাও লাকশিনবা ঙমদমখৈ/ কূপশিল্লি/ লৈচিলগী মপৈ- মপৈনা নঙবু/ অমুকসু/ অখাক- অরাও/ অকি শকপুনরবা নোংথাঙ/ লান্দারিবা/ শুমহৎয়াই পুরবা নরানয়াই।/ ...মোঙ-হাদবী অখাঙ কনবী/ কল্লকচৈ/ কল্লকচৈনে নঙবু/ ওইজনীংই নহাক্কুম/ অদুবু” (লাঃ ১৮)

খুঙ্গংশিংনা তপ্না তপ্না সহর ওল্লকপদা মীওইবনা হরাওনরি। মরমদি চাওখৎপগী মঙাল লাক্লে হায়না থাজনবা অমা লৈবনা। সহরশিংদনা কনক্রিক বিলদিংশিংনা চেক্কী ফক্লাংশিংনা অনৌবা মহৌশা শেম্লক্লি মফম খুদিংদা। মতম ফংনদে মী খূদিং চাওখৎ লম্বেলদা চৎনবা হোৎনবদা। অমগা অমগা হিদান্নরি মরেক মহাও থোকনা হিংনবা হোৎনবদা। হিংবগী ৱাহন্থোকতি মাংশিল্লকলি তপ্না তপ্না। খুঙ্গংগা সহরগা মরি লাপ্নরক্লি। মিংগৌ থাগৌ ফাওবা ইকাও কাওনরক্লে। থায়না চৎনরম্বা লম্বীদু অমনবনি কান্নদবনি খন্নরক্লি। থাজদে মীওবদি অরিবা মরুদগী অনৌবা ময়োল চোংই হায়বসি। নুংশিবগী ঈচেল অমদি চেল্লম্মি মতম অমা। মদু হৌজীক্কি মীরোলনা থায়নগী ৱানি হায়নরে। অরৈ লৈতা হংনরম্মি। অরৈবসু চামিন্নরম্মি। চাওখৎলবা হায়বদুরা ঙসিনা শম্বল ঙাক্তা ঙাইখ্রে। ষণজাবুংদা শঞ্জেন্নহাশিং ফাওবা উখিদ্রে ঙসিদি। লৌফমশিং ফাওবা তপ্না তপ্না মাংশিল্লকলি। পুম্নমক অসিবু করম শকলোন ওইরবনো হায়না নিংদোল পোম্লদুনা নুংঙাইতনা শোল্লী অশৈবনা মহাক্কী ‘অনৌবা মহৌশা’ হায়বসিদ অসুম্না “ শঞ্জেন্নহাশিং উখিদ্রে/ উখিদ্রে শন-ইরোই শঙ্গুলক্তা চাক্তারম্বা উরোকশিং/ মচীঞ্জাক থিরম্বা লাই-শগোলশিং/ মতম অমগী শঞ্জাবুং/ লৌবুক লমহাঙশিং/ থুপখ্রবদা মতমগী মোংফমদা।/ নমদুনা ফিজোল হোংবিখ্রবা/ নীংবা কায়রবা খুঙ্গংগী থম্মোয়দা করিবু ফাওরমগনি/ উরগা কায়থরবা মশক্তম্বু/ ৱাউথরবা মিংশেলদা/ মহৌশাগী। ”(লাঃ ২৩)

মপোক মপোক খুদিংদা পোকনফম লমদম লমনুংশি, পালেমগীনা খোইরি নাওফম তারিবা পনথৌগীনা য়ুম্লেপ চারা তম্লিবা অদুগুম্বা পালেম পন্থৌবু নাওকোল্লিবা লমদম পোকনফম লমদমদা হঞ্জিন হঞ্জিন পোকচদুনা ইমা মহাক্কি মতিক মগুনতবু শৈথাজগে হায়নরি অশৈবশিংনা, চৈজিংবা কনানা নুংশিনা। অদুবু অনৌবা মীরোলদা, ঙসি ঙসিমক থেংনরিবা ঐখোয় মশেল মরক্তা থাজনরক্তবা অমসুং মোলোম হেন্না লৈনরকপা লোয়ননা মীতোপ মীয়ানশিংনা শিংচেপ থাজিন্দুনা ওইরক্লিবা মনিপুর ইমাগী মরাইবক অসিগীদমক ৱাদবা ঙমদে কবিনা। লান্না থাজনরিবা, অরানবা পাউদা কাংলুপ ফুরুপ নাইদুনা নুংশিনদবগী ইচেল অমা চেনশিল্লক্লিবা অসিবু খুদিক্তা থিংদুনা পোকনফম ইমানা মিৎলু পিরাং পিফম নাইরিবা অসি কোকহন্নিংলি কবিনা তাহিরনা। ইমা নহাক্কি নচা ঐখোয় লৈরি হায়বসি মহাক্কি শৈরেং ‘লেপ্লি ইমাগীদমক’ অসিদা মপুং ফানা ফোংদোক্লি-

“চমথোকনবা য়াই/ পেন্নদবা খুদিং নোংমা।/ খন্নখিসি/ খন্নখিসিনে হান্না/ হোল্লক্লিবা নিংশাস্বর ফুইনা/ য়াঙশিল্লক্লিবা খোঙকাপ/ মিহুলগী।/ অসুম্না তৌরম্বরনে ইমাসিবু/ ঈরা হৌরবা ইমাগী মীৎস্না অনীনা/ কনাবুনো চীংনা য়েংলক্লিবা/ উমিন্নখিসি হান্না/ থেঙজিল্লক্লিবা মতমগী/ শুমাঙসিদা...” (লাঃ ৩৭)

পুকচেল চাওবা লুচিংবশিংনা মালেমসে অমত্তনি মীওইবা খুনাইসে অমত্তনি খল্লি। পুকচেল পিকপা লুচিংবা শাবা কয়ানদি মতোম মতোমতগী খল্লি। লৈবাক্কি খনবা মাল্লগা মশাগিতা খনদুনা থবক তৌই। মখোয় অদুনা মালেমসিদা লাঞ্জাও কয়া থোকহনখি। মীচম মীয়াম কয়া অরেম্বদা পুন্সি পিখম্নহনখি। অপুনবগী ৱারী শারুবদা হৌজীকসু অঙাওবা তাহল্লি। ঐখোয় থম্মোয় চাওথোকনসি হায়বদা য়াদবা মী লীশিং লীশিং লৈরি। মখোয়দুনা লান অদুম হৌদুনা লৈগনি। মীগী লন থুম মিকাদুনা লৈগনি। অদুবু লাইৱাগুম্লবা শৈরেংদি থিদবা য়াদে। লাইশোল ঈশৈসু তাহন্দবা য়াদে অমম্বদা য়াকাবূংদা চাকতারিবা মখোয়দদি। অদুনা মচিল থৌরবা অমসুং ইংনা মেংলবা ৱাহৈশিং অসি তপ্না হায়বা মথৌ তারক্লবা মতম ওইবনা কবিনা হায়রক্লি, ‘চৎমিন্নসি খুৎশম্ননা’ –“থম্নাথক্কী লাইজগুম/ তম্বা ঙমদবা মপোকসিদা/ করিগী হূ ফুম্নরিবা।/ ৱাখল পুকনিং থম্মোয় ঙম্নমক/ অফ-অপুন্নরিবা/ মিরাং মহুমদা থুরবা তীল কাঙগুম।/ লাকখিবা নৎত্রনে নোংমা/ অথোইবা মপোক অসিদা/ মতম খরগী মীথুং ওইনা/ মিনুংশিগী লৈ-পরেং পায়দুনা।/ অদুগা ঙসিনা করিগী/ য়াক্লবা হূগী মনম/ তেল্লবা পুন্সিগী ফম্বাকসিদা।/ ...মান্নবা পান্দমগী খোঙচৎসিদা/ করিগী নাইতোম তানগনি...অপূনবগী থৌনা লিংজেলদা/ কাখৎমিন্নরসি...” (লাঃ ৭৩)

নুংশিবা খুঙ্গংগী মপাঊ পুরবা শৈরেং, ইদকি য়াইফ পাউজেল অমসুং মালেমসে শান্তি পুরকপদা মীওইবা ঐখোয়না মীওইবগী ৱাখল খনবা মতম ওইরে হায়বনচিংবা ফজরবা শৈরেং কয়া লাইরিক অসিদা য়াওরি। শৈরেংবু নুংশিজবা পুম্নমকনা তাহিরগী শৈরেংশিং পাহঞ্জনিংই। পাঊজেল কয়ানি য়াওরিবা মহাক্কি শৈরেংদা।