বাংলাদেশকী মফম কয়াদা গুরুকীর্ত্তন পাঙথোকখ্রে
সিলেট, ডিসেম্বর ০৩ : সিলেট লৈবাক পঞ্চায়েতকী খ্বাইদগী চাওখ্রবা চহীখুদিংগী রোটেশন ওইনা পাঙথোকপা হন্দক চহীগী গুরুকীর্ত্তন হৌখিবা ডিসেম্বর তাং ২, থাংজ নুমিৎতা নোংমাইথেম লৈকাই (বড়বাজার মণিপুরীপাড়া) দা পাঙথোকখ্রে।
শ্রীশ্রী নরোত্তম দাস ঠাকুর মহাশয়গী নোঙ্গাখ্রবা নুমিৎকা মরি লৈননা য়ুম্নাম নৃপেন্দ্রসিংহগী লুচিং মখাদা নোংমাইথেম লৈকাইনা শিলাংদুনা শ্রীশ্রী জগন্নাথ জীউর মন্ডপতা নট সংকীর্ত্তনগী থৌরম গুরু কীর্ত্তন অসি পাঙথোকখিবনি।
পালা অনি থোক্না পাংথোকখিবা গুরুকীর্ত্তন অদুদা অহানবদা লৈপাক পঞ্চায়েতকী পালাদা ঈশৈদা ওজা এন. নব সিংহ, দোহারদা শ্রী দেব সিংহ, পুং দা শ্রী শামুঙৌ সিংহ অমসুং শ্রী অমৃত সিংহনা শরুক য়াখি। অনিশুবা মরুওইবা পালাদা বাংলাদেশকী মিং চৎলবা ঈশৈগী ওজা জয়চন্দ্র শর্ম্মা, দোহার শ্রী নিরোদ শর্ম্মা, পুংদা শ্রী কুলচন্দ্র শর্ম্মা, শ্রী শুভ্র শর্ম্মা, শ্রী অনিক সিংহ, শ্রী শায়ন সিংহ না শরুক য়ারদুনা মপুং ফানা লাইনিং থৌরম পাঙথোকখি। হায়রিবা নুমিৎ অসিদা শ্রীমঙ্গল রামনগর খুঞ্জাদসু গুরুকীর্ত্তন পাঙথোকখি।
0 কমেন্ট:
কমেন্ট তৌবিয়ু