আপডেট:
image

পুয়া মৈ থাখিবগী নীংশিং থৌরম পাঙথোকখ্রে

ইম্ফাল, জানুয়ারি ১৫: ঙসিদগী চহী ২৯৪ গী মমাংদা মতোপকী লাইনিং লাইশোল শন্দোকপা লাকখিবা শান্তিদাস গোসাইগী নমথাক লাংদা থুদুনা ঐখোয় মশেল নুংশি চান্ননা থকষি খাসি খঙনা লৈমিন্ননবা অমদি চৎনা লোনচৎ কয়া ঐখোয়গী ইয়েক্তা ইদুনা থম্লিবা পুয়া মৈ থাখিবা নুমিৎ অদু কংলৈপাক্কী ওইনদি খ্বাইদগী হেন্না লাইবকথিবা নুমিৎনি হায়ান হিয়াংলম এসিগী এম এল এ ডা. ৱাই রাধেশ্যামনা ফোঙদোকখ্রে।

ইন্টারনেসনেল ওবর্জাবেসন কম্মিটি ওফ পুয়া মৈ থাবা (ইকোপ) না শিন্দুনা ঙসি এলাংখাঙপোকপীদা পাঙথোকখিবা কংলাদা পুয়া মৈ থাখিবগী ৪৩ শুবা নীংশিং থৌরম ওইনা পাঙথোকখিবা থৌরমদা অথোইবা মীথুংলেনগী ৱারোল পীরদুনা এম এল এ রাধেশ্যামনা ৱাফম অসি ফোঙদোকখিবনি।

থৌরম অদুদা ৱা ঙাঙলদুনা মহাক্না মখা তানা ফোঙদোকখিবদা ঐখোয়গী পুৱারীবু ইদুনা থম্লম্বা কয়া ঙসিদগী চহী ২৯৪গী মমাং ৱাকচিংগী ২৩ নি পানবা ঙসিগী নুমিৎ অসিদা মৈ থাদুনা মাঙহনখিবনি। শান্তিদাস গোসাইনা মীতোপকী লাইনিং শন্দোক্নবা হোৎনবদা ঐখোয়গী হান্না লৈজরম্বা লাইনিংবু মাঙহন্দ্রবদি য়ারোই খংবদগী পুয়া মৈ থানবা মতমদুগী নিংথৌদা ইনশিনখি।

শান্তিদাস গোসাইনা থমাইখ্রবা নিংথৌ অদুনা তুংগী মীরোলগীদমক খন্থবা তৌদনা য়ুমথোং খুদিংদগী পুয়া খোমগত্তুনা অশিবা মীওই অমা পোৎলোয়বগী মওংগা চপ মান্ননা মৈ থাখি।অসুমনা লাইনিং লাইশোল মুত্থৎখিবা, য়েক সলাই মফম খঙহনখিদবা লাইবক থিবা থৌদোক অদুবু ঐখোয়না কাউফম থোক্তে। ঐখোয়না ঐখোয়গী হান্না লৈজরম্বা চৎনবী অদু অমুক হন্না চৎনবা হোৎনগদবনি হায়বা পান্দমদা ঙসিগী থৌরম অসি পাঙথোকপনি হায়না লৌই হায়খি।

ইকোপকী ভাইস চেয়ারম্যান মোইরাংথেম নাওদালেনখোম্বনা থৌরম মপু ওইদুনা পাঙথোকখিবা থৌরম অদুদা মীলালগী প্রেসিদেন্ট কে ঐচ ইঙোচা মীতৈ, ইকোপকী কনভিনার মোরাইথেম নাওখম্বা মীতৈ, দিবলপমেন্ট য়ুথ এসোসিয়েসনগী প্রেসিদেন্ট ৱাংখৈময়ুম শরত, এলাংকাঙপোকপী য়ুথ ক্লাবগী প্রেসিদেন্ট পি ঐচ গুনচন্দ্র, এ এম আর পি এস দব্লিয়ু এগী প্রেসিদেন্ট দোরেন খা ঙানবা, য়ুনাইটেদ মণিপুর মুস্লিম উইমেন দিবলপমেন্ট ওর্গানাইজেশনগী প্রেসিদেন্ট আনোয়ারী নুরজাহান, লাইনিংহল নাউরিয়া ফুলো চেরিটেবল ট্রাষ্টকী ট্রেজারার থোকচোম কুবের, সোইবম লৈকায় সিটিজেন ক্লাবকী প্রেসিদেন্ট মহেন্দ্র মীতৈ, ৱাইখোঙ জিপিগী প্রধান ৱাংখেম ব্রোজেন অমসুং রিটায়ার্দ প্রিন্সিপাল উরিখিনবম কুঞ্জো মীতৈনা অখন্নবা লেংবীরকপশিং ওইনা শরুক য়াখি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু