নোংচুপ হারম মণিপুরী অশৈলূপনা অইবা অইবী অনীদা মনা লান্থোকখে
আগরতলা, আগষ্ট ১০ : নোংচুপ হারম মণিপুরী অশৈলূপ, শিলচরগী চহীগী অখন্নবা মীফমলেন পাঙথোকপগা লোয়ননা শক্নাইরবা অইবা অইবী অনী মোইরেংজম দেব (সুব্রাম) দা 'নোংচুপ হারম থৱান মৈরা' অমসুং নীনা দেবীদা 'নোংচুপ হারম কজেংলৈ' মনা পীদুনা ইকাইখুম্নখে।
চৎখিবা আগষ্ট তাং ২, শিলচর রংপুরদা পাঙথোকখিবা থৌরম অদু লূপগী প্রেসিডেন্ট আই এস থিংগোমনা মীফম মপু ওইরগা মীথুংলেন ওইনা সাহিত্য একাডেমি নিউ দিল্লী মণিপুরী বোর্ড মেম্বর ড. কে.এন চান্দ অমসুং মীথুংশিং ওইনা মণিপুরী সাহিত্য পরিষদ আসামগী হান্নগী প্রেসিডেন্ট ঙাঙোম জয়কুমার সিংহ, শক্নাইরবা অইবা ইঙুদম সতীশচন্দ্র সিংহ অমসুং কলা একাডেমি আসামগী হান্নগী প্রেসিডেন্ট এস কামিনী দেবী শরুক য়াখি। লূপকী ভাইস প্রেসিডেন্ট লাইরেল্লাকপম চম্পালালনা ওক্না ৱারোল অদুগা লুপকী জেনারেল সেক্রেটারী নাওরেম রাজেননা নুংগী ওইবা ৱারোল ফোঙদোকখি।থৌরম অদুদা 'শমজিরৈ' (মেগাজিন) অমসুং লৈখিদ্রবা ইরুংবম চন্দ্র সিংহগী শল্পপ্পা পুন্সি ৱারী (২শুবা খুৎনম) লাইরিক অমসু ফোঙখি। শমজিরৈগী এডিটর ড. কুঞ্জলাল য়েন্দ্রেম্বমনা ইরুংবম চন্দ্র সিংগী মরমদা অখন্ননা ৱা ঙাংখি।
থৌরম অদুদা আসাম য়ুনিভার্সিটি গী ডিন প্রো. এইচ ননী, এইচওডি প্রো. কেএইচ ধীরেন, সাহিত্য পরিষদকী ভিপি কে স্বপন, ষ্টেট এৱার্ডি এন মনিহার নচিংবা শক্লাইরবা মীওই শিংনা মরী লৈননা ৱা ঙাংখি হায়রি।
সোর্স : মরূপ
0 কমেন্ট:
কমেন্ট তৌবিয়ু