'মণিপুরী শৈরেং নুমিৎ'কা মরি লৈননা পূক্নিংগী ৱারোল খরা - -বিরেন্দ্রজিৎ নাউরেম
ওইহনসি ঐখোয় পূম্নমক্কী শৈরেংগী নুমিৎ
'' করিগী ঙমলোইদগে লৈ পরেংনবু তৎত্রবদি''
বিরেন্দ্রজিৎ নাউরেম
কাঙ মপাল, চরোৎ মপাল, য়েন্থৌ মপাল মপালশিংনা মঙক নোম্ল-নোম্লদুনা মেরা থাবু তরাম্না ওক্লক্লে। মণিপুরী শৈরেংগী নুমিৎসু নুংঙোল্লবা মেরা থানিলগী ফিজি পায়রদুনা খোঙদোই হুল্লক্লে। কনানা ওক্লুগনি শৈরেংবু খোয়দাজবা ঐখোয়না ওকচবা নৎতনা। নুংঙাইবগী ঈথক হৌরকই থম্মোয় লকানুংসিদা অদুবু হেন্না হেন্না ঈথক ইপোম নাইরমগদবা অদুমদি ইরমদম অসিগী তংদু লৈতাদবা, হয়েংনা করি হায়বগী তম্বা ঙমদবা ফিভম অসিনা খামজিনবিখ্রে।
শৈরেংবু নুংশিনা লাৎচবনি ঐসু, শৈরেংগী নুমিৎসিদা পানিংলকই খোয়দানা ইজবা শৈরেং ফক্লাং মরীনা কোইশিনবা কাগী ফম্বাক্তগী কুমথরগা লোইজিং লোইয়া, চীংয়া তময়াদা থানিল থাজগা য়াৱা ৱাচানদুনা। পানিংলকই তরেংয়োৎ শারবা ফৌবালশিংগী ঈংনা নুংশিবা মনমদা থম্মোয়গী থোঙ মকা লাম্না হাংদোক্লদুনা। পানিংলকই ৱাখলগী শম্বল খাজিন্নদ্রিবা নৌরিবা অঙাংশিগী মরক্তা ফম্লদুনা। পানিংলকই লূকমাই মাঙদা থম্লদুনা পুন্সি লান্থেং মায়োক্নরিবী ইমাশিংগী মরক্তা। পানিংলকই মৈনম মৈরা পায়দুনা অমম্বা মরক্তা মচাশিংগীদমক মঙালবু থিজরিবী, মতমগী নোংলৈনা পুখিবা ঙমদ্রবী মমা ওইবীশিংগী মরক্তা।
মণিপুরী শৈরেংগী নুমিৎনা পোক্লকখিবা চহী তরা মপূং ফারক্লে, কাংদোং ফারকপা য়াম্না নুংশিবা মতম্নি। শৈরেং ইরিবা, শৈরেংবু নুংশিবা খরদংগী নুংশি মীৎয়েংনা ঙাক শেন্দুনা লৈববুদি মীয়ামগী নুংশিবনা ঙাক শেন্দুনা হেন্না মপূং মরৈ ফারকপদু উনিংলকই। খোরিরোলগী লূপ পূম্নক খূৎশম্নদুনা শীনমিন্নবা মণিপুরী শৈরেংগী অচৌবা কুহ্মৈ উনিংলকই। মহৈরোইশিংনা মাগী মাগী মহৈশঙশিংদা শৈরেংগীদমক চেন চোংবা, হরাও নুংঙাইবা ফোঙদোক্নবা উনিংলকই। লম্বী লমজাওদা, লৈরক কোনশাংদা, কৈথেল কৈথেলদা কবিশিংগী শক্তমগা লোয়ননা মখোয়গী নমথোক্লবা শৈরেং থেৎপা য়েংনিংলকই। লৈঙাক্না অমদি লন্নাই পুথোকপা কেলেন্দরশিংদা শৈরেংগী নুমিৎ থাবা য়েংনিংলকই।
খল্লুরিবা পূম্নকসে শৈরেং ইরুবগীনি, শৈরেংবু নুংশিজরুবগীনি। ঐখোয়না নুংশিজবা খোয়দাজবা শৈরেং অসিগীদমক তৌমিন্নগদবা থবক্তি য়াম্না ৱাৎলি, মণিপুরী শৈরেং মতীক মঙল লৈনা চীংলোন ৱাংমা লানখিবা ঙমদ্রি। শৈরেং ইনরিবা ঐখোয়গী খোঙচৎ সাহিত্য অকাদেমি মনা ফংবদা লোইরবগুম লৈরি, ঐগী হেনজিনবা মীৎয়েং ওইবসু য়াই। হায়নৈ, ঐখোয়গী পোৎথোকশিং অতৈ লোন্দা হন্দোকপিনবা মী ৱাৎলি। খরা পৌনা য়েংলগবুদি ৱাফম অসি লান্দে হায়না খল্লগসু কূপথনা য়েংলুরগদি মপূং ফাবা ৱাৎলি মরমদি ঐখোয়গী শৈরেংনা মতীক মঙন লৈরবদি হন্দোকপিয়ু হায়জরুদ্রবসু হন্দোকপিনবা মী শোয়দনা থোক্লক্কনি। খুদম ওইনা ইরাবতকী, সমরেন্দ্রগী, নীলকান্তগী, ইবোপিশক্কী, ইবোমচাগী অতোপ্পা লোন্দা হন্দোক্তুনা ফোংলিবা অসি মখোয়না কনাদসু হন্দোকপিয়ু হায়রমদবা য়াই। মখোয়না ইরিবা অদুগুম নৎত্রগা মদুদগী হেন্না ফজবা মওংদা ঐখোয়না ঙসি ইবা ঙম্লব্রা হায়বসি শৈরেংগী নুমিৎতা নৈনরগা য়েংবসু নুংঙাইগনি। হোয়, খরা চৎনবা য়ারবা শৈরেং খনগৎলগা মণিপুরগী মপান্দা য়ৌহনখিবসু কান্নদবদি ওইরোই। মসিগুম্বা থবক্তুদি শৈরেংদা লূপশীন্দুনা লৈবিরবা ফিক্সন এন্দ পোইত্রি ক্লব কুম্বনা থৌদাং লৌবীরগা তৌবিবা য়াই।
শৈরেং ইরিবা ঐখোয়নসু শৈরেংবু মমল হোংদোকহন্দনা লমসিদা চঙশীনবা চঙই, শৈরেং লাইরিক খরা ফোঙলগা পেন্থোক্নবগুম তৌরি।
পীক্লবা চীংলৈবাক অসিদা অইবগী মশীং য়ামজবসু নৎতবা অসিদা মণিপুরী শৈরেংগী নুমিৎ অমা লৈহন্নবা হোৎনরকপা হায়বসি তরাইবা ওইরোই, নুমিৎ অসিগী মমল খঙনা পুকচেল শেংনা শৈরেংদা ঐখোয় পুকচেল শেংনা লূপশীনমিন্নবা চঙলি। অমরোমদা শৈরেংবু চপ চানা খঙবা তশেং তশেংবা ক্রিতিক মরাংকায়না থোক্লকপগী তঙাইফদবসু লৈরি। লাইরিক ফোঙবা নুমিৎতা ঙাংবা ৱাফম খরা অদুনা ইজরিবা অইবা অদুগী মরাইবক লেপ্পগী চৎনবী অমা লৈরকপা ফনা কুইরক্লে। চৎনবী অসি হোংদোকপা ঙমদ্রবদি কবি য়ুম্লেম্বম ইবোমচাগী লোন্দা "মণিপুরী শৈরেং শুম শুম পাকথোরক্লে ৱাংবদি শুকৱাং ৱাংখৎলক্তে" হাবসিদা অদুম লৈখিনি। লাইরিক ফোঙখ্রবা মতুং ক্রিতিক অমা অনিনা লাইরিক অদুগী অফ-ফৎত চপ চানা নৈনবিরদি মাঙলোমদা হেন্না চৎখৎলক্কনি খল্লি। শৈরেংগী নুমিৎনা অসুম অসুম মপূং মরৈ ফারকপগা লোয়ননা মণিপুরী শৈরেংসু অসুম অসুম ৱাংখৎলক্লবদি য়াম্না নুংঙাইগনি।
ঐখোয়গী হৈনবী অমা লৈ। অমগী ৱাদা অমনা ইন্দবা, অমগী থবক্তা অমনা শৌগৎতবা। খোরিরোলগী ওইনদি হৈনবী অসি হোংদোকপগী তঙাইফদবা লৈ। মণিপুরী শৈরেংগী নুমিৎ, মেরা থানিলগী ফজবদা লূপ্লিবা অইবা খুদিংমক্তা নুঙোল্লবা নুমিৎ অসি ঐখোয়গী শৈরেংগী নুমিৎনি খলহনবা তাই। মসিগী মায়পুনবা থৌদাং লৌবীগদবদি শীনবী লাংবীরিবশিংনি। অইবশিংগী অপূনবগী শক্তম অমা শাগৎতুনা মণিপুরী শৈরেং নুমিৎ লৈবাক মীয়ামগী ওইহনবা হায়বসি থৌবু ওইরিবা মখোয়গী হৈথোই শিংথোইবদা লৈরে। ঐখোয়নসু ঐগী, মাগী, নঙগী হায়বা ৱাখল্লোনগী শম্বল খাজিন্নদনা পূন্না হোৎনমিন্নরবদি অপূনবগী নুমিৎ অদুমক শোয়দনা লাক্কনি, লাকপসু ওইসনু।
ঐখোয় ইসি, ইমিন্নসি, পাসি, পামিন্নসি। ইরাবত, চাউবা, কমল, অঙাংহল, নবদ্বিপচন্দ্রা, মিনকেতন, দরেন্দ্রজিৎ, ময়ুরধ্বজ, সুরেন্দ্রজিৎ, নদিয়াচান্দনচিং লাইওইখ্রবা মখোয়না শেম্বীরকপা অনৌবা মণিপুরী শৈরেংগী লীক্লমদা খুদুং ইল্লকপা ঐখোয়গী শৈরেংসু নোংমদি মরেপ ৱাংখৎলকসনু, চীংলোন ৱাংমদসু মতীক মঙনগা লোয়ননা য়ৌখিসনু। থম্মোয়গী মরলবু থম্মোয়দা শিন্নরিবা শৈরেং খোরিরোলগী মচল পুম্নমক্তগী অথোইবনি, মমল অসি খঙনা ঐখোয় ইমিন্নসি। ঙাওমিন্নগুমসি; মীৎনা উবা লৈশক্তা ঙাওমিন্নসি শকউদবা লৈনমদা। মণিপুরী শৈরেংগী নুমিৎ য়াইফরসনু। "
— বিরেন্দ্রজিৎ নাউরেম, সেপ্টেম্বর ১৯, ১৯৫৯ দা শিংজমৈ মখা খা নাউরেম লৈকায়দা পোকই। এডাল্ট এডুকেসন ডিপার্টমেন্টতা আর্টিস্ট ওইনা থবক তৌরম্মী। মনিপুরগী শক্নায়রবা কবিনি। শৈরেংগী লাইরিক মাপল ফৌঙখিবগা লোয়লনা খোমজিনবা লাইরিক অহুমসু এদিত তৌখ্রে। ফিক্সন এন্ড পোইট্রি ক্লাব, মনিপুরনা পীবা মহাকবি অঙাঙহল শৈরেং মনা—২০২০ ফঙখ্রবা কবি অসি সাহিত্য অকাদেমী, মণিপুর স্তেত এর্ৱাদ ফোর লিটরেচর য়াওনা তোঙান তোঙানবা সাহিত্যগী মনা কয়াসু ফঙখ্রে।
0 কমেন্ট:
কমেন্ট তৌবিয়ু