নিপানলক মিস্তর ৱার্ল্ড তাইতল ফংখ্রবা বোবিদা প্রেসিদেন্সিএল গোল্ড ওর্দর এৱার্দ পীরক্লে
ইম্ফাল, আগস্ত ১৪ : বোদি বিল্ডিং মশান্নদা থোইদোক হেন্দোক্না মশক থোকপা পারফোর্মেন্স উত্তুনা অমসুং মশান্না অসিদা কত্থোকপগীদমক ৱার্ল্ড বোদি বিল্ডিং এন্দ ফিজিক স্পোর্তস ফেদরেসন (দব্লিউ বি পি এফ) না নিপানলক ৱার্ল্ড চেম্পিয়নগী তাইতল ফংখ্রবা মিস্তর অরাম্বম বোবিদা ইহান হানবা ওইনা প্রেসিদেন্সিএল গোল্ড ওর্দর এৱার্দ পীরক্তুনা ইকায়খুম্নবা উৎলকখ্রে।
পাউ-চে অসিগা অখন্ননা উনবদা ৱার্ল্ড চেম্পিয়ন নিপানলক তাইতল লৌরকখ্রবা অরাম্বম বোবিনা হায়, ৱার্ল্ড বোদি বিল্ডিং এন্দ ফিজিক স্পোর্তস ফেদরেসন্না পৃথিবীগী ওইনা অহানবা এৱার্দ অসি পীরকপদা বোদি বিল্ডিং মশান্নদা কত্থোকপগা লোয়ননা শান্নরম্বা অদুগী মহৈ খরদি ফংবা ঙম্লে। মহাক্না মখা তারদুনা ইং ১৯৯৫ দা ক্যামগৈদগী লাইওইখ্রবা খোইরোম য়াইস্কুলগী মখাদা বোদি বিল্ডিং মশান্নদা চঙলক্তুনা ২০১৯ ফাওবগী চহী ৩০গী জর্নি অসিদা চহী অমা ফাওবা লেপ্তন নেসনেল, ইন্টারনেসনেল অমদি স্তেতকী ওইবা তোঙান তোঙানবা কন্তেস্তশিংদা শরুক য়াদুনা লাকখি।
হায়রিবা চহী ১৯৯৫ অসিদা ইহান হানবা ওইনা মিস্তর মণিপুর কন্তেস্ততা শরুক য়াবদা ওভরওল জুনিয়র তাইতল লৌবা ঙমখিবগা লোয়ননা থংনবা চহীদা সেনিয়র ওভরওল তাইতলসু লৌবা ঙমখি। নেসনেলগী থাক্তা মিস্তর ইন্দিয়াগী তাইতল য়াওনা পূন্না মেদল ২৯ লৌবা ঙমখি। লোয়ননা রেলওয়েদা চহী ২৩ চূপ্না থবক তৌরক্তুনা মশান্না অসিগী কম্পিতিসনশিংদা মেদল ২২ অমসু ফংবা ঙমখি। মসিগী মথক্তা সাউথ এসিয়ান চেম্পিয়নশিপ্তা গোল্ড মেদল য়াওনা ওভরওল চেম্পিয়নশিপ তাইতল লৌখিবগা লোয়ননা এসিয়ান চেম্পিয়নশিপ তাইতল লৌখিবগা লোয়ননা এসিয়ান চেম্পিয়নশিপ্তা তরেৎলক চেম্পিয়ন ওইবা ঙমখি।
অরাম্বম বোবি
২০১০ দা সাওদর্ন রেলওয়ে কোলকাতাগী নোর্থইস্ত ফ্রন্তিয়ার রেলওয়ে অসামদা পোস্তিং লাক্তুনা বোদি বিল্ডিং মশান্নদা মখা তানা অকনবা প্রেক্তিস চত্থদুনা লাকপনা ২০১৯ ফাওবদা ৱার্ল্ড চেম্পিয়নশিপ্তা শরুক য়াবদা চেম্পিয়ন নিপানলক ওইবা ঙমখিবগা লোয়ননা সিলভর মেদল ১ লোয়ননা ব্রোঞ্জ মেদল ১ ফংখি। বোবিনা বোদি বিল্ডিং মশান্নদা চঙদ্রিঙৈদা ১৯৮৫ দা সাইদা লৈদুনা জিম্নাস্তিক মশান্নদগী শান্নবগী অহানবা খোঙথাং হৌরদুনা এথলেতিক মশান্নদা অমুক হন্না খোঙ থাংজিন্দুনা মেন্স সেনিয়র তু হন্দ্রেদ রেসতা গোল্ড মেদল ফংবা ঙমখি।
মহাক্না মখা তারদুনা, ঙসি পৃথিবীগী খ্বাইদগী চাউবা ফেদরেসন অমা ওইরিবা ৱার্ল্ড বোদি বিল্ডিং এন্দ ফিজিক স্পোর্তস ফেদরেসন্না ঐহাক্কী শাংলবা চহী ৩০ গী জর্নি অসিদা মশান্না অসিদা মশক থোক্না নেসনেল, ইন্তরনেসনেলগী এরেনাদা পারফোর্মেন্স পীবা ঙমখিবা অদুনা লেমজনিংঙাই ওইরবা প্রেসিদেন্সি গোল্ড ওর্দর এৱার্দ অসি পীরকখিবনি।
বোদি বিল্ডিং মশান্না অসি মণিপুরগী লৈহাওগা য়াম্না চানবা, ঐখোয়গী লূ-তোংদা য়াওরক্লবা ইভেন্ত অমনি। হায়রিবা মশান্না অসি লমদম অসিদা অমদি ইন্দিয়াগী কন্তেক্সতা অতোপ্পা লৈবাকশিংগা য়েংনবদা মশীং য়াম্না শান্নবা অমসুং অফবা শান্নরোয়শিং পুথোকপা ঙম্লি। অদুবু হায়রিবা মশান্না অসি পৈশা য়াম্না চঙবা অমদি মহাক্কী দাইতনচিংবদা য়াম্না চাউনা দিপেন্দ তৌবনা মরম ওইরগা হৌগৎলক্লিবা বোদি বিল্ডর পুম্নমক্তা গবর্নমেন্তকী মায়কৈদগী সপোর্ত পীবিরবদি হৌজিক লৈরিবা মণিপুরগী বোদি বিল্ডিংগী ফিভম অসি হেন্না ফগৎপা ঙমগনি হায়খি।
সোর্স: পোক্নফম
0 কমেন্ট:
কমেন্ট তৌবিয়ু