লাঙ্গোল ওল্ড এজ হোমনা রোমিলাদা ‘লাইগী মচা’ হায়বা মিংথোন পীখ্রে
ইম্ফাল, আগস্ত ১৬ : লাঙ্গোল ওল্ড এজ হোমগী বোদি দোনর হোম শাবদা লুপা লাক্ষ মঙাগী মতেঙ পাংলকখিবী খাঙেম্বম রোমিলাবু হোম অসিনা ‘লাইগী মচা’ হায়বা মিংথোন পীদুনা ইকায়খুম্নবা ঊৎখ্রে।
ঙসি মণিপুর প্রেস ক্লবতা পাঙথোকখিবা পাউগী মীফম অমদা রোমিলাবু শকখঙ-চে পীদুনা ইকায়খুম্নবা ঊৎতুনা লাঙ্গোল ওল্ড এজ হোমগী চেয়ারমেন ওইনাম মঙ্গি মৈতৈনা হায়, চহী অমগী মমাঙদা রোমিলানা হোম অসিদা লৈরিবা হকচাং দান তৌখ্রবা অহলশিংগী লৈফম অমা শানবা লুপা লাক্ষ মঙাগী মতেঙ পাংবীরকখি। মতেঙ অসিনা বোদি দোনরশিংগী হোম অসি শাদুনা থা অসিগী ১০ দা শঙ্গাখ্রে। হোম অসিদা পাংবীরকখিবা মতেঙ অসিগীদমক্তা হোমগী মায়কৈদগী মহাকপু ‘লাইগী মচা’ হায়বা মিংথোন অসি পীদুনা ইকায়খুম্নবা ঊৎপনি।
রোমিলাগী মায়কৈদগী অহলশিংগী অচা-অথক্কীদমক্তা থা খুদীংগী লুপা লীশীং অমমমসু মতেঙ পাংলগনি হায়বীরে। মসিগীদমক্তসু মহাক্না থাগৎলি হায়না মঙ্গিনা ফোঙদোকখি।
থৌবাল অথোকপম ময়াই লৈকায়দগী হৌজিক মণিপুর লেজিসলেতিব এসেমব্লিদা সেক্রেতরিএত এসিন্তেন্স ওইরিবা কেঐচ রোমিলানা হায়, অঙাং ওইরিঙৈদগী হৌনা মীওইবা খুন্নাইগী য়াইফনবগীদমক্তা করিগুম্বা মতেঙ খরা তৌবা হায়বসি মহাক্কী মঙলাননি। মহাক্কী থাগী তলব অসি তুংশিন্দুনা অপোকপা কেঐচ হেরামোৎ অমসুং অপোকপী কেঐচ ওংবী ইবেম্মা অনীগী মমিংদা লাঙ্গোল ওল্ড এজ হোমদা লৈরিবা অহলশিংগীদমক্তা লুপা লাক্ষ মঙা অসি কৎখিবনি।
হোম অসিদা লৈরিবা অহলশিংগী চান-থক্নবদা মতেঙ ওইনবা থা খুদীংগী লুপা লীশীং অমমমসু পীরগনি ঙসি হোমগী মায়কৈদগী মিংথোন অমা পীদুনা ইকায়খুম্নবিবা অসি নুংঙাইবা অমসুং অপেনবা পোকই হায়না রোমিলানা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু