নাওরেম রোশিবিনা দেবীনা ৱুশুদা সিলবর মেদল ফংদুনা এসিয়ান গেমস মেদল থংননা অহুমলক লৌবী অহানবা ইন্দিয়ান ওইরে
ইম্ফাল, সেপ্টেম্বর, ২৪ : ইন্দিয়াগী মহুৎ শিন্দুনা শরুক য়ারিবী মণিপুরগী ৱুশু এথলেত নাউরেম রোশিবিনা দেবীনা ঙসি পাঙথোকখিবা ৱুমেন্স ৱুশুগী কিলোগ্রাম ৬০ গী কাঙলুপ্তা চাইনাগী সিযাওয় ঝাংগী মখূত্তা মায়থিহৌবদগী সিলবর মেদল অমা ফংলগা মহাক্কী এসিয়ান গেমস লোইশিনখ্রে।
নাউরেম রোশিবিনা ইন্ডিয়াগী হান্না শেমখিবা অশেংবা স্কৱাদতা য়াওহল্লকখিদবনি। কাইনথংদা ইন্ডিয়াগী মহুৎ শিন্দুনা শরুখ য়াব ফংহল্লকখিবা শান্নরোই অসি এশিয়ান গেমস জাকার্তা ২০১৮ অমসুং হাংঝৌ ২০২৩ দা মথংশিৎনা ব্রোঞ্জ অমসুং সিলবর ফংখিবনি। ঙসিগী অহুমশুবা মেদল অসিনা রোশিবিনাবু ৱুশু মশান্নদা এসিয়ান গেমস মেদল থংননা অহুম লৌবা অহানবা ইন্দিয়া নুপী ওইহনখ্রে।
রোশিবিনাগী মেদল অসিনা ইন্দিয়াগী এসিয়ান গেমসতা ৱুশু মশান্নদা ফংবা ১১শুবা মেদলনি। মেদলশিংদুদি গোল্ড অমা, সিলবর অনী অমসুং ব্রোঞ্জ নীপান্নি।
চৈরকসিদা, নাওরেম রোশিবিনা দেবীনা এসিয়ান গেমস ২০২৬ তা মেদল লৌবগী পরফোর্মেন্স পীখিবদা লৈবাক অসিগী প্রেসিডেন্ট দ্রৌপদি মুরমু থাগৎপা অমদি নুংঙাইবা ফোঙদোকখ্রে।
এক্সতা থাগৎখিবা পোস্ট অমদা প্রেসিডেন্ট মুরমুনা হায়খি, রোশিবিনা দেবী নাওরেম নহাক্না এসিয়ান গেমস ২০২৬ তা ৱুশু মশান্না উইমেন্স কেজি ৬০ গী সান্দা ইভেন্টতা সিলবর মেদল লৌরকপদা থন্মোয় শেংনা থাগৎলি। থংননা এশিয়ান গেমস অহুমদা মেদল অহুম লৌবা হায়বসি ইন্ডিয়ান ৱুশুগীদমক শিংথনিংঙাই ওইরবা এচিবমেন্ট অমসুং পুৱারী ওইরবা নীংশিং খূদম অমনি। নহাক্কী পুক্নিং
খৌগৎনিংঙাই ওইরবা খোঙচৎ অসি চাউথোকচবগী মিকুপ হেন্না হেন্না ফংলগা মখা চথ্থরকপা ওইরসনু।
প্রাইম মিনিস্তর ওফিসতা তৌরকপা এক্সতা শ্যায়র তৌরকপা থাগৎপগী ৱারোলদা প্রাইম মিনিস্তর নরেন্দ্র মোদিনা হায়খি, নাওরেম রোশিবিনা দেবীনা উইমেন্স সান্দা কেজি ৬০ ইভেন্টতা সিলবর মেদল লৌরকপদা থাগৎলি। এসিয়ান গেমস থংননা অহুমদা এচিবমেন্ত অমনি। মহাক্কী অচেৎপা ফীরেপ অমসুং মথৌ অসি তশেংনা শীংথানিংঙাইনি। মতুং তাবদা মহাক্না হোৎনরকপা পুম্নমক্তা মায় পাকপা ওইরক্লবা য়াইফ মঙ্গল পীরি।
মহাক্না মশামকপু মেদল অমা শুকশোয় শোয়দনা লৌনবগী লম্বীদা লৈহন্নবা মমাঙদা শান্নখিবা ক্কার্তরফাইনেলদা মকাওগী চু মান সিনবু ৫-০ দা মায়থীবা পীরমখি। মদুগী মতুং তারকপদা ইন্দোনেসিয়াগী থানিয়া কুসুমানিং য়াসকা শান্নবদা ২-০ দা মায়থিবা পিরম্লগা ফাইনেল চঙদুনা ফংলগনি খঙলবা মেদলগী মচু হোংহনখি, অদুবু কায়নথংদা গোল্ড মেদল বাউত্তা চাইনাগী ঝাংগী মখৃত্তা ০-২ দা মায়থীহৌবদগী সিলবর ওইনা ফংহৌখি। রোশিবিনানা বাংলাদেশকী শিকা খাতুনসু প্রি-ক্বার্তরফাইনেলদা মায়থীবা পীরমখি।
রোশিবিনানা গোল্ড মেদল বাউত্তা ঝাংগী তকশিন্বা কন্বা অমসুং তেক্নকেলদা হেন্না কন থৌবাঙ অদুবু লম্বা তৌনবা ঙমখিদে। চাইনিজ ফাহতর অসিনা রাউন্দ মঙামক্লা ৫-০ দিসিজন্দু পিখি। ঝাংনা মরু ওইনা সাইড কিকশিং অদুগী মতেংনা রাউন্দ অনীমক্লা স্কোর হেন্না তৌখিবনি।
রোশিবিনাগী এচিবমেন্ত অদুবু শকখঙবা ওইনা ইন্দিয়াগী অনীশুবা খ্বাইদগী ৱাংবা শান্-খোৎনবদা পীবা মনা অর্জুনা এৱাদ অমসুং ইন্তরনেসনেল ৱুশু ফেদরেসনগী ফিমেল ৱুশু এথলেত ওব দ ইয়ার (সান্দা) তাইতল পিদুনা ইকায়খুম্নবা লৈখ্রে।
নীংশিংবা য়াবদি রোশিবিনা ত্রাইএলদা দিব্যনশি চৌধরিগী মখ্ত্তা মায়খথীখি অমসুং অগন্ত থাদা স্পোর্তস মিনিস্ত্রিনা এপ্রোব তৌখ্রবা ইন্দিয়াগী মেম্বর তরেৎনা শাবা ৱুশু স্কৱাদতকী খনগৎপদা য়াওবা ফংখিদে। অদুবু দিব্যনশিনা মশাগী অশোকপা অমনা মরম ওইরগা খন্দোকখিবদগী ইন্দিয়ান তিমদা মহাক্কী মফম অমা কাইনথঙদা ফংখি। অদুম ওইনমক দিব্যানশিনা অরানবা থৌওংনি হায়না মরাল শীখি অমসুং মহাক মপূং ফানা ফিত ওইখি হায়না ফোঙদোকখি, অদুগা ফেদরেসনবু রোশিবিনাগী মীচং চঙই হায়নসু মরাল শীখিবনি।
রোশিবিনানা মহাকপু সেলেক্সন তৌখিবগী মতাংদা হায়, থোকখ্রিবা থৌদোক্তু মহাক্লা মরম ওইরগা নত্তে। মসিদি ফেদরেসনগী ৱারেপ্নি। ফেদরেসন (ৱুশু এসোসিএসন ওব ইন্দিয়া) না লৌনিংবা ৱারেপ হেক লৌরকপদা মহাক্তি অফবা ৱারেপ্নি অমনি খল্লি।
'ঐহাক শিরীবা মরালবু করিসু নাচুংবিদে। এহাক্তি এগী পান্দমখক্তংদা মীৎয়েং থন্বা পামই’ হায়না রোশিবিনানা ফোঙদোকখি।
‘ঐহাক্লা গেমসকীদমক মফমসিদা লাকখিবা মতমদুদা অয়েৎপা কয়া থেংনখি। ঐহাক শেম শানবা মতম ইফং ফংখিদে। করিগুম্বা ঐহাক্ন মতম হেন্না ফংলম্লবদি ঐহাক অমুক্কা হেন্না ফনা পাঙথোক্লমগনি’ হায়রদুনা রোশিবিনানা হায়খি। মহাক (চাইনিজ প্লেয়ার) অসি অমুক্তা থেংনখিদ্রি। মহাক অসি মাগী সাইদ কিকশিংদা ফৈ। ঙাকথোক্লবদি হোৎনখি, লং দুনা নন্নবা হোৎনখি, অদুবু মহাক্লা হেন্না ফনা শান্নরকখি।
নাওরেম রোশিবিনা দেবী অসি মণিপুরগী বিষ্ণুপুর দিসত্রিক্কী মনুং চন্না লৈবা ক্বাসিফাইদগী লৌউ শিংউ তৌজবা ইমুং অমদগী হৌরকপনি। রোশিবিনা দেবীগী খোংচৎ অসিদা শিংথানিংঙায় ওইনা ইমুং মনুংগী কত্থোকপা হায়বদুসু য়াওখিবগা লোয়ননা মহাক্কি লৌমীনা শিনফম ওইজবা অপোকপা নাওরেম দামু সিংহনা ঙল্লিঙৈদা ত্রেনিং তৌনবা অমসুং চৎথোক চৎশিনগী শেল পুথোক্নবা হায়দুনা লম মচেৎ অমা ফাওবা য়োনখিবা লৈখ্রে। মহাক কোচ মাইবম প্রেমকুমার সিংহগী লমজিং লমতাক মখাদা সাই এন সি ও ইম্ফালদা ৱুমেন্স সান্দা কেজি ৬০ গী কেতেগোরিদা ত্রেনিং তৌরকখি।
সোর্স : পোক্নফম
0 কমেন্ট:
কমেন্ট তৌবিয়ু