ত্রিপুরাদা খোংজোম নুমিৎকী থৌরম পাঙথোকখ্রে
ইম্ফাল, এপ্রিল ২৩ : ত্রিপুরাগী কোওপরেসন মিনিষ্টার শুক্লা চরন নোটিয়ানা লৈবাক অসিগী অৱাং নোংপোক লমদমদা লৈরিবা তোঙান তোঙানবা ফুরুপ মচাশিংগী পুৱারীশিং মীয়াম পূন্না খঙমিন্নগদবনি হায়রদুনা থবক অসিদা ত্রিপুরা লৈঙাক্কী মায়কৈদগীসু পাংবা য়াবা মতেংশিং পাংগনি হায়না ফোঙদোকখ্রে।
ৱাফম অসি ত্রিপুরাগী কোনুং আগরতলাগী অভয়নগরদা লৈবা পুথিবা দেবতা ত্রিপুরাগী পুথিবা ওয়েলফেয়ার এন্দ কালচারেল সোসাইটি অমসুং পাওনা ব্রজবাসি ফাউন্দেসন অনীনা খূৎশম্নদুনা শীল্লগা পাঙথোকখিবা খোংজোম নুমিৎকী থৌরমদা অথোইবা মীথুংলেন ওইনা শরুক য়াখিবা ত্রিপুরাগী মিনিষ্টার অসিনা ফোঙদোকখিবনি।
_1682400912.png)
মহাক্না মখা তানা হায়, অৱাং নোংপোক ষ্টেটশিংদা লৈরিবা ফুরুপ মচা মচাশিং অসিগী অসিগুম্বা থৌনা ফবগী ৱারীশিং খঙমিন্ননবা হোৎনবদা ঐখোয় পূন্না থৌদাং লৌমিন্নগদবনি। মসিদা ত্রিপুরা লৈঙাক্কী মায়কৈদগীসু পাংবা য়াবা মতেং পাংগনি হায়খি। থৌরমগী মনুং চন্না অভয়নগরদা লৈবা পাওনা ব্রজবাসিগী খুভমদা মীয়াম্না লৈ-শু কৎতুনা ইকায়খুম্নবা উৎখিবগা লোয়ননা থাঙ-তাগী কাঙবুনা অথৌবা অসিগী মফমদা সেল্যুট পীখি। লোয়ননা ত্রিপুরাগী নিঙোম্বম বিরো সিংহনা থৌরমগা মরী লৈননা খোংজোম পর্ব্ব, শক্তুনা খুদোল তমখি।
অমরোমদা, মণিপুর কালচারেল এন্ড লিটরেরি সোসাইটি অমসুং পাওনা ব্রজবাসি ফাউন্দেসন (ত্রিপুরা) না খুৎশম্নদুনা ত্রিপুরাগী খ্বাই দিষ্ট্রিক্টকী গৌরনগরদসু থৌরম অসি মীয়ামগা লোয়ননা পাঙথোকখি। থৌরম অসিদা পাওনা ব্রজবাসি ফাউন্দেসন (ত্রিপুরা) গী কনভিনর লোংজম সোমোরেন্দ্রো, মেম্বার মুতুম মনিতোন অমদি মণিপুরগী এস কে উইমেন্স কোলেজগী হিষ্ট্রি দিপার্টমেন্টকী এসিষ্টেন্ট প্রোফেসর ডা. মাইবম রতনকুমারনা ময়ায়গী ফম্ফমদা ফমদুনা শরুক য়াখি।
থৌরমগা মরী লৈননা প্রোফেসর অসিনা ফোঙদোকখিবদা খোংজোম নুমিৎকী থৌরম অসি করিগীদমক্তা পাঙথোক্লিবনো অমসুং মসিনা ঐখোয়দা পীরিবা ৱাখল্লোনশিং খঙমিন্নগদবনি হায়খি। মীতৈগী ইপা ইপুশিংনা মমা লৈবাক্কীদমক্তা লৌরম্বা থৌদাংশিং ঙসিগী মীরোলনা কাউথোক্লোইদবনি। মরম অসিনা তুংদা হৌরক্লিবা নহাশিংনা মীতৈগী হৌরকফম অমদি চৎনবী খঙনা ইপা ইপুশিংগী পুৱারীগী খোঙ্গুল লীদুনা মীতৈগী মতিক ময়াই হেনগৎলক্নবা হোৎনমিন্নসি হায়খি।
থৌরমগী মাঙওইননা ঙরাংসু পুথিবা দেবতা বারিদা নোংমগী ওইবা মেগা ব্লাদ দোনেসন কেম্প অমা আগরতলাগী আই জি এম হোস্পিটালগী টিম অমগা খুৎশম্নদুনা পাঙথোকখি। মসিদা আগরতলাদা লৈবা ২১ শুবা সেক্টর আসাম রাইফেলসকী পার্সেনেলশিং য়াওনা মীওই ৩০ রোম্না মশাগী ঈ পীখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু