image

চনা লুখোইদা ডাক্তর থিয়াম সুরেশ লিটরেরি এৱার্দ লান্থোক্লগনি

ইম্ফাল, এপ্রিল ২৫ : পেত্রিওটিক রাইটার্স ফোরাম, মণিপুরনা ইহান হানবা ওইবা পীবা হৌগদবা ডাক্তর থিয়াম সুরেশ লিটরেরি এৱার্দ ২০২৩ লমদমসিগী শক্নাইরবা অইবা চনা লুখোইদা পীদুনা ইকাই খুম্নবা উৎলগনি হায়রি। হেল্ঠ সার্বিসেস মণিপুরগী দাইরেক্টর ফাওবা ওইরম্বা শক্নাইরবা স্কোলার ডাক্তর থিয়াম সুরেশকী মীংদা মহাক্কী লোইনবী আরকে তম্ফাসনা অমদি মহাক্কী ইমুং-মনুংনা পেত্রিওটিক রাইটার্স ফোরাম মণিপুরদা দোনর ওইদুনা পীগদৌরিবা লিটরেরি এৱার্দ অসিদা শেল ওইনা লুপ লিশিং ১০, সাল অমা, সাইটেসন অমা অমদি মেমোন্তো অমা য়াওরি।

লোইবা নাইদ্রবা কবো ভেল্লি হায়না মীংথোনবা অচৌবা রিসার্চ ৱার্কতা য়ুম্ফম ওইবা লাইরিক ইরম্বদা নত্তনা মীয়ামগীদমক হিরম কয়াদা কত্থোকপগা লোয়ননা হোৎনরম্বা ডাক্তর সুরেশকী মীংদা ইহান হানবা ওইনা হন্দক চহিদগী পীবা হৌগদবনি। এৱার্দ অসি লাক্লিবা মে ১ গী নুংথিল পুং ১ তাবদা কৈশাম্পাৎ সিসিপুর পার্কিংগী মায়োক্নবদা লৈবা ইমা বাস্কেট হোলদা পাঙথোক্কদবা মালেমগী শীন্মীশিংগী নুমিৎ থৌরমগা মরি লৈননা শক্নাইরবা অইবা চনা লুখোইগী মফমদা ৱাংখৈ এসিগী এমএলএ থাংজম অরুনকুমারনা অথোইবা মীথুংলেন ওইদুনা খুৎশিন্নগনি। মসিদা ফোরাম অসিগী প্রেসিদেন্ট নাওরোইবম খম্বা লুৱাংনা থৌরম মপু ওইনা শরুক য়াগনি হায়রি।

এৱার্দ অসি ফংলগদবা অইবা চনা লুখোই কুমজা ১৯৫০ গী এপ্রিল ১০দা তাইবং খোংদারকখি। মহাক ওল মণিপুর শুমাং লীলা চাংদম্নবগা বেষ্ট স্ক্রিপ্ট রাইটার ১৮ রক, সেকেন্দ বেষ্ট স্ক্রিপ্ট রাইটার ৯ রক তাদুনা শুমাং লীলা য়োকখৎনবা হোৎনবদা অচৌবা থৌদাং লৌরিবা অইবা অমনি। ওল ইন্দিয়া রেডিও, ইম্ফাল ডিডি ইম্ফালনা শকখঙলবা অইবা অসি সঙাই এক্সপ্রেসকী রিগুলার কলমনিষ্টসু ওইরি। মহাক হৌজিক হৌজিক কংলা ফোর্ট বোর্ড, কংলা রিলিজিয়াস কম্মিটিগী মেম্বার, মণিপুর য়ুনিভর্সিটি ওফ কলচারগী একাডেমিক কাউন্সিলগী মেম্বার অমদি য়ুনিভার্সিটি অসিমক্কী ভিজিটিং গুরুশু ওইরি।

মহাক্না ইখিবা শিংথানিংঙাই ওইবা লাইরিক খরা পল্লবদা চরৈ হুইমদোন (দ্রামা), ঈগী নোং (শুমাং লীলা), সনাপাৎকী থারিকথা (শুমাং লীলা), চংনিং লাইরেম্বী (লাইচৎলোন), হোটেল বোয় (রেডিও প্লে), নুপী লান্দা থৌনা ফবীশিং (এসে) অমদি শক্নাইবা ১৩ (পুন্সি ৱারী) অসি নচিংবনি। শুমাং লীলা খক্তা নত্তনা মণিপুরী ফিচর ফিল্ম কয়াগী স্ক্রিপ্ট ইখ্রে। খরদং পল্লবদা কৈশামথোং থোইবী, সেকমাই তুরেল, বোরা উচি, পাচা অমদি নুংশিবী অহিং পনবা য়াই।

শক্নাইরবা অইবা অসিগী ঈগী নোং অমদি কৈশামথোং থোইবী মীংথোনবা শুমাং লীলাশিং অসি থোইদোক্না শিংথানিংঙাই ওইবা লীলাশিং ওইনা মীয়াম্না ঙসিসু শোন্নরি। অইবা চনা লুখোই হৌজিক হৌজিক ইম্ফাল ইষ্ট দিষ্ট্রিক্টকী মনুং চন্না চনা ময়াই লৈকাইদা খাইদেম নিঙোল লেম্বী (নুংথিলচাইবী) গা য়ুম্বানমিন্নদুনা মচা ৫ লৈরি। চনা লূখোইগী অশেংবা মমিং ওইনাম তুনাল কৌই। ওইনাম তুনালবু মীয়াম্না থোইদোক্না চনা লুখোই হায়না খঙনরি। মহাক মীয়ামগীদমক কত্থোকপা অমগা লোয়ননা হিরম কয়াদা হোৎনরিবা মীশক অমসুনি। মীতৈ পুয়াগী ৱারী লীবা অমা ওইনসু লৈবাক্না শিংথানরিবা ইনাৎ থৌগল্লোই অমসুনি।

চহি খুদিংগী পীগদৌরিবা ডাক্তর থিয়াম সুরেশ লিটরেরি এৱার্দ ফংবা অহানবা অইবা অসি চনা লুখোইনা ওইরে হায়রি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু