ত্রিপুরাগী মফম কয়াদা হন্দক চহীগী ১৩২ শুবা অথৌবগী নুমিৎ পাঙথোকখ্রে
আগরতলা, আগস্ট ২০ : চহী খুদিং তৌনা হন্দকসু মফম অমখক্তদা নত্তে, ত্রিপুরাগী তোঙান তোঙানবা মৈতৈ খুঙ্গংশিদা ‘আগস্ট ১৩’ অথৌবগী নুমিৎ হায়না শীংথারদুনা হৈকৎ-লৈকৎ তমদুনা পালন তৌখ্রে। হন্দক চহী ১৩২ শুবা অথৌবগী নুমিৎ ত্রিপুরাগী ডিষ্ট্রিক্ট মঙাদা মৈতৈনা তাবা খুঙ্গংশিংদা পাঙথোকখি।
নোংচুপ জিলাগী অভয়নগরদা পুথিবা ওয়েলফেয়ার এ্যন্ড কালচারেল সোসাইটিনা শীন্দুনা পুথিবা শঙলেন্দা পালন তৌখি। থৌরমদা ওয়েলফেয়ারগী থৌবুরেনশিং শরুক য়াখি। মণিপুরী কাউন্সিল ত্রিপুরা অমসুং ত্রিপুরা মণিপুরী ষ্টুডেন্ট য়ুথ কোঅর্ডিনেশন কমিটি অনীনা খুৎশম্নরগা রাধানরগা পাঙথোকখিবা থৌরম অদুদা খুন্নাইগী অহল ৱাই চন্দ্রকীর্তিনা থৌরম মপু ওইরগা মণিপুরী সাহিত্য পরিষদকী জেনারেল সেক্রেটারী টিএইচ নীলকুমার, কব্রবম ধীরেন, য়াম্বেম প্রবীণ, আরকে তরুনজিৎনা অথৌবা নুমিৎকা মরী লৈননা ৱা ঙাংখি। নলগড়িয়াদা মণিপুরী লিটরেরী এ্যন্ড কলচরেল ফোরাম, মরূপ পাউচে, লময়ানবা অমসুং তখেল তেংবাং লুপ মরিনা খুৎশম্নরগা রাধিকা সিংহনা থৌরম মপু ওইরগা পাঙথোকখিবা নুমিৎ অসিদা সাহিত্য পরিষদকী ভাইস প্রেসিডেন্ট এস খেলামোহন, শক্নাইরবা অইবা এল বীরমঙ্গল, মরূপ পাউচেগী আরকে তরুণজিৎ সিংহ, লময়ানবা সংস্থাগী এসি: সেক্রেটারী কেএসইইচ সুদেষ্ণা অমসুং ফোরামাগী সেক্রেটারী খোইস্নাম মঙ্গল শরুক য়াদুনা ৱা ঙাংখি।
হন্দক চহী মেত্রিক পরীক্ষাদা ফার্ষ্ট ডিভিশন্দা পাশ তৌবা তৌরৌ নিঙোল হিজম চনু অনুস্মিতাবু খুদোল পোৎ পীদুনা সম্বর্ধনা তৌখি। অথৌবগী নুমিৎ ধলেশ্বরদসু থৌগন লুপ, মণিপুরী সোসিও কলচরেল ওর্গানাইজেশন্না শীন্দুনা পালন তৌখি হায়রি। বাদ্যারদীঘি খুলদসু তখেল য়াওল্লুপ সোসিও কালচারেল ওর্গানাইজেশন্না শীন্দুনা পাঙথোকখিবা অথৌবগী নুমিৎতা বাদ্যারদীঘি খুন্নাইগী কোন্সম ওংবী যসুমিতানা থৌরম মপু ওইরগা সাহিত্য পরিষদকী জেনারেল সেক্রেটারী টিএইচ নীলকুমার, য়ুম্নাম চন্দ্রকীর্তি, ডব্লিউ বীরমঙ্গল, এন. প্রনয়, এইচ রমেন, কে অতুল নচিংবা শরুক য়াদুনা ৱা ঙাংখি হায়না পাউ অমদা হায়রি।
গৌরনগরদা মৈরা পায়বী, খোয়াই অমসুং মণিপুরী লিটরেরী এ্যন্ড কালচারেল ফোরাম অনীনা শীন্দুনা ফোরামগী প্রেসিডেন্ট এন বীর সিংহনা থৌরম মপু ওইরগা অদুগা দুর্গানগরদা লৈকোলনা শীন্দুনা সাইখোম ওংবী উষারানীনা অথোইবা মীথুংলেন ওইদুনা অথৌবগী নুমিৎ পালন তৌখি হায়রি। থৌরম অদুদা সোরাইজম উত্তমনা নুমিৎ অসিগী মরমদা ৱা ঙাংখি। অৱাং জিলাগী জলাবাসা মৈতৈ খুঙ্গংদসু চহী খুদিং তৌনা নহারোলশিংনা শীন্দুনা মখল কয়াগী থৌরমগা য়াওনা ১৩২ শুবা হন্দক চহীগী অথৌবগী নুমিৎ পালন তৌখি। নুমিৎ অসিগা মরী লৈননা অথৌববু শৈথারদুনা অহৈবম বুদ্ধচন্দ্র, অহৈবম রবীন্দ্র কুমার, লোইদাম রাজকুমারীনা শৈরেং পাথোকখি হায়না জলাবাসদগী হায়রি।
সোর্স: মরূপ
0 কমেন্ট:
কমেন্ট তৌবিয়ু