ত্রিপুরাগী গৌরনগরদা নুপী লানগী মীতম হাংদোক্লগনি
ইম্ফাল, এপ্রিল ২৬ : ওল মণিপুর য়ুনাইটেদ ক্লাবস ওর্গানাইজেসন (অমুকো) অমদি মণিপুরী লিটরেরি এন্দ কালচারেল ফোরাম, ত্রিপুরা অনিনা খুৎশম্নদুনা ত্রিপুরাগী খোৱাই দিষ্ট্রিক্টকী মণিপুরী (মৈতৈ) শিংনা খ্বাইদগী হেন্না খুন্দাবা মফম অমা ওইরিবা গৌরনগরদা নুপী লানগী মীতম (ষ্টেচু) অমা লাক্লিবা এপ্রিল ৩০ দা মাইখুম হাঙদোক্লগনি হায়রি। মণিপুরগী মপান লমদা ইহান হানবা ওইনা নুপী লানগী মীতম (ষ্টেচু) অসি কালচারেল প্রোগ্রাম কয়াগা লোয়ননা অমুকোগী প্রেসিদেন্ট ফৈরোইজম নন্দো লুৱাংনা মাইখুম হাংদোক্কনি। মসিগীদমক অমুকোগী মশিং য়াম্লবা টিম অমা এপ্রিল ২৯ দা ত্রিপুরাদা খোঙশাল্লগনি।
কুমজা ১৯৩৯ গী দিসেম্বর ১২ দা মণিপুরদা থোকখিবা নুপী লানগী থৌদোক অদুদা মণিপুরগী নুপীশিংনা বৃটিশকী মায়োক্তা উৎখিবা তোপ-তোপ্পা থৌনা লিংজেল অদুনা মতম পুম্বদা মণিপুর অমদি মপান লমদা খুন্দারিবা মণিপুরীশিংদা মরু ওিইনা মণিপুরী নুপীশিংদা অতৎ-অখম লৈতনা থৌনাগী ইনোৎ অমা পীরিবনি। মণিপুরগী মপান লমদা খুন্দারিবা মণিপুরীশিংদা মতম চুপ্পদা মণিপুরী নুপীশিংগী মতিক মথৌনা অদু খঙহন্নবগী পান্দমদা অমদি মণিপুরগী ৱাংমদা খুন্দারিবা মণিপুরীশিংনা মখোয়গা লৈমিন্নরিবা অতৈ ফুরুপকী মীওইশিংগী মমাঙদা চাথোক্না লৈবা ঙম্নবগী ৱাখল্লোন্দা নুপী লানগী মীতম অসি খিনবগী পান্দমদা থমখিবনি।
হৌখিবা চহি ২০২২ গী দিসেম্বর ১২দা ত্রিপুরাগী মৈতৈ য়াম্না খুন্দাবা মফম অমা ওইরিবা বেরিমুরাদা অমুকো অমদি মণিপুরী লিটরেরি এন্দ কালচারেল ফোরাম, ত্রিপুরানা শিন্দুনা নুপী লানগী নীংশিং থৌরম পাঙথোকখিবা অদুগী মাঙওইননা নুপী লানগী মীতম (ষ্টেচু) অমা ত্রিপুরাগী মফম চাবা অমদা খিন্নবগী ফিরেপ লৌখিবনি। ফিরেপ অদু মণিপুরগী পুকচেল চাওরবা কয়াদগী মতেং লৌদুনা অতেনবা মতমগী মনুংদা মাই পাক্না শাবা ঙমদুনা এপ্রিল ৩০ দা মাইখুম হাংদোকপগী থৌরাং তৌবনি। মরমদুনা ত্রিপুরাদা নুপী লানগী মীতমসি খিন্নবগীদমক্তা মতেং পাংলিবা খুদিংমকপু অমুকোনা চেরোল অমদা থাগৎপা ফোঙদোরকপগা লোয়ননা তৌবিমল খঙবা উৎলক্লি।
অমুকোনা মণিপুরগী অথৌবা অথৌবী কয়াগী মীতমশিং মণিপুরগী ৱাংমদা খুন্দারিবা মণিপুরীশিংনা খুন্দারিবা মরু ওইবা মপুং ওইবা মফমশিংদা মণিপুরগী অথৌবা অথৌবীশিংগী মীতমশিং অসি হেন্না-হেন্না খিন্নবগী থৌরাং ঐখোয় পুম্নমক্না পায়খৎমিন্নসি। মণিপুর লৈঙাক্নসু অখন্নবা থৌরাং অমা পায়খৎপীদুনা মণিপুরগী অথৌবশিংগী মীতম কয়া মণিপুরগী ৱাংমদা খিনবীয়ু হায়বসিনি।
মীতম (ষ্টেচু) অমনা শুংলেপ লেপ্তনা ৱারী অমা লীরি। মীতম অদুনা লীরিবা ৱারী অদুনা ঙসিগী মীরোল অমদি তুংদা লাক্কদবা মীরোলদা অদুক্কী মতিক মমল য়াম্লবা খুনাইগী লন (এসেট) অমা ওইনা লৈগদৌরিবনি। খ্বাইদগী লাইবা অমদি অশম্বা মওংদা মীয়ামদা পুৱারীগী মরু ওইবা তাঙ্কক অমগী ৱারী লীদুনা হাপ্লীবসি মীতম (ষ্টেচু) অসিসু অমনি। মরমদুনা মণিপুরগী ৱাংমদা মখা তানা মরৈবাক নুংশিবা অমদি মরৈবাক্কীদমক্তা থৱায় থাখ্রবা ঈরমদমগী অথৌবা কয়াগী মীতম খিনবদা ঐখোয় পুম্নমক থৱায় য়াওমিন্নসি হায়না অমুকোনা মীয়ামদা আপিলসু তৌরি।
সোর্স: সঙাই এক্সপ্রেস।
0 কমেন্ট:
কমেন্ট তৌবিয়ু