ইম্ফাল, সেপ্টেম্বর ১১ : হৌজিক থোক্লিবা ঈরাং অসি অথুবা মতমদা লোয়শিল্লু অমদি মণিপুরগী অপূনবগী শক্তম কায়হনবা য়ারোই হায়বা দিমান্দগা লোয়ননা য়ুথ ওব মণিপুরগী ভলুন্তিয়ারশিংনা চঙশিল্লকপা খোঙজংগী মনুংচন্না ঙসি নুমিদাং চীফ মিনিষ্টার্স বাঙ্গলোদা চঙদুনা চীফ মিনিস্তর এন বীরেন অমসুং রুলিংদা লৈরিবা এম এল এ শিংগা ৱারী শানদুনা ৱারেপ লৌমিন্নখ্রে, এম এল এ ২৩ না তেরিতোরিয়েল ইন্তিগ্রিতি ঙাক্কনি, মখল অমত্তগী সেপরেত এদমিনিস্ত্রেসন য়ারোই, অথুবা মতমদা দিল্লীদা চৎলগা সেন্তরগী লুচিংবশিংদা লমদম অসিদা থোক্লিবা ঈরাং অসিগী সোলুসন অমা পুরক্নবা তকশিল্লুগনি হায়না রিজোলুসন অমা লৌরগা মখোয় মশাগী খূৎয়েকশিং পীরকখ্রে।

ঙসি নুংথিল পূং ৪.৩০ রোম তাবদা য়ুথ ওব মণিপুরগী য়াম্লবা ভলুন্তিয়ারশিং মোইরাংখোমদা পূনশিন্নরগা চীফ মিনিস্তরগী বাঙ্গলোদা চঙশিন্নবা শেম-শাবা হৌরকখি। মফম কয়াদগী লাকখিবা য়ুথ ওব মণিপুরগী ভলুন্তিয়ারশিং লেপ্পা লৈতনা হেনগৎলকপদগী মফম অদুদা মণিপুর পুলিশ অমসুং রেপিদ এক্সন ফোর্সকী মশীং য়াম্লবা পার্সনেলশিংনা চেকশিন থৌরাং লৌখৎখি।

য়ুথ ওব মণিপুরগী মাঙজিন থারিবা ভলুন্তিয়ারশিংগা মণিপুর পুলিসকী মকোক থোংবা পার্সনেল খরগা ৱারী শানরবা মতুংদা নহা চাম্মরোমগা চীফ মিনিস্তরগী বাঙ্গলোদা চৎলগা উনসি হায়বদা য়ানখি। মখোয় নুমিদাংৱাইরম পূং ৫.৩০ তাবদা চীফ মিনিস্তরগী বাঙ্গলোদা চঙখি। চীফ মিনিস্তরগী বাঙ্গলো মনুংদা য়ুত ওব মণিপুরগী দিমান্দ মতুংইন্না রুলিংদা লৈরিবা এম এল এ শিং য়াওনা চীফ মিনিস্তরগা ৱারী শানবগী ৱাফম পুখৎলকপদগী এম এল এ ২৩ দুসু চীফ মিনিস্তরগী বাঙ্গলোদা লাক্তুনা য়ুথ ওব মণিপুরগা উনখিবা অদুদা শরুক য়াখি হায়রি।

ৱারী শানরবা মতুং নুমিদাং পূং ৯ লোম তাবদা চীফ মিনিস্তরগী বাঙ্গলোদা চঙলুবা য়ুথ ওব মণিপুরগী মীহুৎশিং অদু থোক্লকখি। নুংথিলদগী হৌনা মোইরাংখোমদা ঙাইদুনা লৈরিবা য়াম্লবা ভলুন্তিয়ারশিংগা উনদুনা য়ানখিবা ৱাফমশিং অদু পাউদমখি।

য়ুথ ওব মণিপুরগী মীহুৎ অমনা মফম অদুদা তিল্লিবা মীয়ামদা লাউথোক্লদুনা হায়, ঙসি চীফ মিনিস্তরগী বাঙ্গলোদা চৎখিবা অদুদা মখোয়গী মায়কৈদগী দিমান্দ খরা পুথোক্তুনা থমখি। হায়রিবা দিমান্দশিং অদুদি অথুবা মতমদা ইমার্জেন্সি স্তেত এসেমব্লি মীফম অমা ফম্লগা মণিপুরগী তেরিতোরিয়েল ইন্তিগ্রিতি কায়হনবা য়ারোই, অকক্নবা মতমগী মনুংদা এ আর সি পায়খৎনবা ৱারেপ লৌবা, কুকি মিলিতেন্তশিংনা এতেক তৌরক্লিবা অসিদা ভিলেজ ভলুন্তিয়ারশিংনা ঙাকপগী মহুত্তা স্তেত ফোর্স অমসুং আসাম রাইফেলস নত্তবা অতোপ্পা সেন্ত্রেল ফোর্সনা ঙাকহনবা, আসাম রাইফেলসনা নাকল নাম্মদা তোংশিল্লগা থবক তৌরকপা মতমদা খুদক্তা এক্সন লৌবা লোয়ননা কুকি এম এল এ ১০ গী মথক্তা লিগেল এক্সন লৌখৎপা হায়রিবা ৱাফমশিং অসিনি।

উনখিবা অদুদা শরুক য়াখিবা এম এল এ ২৩ না মণিপুরগী ইন্তিগ্রিতিগীদমক্তা লেপকনি। মখল অমত্তগী সেপেরেত এদমিনিস্ত্রেসন মখোয়না য়ারোই। এম এল এশিংনা অথুবা মতমদা দিল্লীদা চত্তুনা সেন্ত্রেল লিদারশিংদা হৌজিক থোক্রিবা ঈরাং অসিগী ৱারোইশিন অমা পুরক্নবা তকশিল্লুগনি হায়না মখোয়না খূৎয়েক পীরকখি।

ঙসি লৌখিবা ৱারেপ অদুদা মশাগী খূৎয়েক পীরকখিবা এম এল এশিং অদুদি টিঐচ বিশ্বজিৎ (থোংজু), ৱাই খেমচান্দ (শীংজমৈ), কে গোবিন্দাস (বিষ্ণুপুর), এস রাজেন (লমশাং), ঐচ দিঙ্গো (সেকমাই), কেঐচ লোকেন (ৱাঙ্গোই), টি রোবিন্দ্রো (ময়াং ইম্ফাল), টি ঐচ অরুনকুমার (ৱাংখৈ), দাঃ রাধেশ্যাম য়ূম্নাম (হিয়াংলম), কোংখাম রোবিন্দ্রো (ময়াং ইম্ফাল), এস প্রেমচন্দ্র (কুম্বী), সাপম কুঞ্জকেশ্বর (পাৎশোই), ইরেংবম নলিনী (ওইনাম), এস কেবী (নাওরিয়া পাখংলাকপা), এম রামেশ্বর (ককচীং), দাঃ উশম দেবেন (ৱাবগাই), তিঐচ শ্যামকুমার (অন্দ্রো), দাঃ এস রঞ্জন (কোন্থৌজম), তিঐচ বসন্ত কুমার (নম্বোল), কেঐচ জয়কিষন (থাংমৈবন্দ), এমদি আব্দুল নাসির (লিলোং) অমসুং কেঐচ ইবোমচা (লম্লাই) নি।

সোর্স: পোক্নফম