ৱার্ল্ড পোইত্রি দে পাঙথোকখ্রে
ইম্ফাল, মার্চ ২১: লমদম অসিদসু ঙসি ‘মালেমগী শৈরেং নুমিৎ’ পাঙথোক্নখিবগা লোয়ননা সাথৌলূপনা নুমিৎ অসিগা মরী লৈননা পীবা গোপাল শর্ম্মা এৱার্দ চহী অসিগী ওইনা শক্নাইরবা অইবা রঘুবীর থিয়ামদা লান্থোকখ্রে।
সাথৌলুপ (সাহিত্য থৌপাং লূপ) না শীন্দুনা মণিপুর প্রেস ক্লবতা পাঙথোকখিবা থৌরম অদুদা অসৈলূপ মণিপুরগী প্রেসিদেন্ত দিলিপ ময়েংবমনা চীফ গেস্ত অমসুং লোক্তাক খোর্জৈ লূপকী প্রেসিদেন্ত বিরবাবু লাইশ্রমনা প্রেসিদেন্ত ওইখি।
থৌরম অসিদা চহী অসিগী ওইনা গোপাল শর্ম্মা এৱার্দ-২০২৫ অসি শক্নাইরবা অইবা রঘুবীর থিয়ামদা লান্থোকখি। এৱার্দ অসি শেল ওইনা লুপা ১৫,০০০, সাইতেসন অমা অমসুং সাল অমা য়াওরি।
পনবা য়াই, পোক্নফমগী পব্লিশর অমসুং এদিতর ওইরম্বা শামুরাইলাৎপম গোপাল শর্ম্মাগী মিংদা এৱার্দ অসি লৈখিদ্রবগী ইমুং-মনুংনা সাথৌলূপতা কৎপনি। থৌরমগী চীফ গেস্ত ওইখিবা দিলিপ ময়েংবমনা সাথৌলূপনা চহী অসিগী ওইনা অইবা রঘুবীর থিয়ামদা গোপাল শর্ম্মা এৱার্দ লান্থোকপদা নুংঙাইবা ফোঙদোকখি।
মহাক্না হায়খি, গোপাল শর্ম্মা সাহিত্যগী কাঙবুগা পূল্লগা নুংঙাইজবা মীশক অমা ওইখি। মণিপুরী সাহিত্যদা লৈখিদ্রবা গোপাল শর্ম্মানা মণিপুরগী মীয়ামদা পীরম্বা খুদোল অদুগীদমক্তা মহাকপু সাহিত্য সেবা সমিতি ককচীংনা ইকায়খুম্নবা ঊৎখিবা অদুসু য়াম্না নুংঙাইবা অমা ওইখি।
দিলিপ ময়েংবমনা হায়, ৱার্ল্ড পোইত্রি দে অসি য়াম্না মরু ওই। শৈরেং হায়বসি থোরক্তিঙৈদা মীওইবগী পূক্নিং-ৱাখলসিদগী থোরকপসি ঈশেনা হাল্লি হায়না খল্লি। ঈশৈ লিশাং শিৎনা মথং মথং শক্লবা মতমদা রিফাইনা তৌরবা মতুঙদা ফজবা শৈরেং ওল্লকপনি। ফজবা ঈশৈ অদু অমুক ময়েক্তা ওন্থোরক্লবা মতমদা শৈরেং হায়বসি ওল্লকপনি।
মহাক মশামকসু মতম ঈশৈ ময়েক ইবা, ঈশে শকপা ওইনা হৌরকপনি। মহাক পেনাদা কয়া খোইজং লুদে। মহাক্না রেদিওদা চঙলবা মতুঙদা পেনা হায়বসি য়াম্না মরুওইবা ইনস্তুমেন্ত অমনি খঙখি। ঐখোয়গী লন অসি পেনাদগী হৌরকখি। মসিগী মতুঙদা লানগী ৱারীদু পুথোক্লগা ঈশৈ ওইনা শক্লকপদগী খোংজোম পর্ব ওইনা থোরকখ্রে। মোইরাং কংলৈরোলনচিংবা মথং মথং লাকখি হায়নসু দিলিপ ময়েংবমনা ফোঙদোকখি।
দিলিপনা হায়খি, ঐখোয়গী লৈজরম্বা কলচরেল ইলিমেন্ত ময়ামদুনা ঐখোয়গী সাহিত্য অসিবু য়াম্না ৱাংনা থাংগৎপদা মতেঙ পাংই। কলচরগা শাগোন্নদুনা য়াওরিবা ঈশৈশিংদা কূপ্না য়েংশিন্দবসিসু চুমদে। মসিদা খ্বাইদগী ফজবা শৈরেং য়াওরি। ঈশৈশিংদগী মরক্তুদা লোল য়াওরি। মরম অদুনা ওয়েস্টখক্তগীদা নত্তনা ইস্ততগীসু য়েংমিন্নবা অমা চঙই।
মহাক্না হায়, ২১ শুবা চহীচা অসিদা খ্বাইদগী নৌবা মালেমগী ওইনা অনৌবা ৱাখল্লোন অদুগা লোয়ননা খ্বাইদগী লিরবা ওজা-গুরু ময়াম্না থম্লম্বা লন ময়ামদুসু নৌহৌননা য়েংশিনবা অমা চঙই। মদুতদা ঐখৈায়গী খোরিলোলগী খোঙচৎ অসি মগুণ লৈগনি হায়বসি থাজৈ। মরমদি ঐখৈায়না ঐখোয়গী রুত য়াওদনা য়াদে। অনৌবা সুপরস্ত্রকচার অমা শাগৎপা হায়বসুসি ঐখোয়গী ইথৌনি অদুগা অহলশিংনা থম্বীরম্বা লনশিং তাশিন-খোমজিন্দুনা হেন্না মপাঙ্গল কনখৎহননবা অমসুং ফজহন্নবা শীনবা হায়বসিসু মরুওই।
‘মালেমগী শৈরেং নুমিৎ অসিদা ঐখৈায়না পাম্লিবদি ঐখোয়গী ওইবা পোৎসু মারেমগী ওইবসিদা য়াওহনবনি। ঐখোয়গী ওইবা পোত্থোকশিং অসি ইংলিশতা হন্দোক্তুনা মালৈমগী মীযামদা পাহন্নবা হোৎনমিন্নসি’ হায়নসু দিলিপ ময়েংবমনা ফোঙদোকখি।
থৌরম অদুদা শক্নাইরবা কবি দোনেশ্বর কোন্সমনা চেয়ার লৌদুনা অইবা-অইবী ৩২ না শৈরেং পাথোকখি। থোকচোম দোল্লরসেননা ইবা ‘উতাংবীগী লমদমদা’ মিংথোনবা লাইরিকসু ফোঙখি।
চহী অসিগী গোপাল শর্ম্মা এৱার্দ ফংলবা শক্নাইরবা রঘুবীর থিয়াম ইং ১৯৬৪ কী নভেম্বর ২৬তা য়াইরিপোক নিংথৌনাইদা পোকপনি। মহাক থিয়াম বীরমঙ্গোল অমসুং তোম্বী দেবী অনীগী মচানি। অইবা অসি মণিপুরী সাহিত্য পরিষদ ইম্ফালনা ইং ২০১৪ দা কাব্য ভুষণ পীদুনা ইকায়খুম্নখি। সাহিত্য সেবা সমিতি ককচীংনসু চীংখু মোইরাং লৈমা নীংশিং কবিরদাসনা মনা পীদুনা ইকায়খুম্নখি। মহাক্কি লাইরিক পূন্না ১৩ ফোঙখ্রে।
রঘুবীর ওল ইন্দিয়া রেদিও ইম্ফালগী লিরিসিস্ত অমসুং প্লেরাইত অমসুনি। মহাক শীংথানিংঙাই ওজা অমা ওইবগীদমক আর কে সনাতোম্বী এৱার্দ ২০০০ ফংখি। মণিপুর সাহিত্য প্রেমী সমিতিগীসু মেম্বর ওইরকখি। নাকল অমদা, ৱার্ল্ড পোইত্রি দেগী থৌরম অসি ঙসি দি এম কলেজ ওব আর্তসকী মাল্টিপার্পজ হোদসু পাঙথোকখি।
শক্নাইরবা কবি মঙা-সাহিত্য একাদেমি এৱার্দি য়ূমলেম্বম ইবোমচা, সাহিত্য একাদেমি এৱার্দি অমসুং মণিপুর স্তেত লিতরেচর এৱার্দি আর কে ভূবস্না, সাহিত্য একাদেমি অমসুং মণিপুর স্তেত লিতরেচর এৱার্দি দাঃ অরাম্বম ওংবী মেমচৌবী, সাহিত্য একাদেমি অমসুং মণিপুর স্তেত লিতরেচর এৱার্দি মোইরাংথেম বরকৈন্য অমদি সাহিত্য একাদেমি অমসুং মণিপুর স্তেত লিতরেচর এৱার্দি বিরেন্দ্রজিৎ নাওরেমনা মখোয়গী শৈরেং অনী/অনী পাথোকপগা লোয়ননা মদুগী ইংলিশ ত্রান্সলেসন পাঙথোকপনা মপূং ওইবা থৌরম ওইখি।
থৌরম অদুদা স্কুল ওব হ্যুমেনিতিজগী দিনসু ওইরিবা দি এম সি আর্তস, দি এম য়ুগী প্রিন্সিপাল প্রোঃ এস লনচেনবা মীতৈনা চীফ গেস্তকী ৱারোল পীরদুনা খুন্নাই অসিদা শৈরেংনা লৌরিবা থৌদাং অমসুং য়ুনেস্কোনা নুমিৎ অসিবু শকখঙদুনা লিঙ্গুইস্তিক দাইবর্সিতি অমসুং ইনদেঞ্জর লেংগ্বেজ য়োকখৎনবগী থম্লিবা পান্দমগী মতাঙদা ৱাফমশিং থমখি।
দি এম য়ুগী ইংলিশ দিপার্তমেন্তকী হেদ দাঃ আর কে সংসারী দেবীনা প্রিসাইদ তৌখিবা থৌরম অদুদা শরুক য়াখিবা শক্নাইরবা-শক্নাইরবী কবিশিংনসু মণিপুরী লিতরেচর অসি ইংলিশ লিতরেচরগী সিলেবাসতা য়াওহন্নবগী তঙাইফদবগা লোয়ননা ইংলিশ অমসুং অতোপ্পা লোনশিংদা ত্রান্সলেত তৌদুনা মীয়ামদা খঙহনবা মথৌ তাই হায়খি।
থৌরম অদুদা দি এম য়ুগী কনস্তিত্যুএন্ত কলেজশিংদগী লাকখিবা অন্দরগ্রেজুএতকী মহৈরোয় , পি জিগী মহৈরোয় অমসুং রিসার্ছ স্কোলারশিংসু শরুক য়াখি।
তাওবুংখোক ইম্ফাল ওয়েস্তটা লৈবা ইপা লোয়ালাকপা ইমা নুংথেললৈমা ইকো-তুরিজম পার্কতসু ঙসি ৱার্ল্ড পোইত্রি দেগী থৌরম অমা লমদম অসিগী মশক নাইরবা কবিশিংনা শরুক য়াদুনা পাঙথোকখ্রে।
সাহিত্য একাদেমি, নিউ দিল্লিগী মণিপুরী এদভাইজরি বোর্দকী হান্নগী কনভেনর নোংমাইথেম কিরনকুমার সিংহনা ময়াই তাংবল লৌদুনা পাঙথোকখিবা থৌরম অদুদা স্তেত অসিগী মশক নাইরবা কবি ৩৫ রোম্না শৈরেং শৈদিন্নখি। কবিশিংনা পাথোকখিবা শৈরৈং অয়াম্বনা মণিপুরগী ইনাকখুল্লবা কলচরগী লন অমদি মারেমদা ঈং-তপ্না, নুংশি-চান্নবা অমদি অমত্তা ওইবগী লিক্লম পুরক্নবা হোৎনবদা শৈরেংগী মরুওইবা অদুবু শীংথানখি।
থৌরম অদুবু শীনখিবা ফুরাইলাৎপম বোদেশ্বর শর্ম্মানা, ‘ৱার্ল্ড পোইত্রি দে’ পাঙথোক্লিবা অসি মীয়াম্বু অমত্তা ওইনা অমদি নুংশি-চান্ননা হিংমিন্নবগী ৱাখল্লোন পুরক্নবা হোৎনবদা শৈরেংগী মপাঙ্গল অদুবু শীংথাবনি। মালেমদা লৈরিবা মখল খুদীংমক্কী কলচর অমদি শিনফম খায়দনা মীয়াম্না ঈংনা-চিক্না অমত্তা ওইনা হিংমিন্ননবা হোৎনবদা শৈরেংগী অচৌবা মগুণ লৈ হায়বসি ঐখোয়না থাজৈ হায়নসু মহাক্না ফোঙদোকখি।
জুনিয়র সোসিএল সাইন্সন্তিস অব ককচীংনসু মালেমগী শৈরেংগী নুমিৎ থৌরম ককচীং দিস্ত্রিক্তকী মনুং চন্না পল্লেল ময়াই লৈকায়দা লৈবা সোসিএল এক্তিবিস্ত তখেল্লম্বম নোগেন্দ্রোগী য়ুমদা পাঙথোকখ্রে। ঙসিগী থৌরম অদুদা চীফ মিনিস্তার্স গ্রীণ মণিপুর মিসনগী হান্না গ্রীন এম্বেসেদর ওইরম্বী ভেলেন্তিনা এলাংবমনা চীফ গেস্ত, পল্লেল জিপি এদমিনিস্ত্রেতিব কমিতিগী চেয়ারপার্সন সনাবম জয়জুমারনা প্রেসিদেন্ত এদমিনিস্ত্রেসন কমিতি অসিগী মেম্বর পুখ্রম্বম ইবোতোম্বী অমদি খা মণিপুর কলেজ ককচীংগী এসিস্তেন্ত প্রোফেসার দাঃ চাবুংবম রঞ্জানানা গেস্ত ওব ওনরশিং ওইখি।
থৌরম অদুগী শরুক অমা ওইনা ককচীঙ পাজি লৈকায়দগী বিরমঙ্গোল পুখ্রম্বমনা ইবা ‘য়োইবু য়োইহেন তান্নবুং’ হায়না মিংথোনবা শৈরেং অমা অথোইবা মীথুংলেন্না ফোঙবগা লোয়ননা শৈরেং অদুগী পোস্তর কেম্পেনসু হৌদোকখি। থৌরম অদুগা মরী লৈননা শরুক য়াখিবশিংনা পল্লেলগী মফম কয়াদা নিংশিং উপাল কয়াসু থাখি।
অমরোমদা, খোরিরোল শন্দোকলূপ ৱাংজীং, মণিপুরী সাহিত্য পরিষদ থৌবাল দিস্ত্রিক্ত মশা অমসুং নিংঙোল খূৎ মণিপুর, ৱাংজিংনা পূন্না শীন্দুনা ঙসি খোরিরোল শঙলেন ৱাংজিংদা ‘মালেমগী শৈরেংগী নুমিৎ’ কী থৌরম পাঙথোকখ্রে। থৌরম অদুদা খোরিরোল শন্দোকলূপ ৱাংজিংগী প্রেসিদেন্ত তোংব্রম বাবুলাল, মণিপুরী সাহিত্য পরিষদ থৌবাল দিস্ত্রিক্ত মশাগী প্রেসিদেন্ত মোইরাংথেম রাজেন অমসুং নিংঙোল খূৎ মণিপুর, ৱাংজিংগী প্রেসিদেন্ত খুন্দোংবম গুণমনি লৈমনা থৌরম মপুশিং ওইনা শরুক য়াখি।
থৌরম অদুগী শরুক অমা ওইনা ৱাইখোম মণি গার্লস কলেজ থৌবালগী রিতয়ার্দ এসোসিএত প্রোফেসার সেঙ্গোই সনাশমনা ‘মালেমগী শৈরেংগী নুমিৎ’ কী থৌরম দা মরিক চুম্বা ৱাফম থম্লদুনা হায়, অৱাংবা থাক্কী আর্ত ফোর্ম অমা ওইরিবা, ঙমখৈ লৈতবা শৈরেংনা মীহৌ চাওবা, অপাম্বা কল্লকপনা লাকহৎখ্রবা লাল পাবশিংগী থম্মোইবু মায়থীবা পীদুনা কলিঙ্গা লালগী মতুঙদা নিংথৌরেল অশোক্কী থম্মোয়দা ফাওরকখিবা ৱাখলশিং অদুবু মাঙহন্দুনা লালগী খূৎলায়শিং অদুবু তংদু লৈতাবগী খোওদা নমশিন্দুনা থমগদবনি হায়খি।
থৌরম অদুগী অনীশুবা শরুক্তা শক্নাইরবা অইবা নহাকপা বীরেননা শৈদিন মপু ওইরগা ‘শৈরেং শৈদিন্নবা’গী থৌরম অমসু পাঙথোকখি। মদুদা অইবা অইবী ২০ হেনবনা মাগী মাগী শৈরেং পানখি। মাউন্ত এভরেস্ত কলেজ সেনাপতিনসু অহানবা ওইনা ৱার্ল্ড পোইত্রি দেগী থৌরম অমা ঙসি কলেজ অসিগী দিপার্তমেন্ত ওব ইংলিশনা শীন্দুনা পাঙথোকখ্রে।
দোনকাওলুং মলাংমৈনা থৌরম অদুগী কি নোত এদ্রেস পীরদুনা, য়ানবা মতম লাকপদা, শৈরেংনা য়াদবা ৱাফমশিং পুথোক্তুনা মীয়ামগী খোল্লাও পুথোকপা ঙমহল্লি। মসিনা তোঙান তোঙানবা খোঞ্জেলশিং, ৱাখল্লোনশিং অমসুং এক্সপরিএন্সশিংনা তংদু লৈতানা পূন্না হিংহনবা ঙম্মী হায়খি।
ৱার্ল্ড পোইত্রি দেগী থৌরম অদুগা মরী লৈননা ইন্তর দিপার্তমেন্তেল পোইত্রি রিসাইতেসন কম্পিতিসন অমা পাঙথোকখি। কম্পিতিসন অদুদা সোসিওলোজি দিপার্তমেন্তকী এঞ্জেলিনা থেকনা অহানবা, বোতনি দিপার্তমেন্তকী জিয়নরৈলুং মলাংমৈ অমদি তিচর এদজুকেসন দিপার্তমেন্তকী সন্দেরোজ ফুমাইনা অনীশুবা অমসুং ইংলিশ দিপার্তমেন্তকী এনজি জিপানে লনানা অহুমশুবা পোজিসন তাখি।
সোর্স: পোক্নফম
0 কমেন্ট:
কমেন্ট তৌবিয়ু