ইম্ফাল, সেপ্তেম্বর ৬ : মীতৈ মরুপ, মীতৈ লৈপাক্না শীন্দুনা ১৩৫ শুবা লাইনিংহল নাওরিয়া ফুলোগী মপোক নীংশিং থৌরম ঙসি ৱাংকৈ থম্বালখোংদা লৈবা লূপ অসিগী হেদ ওফিস, মীতৈ শঙলেন্দা পাঙথোকখ্রে। মীতৈ মরুপকী এদভাইজর সরাংথেম শ্যামদাসনা মচু তরেৎকী ফীরাল চিংখত্তুনা অমসুং লাইনিংহল নাওরিয়া ফুলোগী ফোটোদা হৈকৎ-লৈকৎ তমদুনা হৌদোকখি।

থৌরম অদুদা মীতৈ মরুপ, মীতৈ লৈপাক্কী সেক্রেতরি জেনরেল অঙোমচা সোরাম গোজেন্দ্রো মীতৈনা হায়, লূপ অসিনা ১৯৪৫ দগী হৌনা লাইনিংহলগী মপোক নীংশিং থৌরম অসি পাঙথোক্তুনা লাক্লি। অদুবু লমদম অীসগী ওইরিবা ফীবম অসিনা চহী অসিগী ওইনদি মমিংখক্তগী ওইনা থৌরম অসি পাঙথোকপনি।

মহাক্না হায়, হৌখিবা পুৱারীগী তাঙ্কক অমদা মৈতৈ অসি তুমদুনা লৈরুবদগী অতোপ্পা ঈরুপকী মাঙদা ইকায়বা নংখিবা অদুনা লাইনিংহল নাওরিয়া ফুলোনা মীতৈগী মাঙলুলরবা মুৎলুরবা কয়া অমা থিজিন্দুনা ১৯৩০ গী এপ্রিল ১২ দা অপোকপা মরুপ অসি কাছারগী লাইশ্রম খুলদা লিংখৎখি। মতম অদুগী হিন্দু খুন্নাইগী মফমদদি মখোয়গী মায়োক্তা চত্থরকপনি খনবনা লাইনিংহলবু মাঙখিবনা মুৎখিবনা হোৎনবা কয়া লৈখি। অদুবু মহাক্না পূম্নমক অসি নমথদুনা লূপ অসি মথং মথং শন্দোরকপদগী মীতৈ লৈবাক্তা মীতৈ কন্ননবা, মীতৈগী মাঙখ্রবা মুৎখ্রবা পুৱারী, লাইনিং লিচৎ অমদি মীতৈ খুদীংমক হিংগৎহন্নবগীদমক অহল অহুমদা থৌগায় শিন্নরমদুনা ১৯৪৫ দা মীতৈ মরুপ অসি মফম অসিদা লিংখৎখি। লাইনিংহল অসি ১৯৪১ দা লৈখিদ্রবা মতুং ১৮৪৫ দা মহাক্কী ৱাখল্লোন অসি মীতৈ লৈবাক্তা য়ৌরকপনি।

লাইনিংহল নাওরিয়া ফুলোগী মপোক নীংশিং থৌরম অসি স্তেতকী থাক্তা পাঙথোকহনবীয়ু হায়না গর্বনমেন্ততা মেমোরেন্দম কয়া পীশিনখিবা লৈরে। মসিগা লোয়ননা মহাক্না মতম চঙনা ৱানা থিজিল্লম্বা মণিপুর গবর্নমেন্তনা ইন্থেঅক্তুনা থম্লিবা ‘মীতৈ য়েলহৌ ময়েক’ (ময়েক ৩৬) অসিসু গবর্নমেন্তনা লৌখত্তুনা প্রাইমারিগী থাক ফাওবদা তমহনবীয়ু হায়না মেমোরেন্দম পীশিনখ্রে। অদুবু ঙসি ফাওবা গবর্নমেন্তনা থবক্তা ওন্থোক্তুনা লৈরি। পূম্নমক অসি থবক্তা ওন্থোকপীদুনা লাক্কদৌরিবা চহীদগী লাইনিংহলগী মপোক নীংশিং থৌরম অসি স্তেতকী থাক্তা পাঙথোকহনবীয়ু হায়না গোজেন্দ্রোনা ফোঙদোকখি।

থৌরম অদুদা এগ্রিকালচার দিপার্তমেন্তকী রিতয়ার্দ এগ্রিকালচার ওফিসার খাঙেম্বম মঙ্গিজাওনা চীফ গেস্ত, মীতৈ মরুপকী এদভাইজর সরাংথেম শ্যামদাসনা প্রেসিদেন্ত অমসুং লুপ অসিগী মেম্বার সরাংথেম গোপালদাস মীতৈনা গেস্ত ওব ওনর ওইনা শরুক য়াখি।

সোর্স: পোক্নফম