১২৬ শুবা কবি হৱাইবম নবদ্বীপচন্দ্রগী মপোক কুমওন পাঙথোকখ্রে
ইম্ফাল, নভেম্বর ৬ : নহারোল সাহিত্য প্রেমী সমিতি ইম্ফালনা শীন্দুনা অনৌবা মণিপুরী খোরিরোলগী লময়ানবা কবি হৱাইবম নবদ্বীপচন্দ্রগী ১২৬ শুবা মপোক কুমওন থৌরম অমসুং ‘হৌজিক্কী মণিপুরী সাহিত্য অমসুং লোনয়ান’ হায়বা হীরমসিদা সিম্পোজিয়াম অমা ঙসি মণিপুর প্রেস ক্লাবতা পাঙথোকখ্রে।
থৌরম অদুদা মণিপুরী সাহিত্য পরিষদ, ইম্ফালগী প্রেসিদেন্ত লোংজম জয়চন্দ্রনা চীফ গেস্ত, নহারোল সাহিত্য প্রেমী সমিতি ইম্ফালগী প্রেসিদেন্ত নাওরোইবম ইন্দ্রমণি অমুসং রিতয়ার্দ আই এ এস কাংজম রাধাকুমারনা গেস্ত ওব ওনার ওইনা শরুক য়াখি।
নহরোল সাহিত্য প্রেমী সমিতি ইম্ফালগী জেনারেল সেক্রেটারি দাঃ হুইরেম তেম্বনা হায়, নহারোল সাহিত্য প্রেমী সমিতি ইম্ফালনা মণিপুরী সাহিত্যগী লময়ানবা তরেৎপু নীংশিংদুনা মখোয়গী মপোক কুমওন চহী খুদীংগী লেপ্তনা পাঙথোক্তুনা লাক্লি। লময়ানবা তরেৎকী মনুংদা অমা ওইরিবা হৱাইবম নবদ্বীপচন্দ্র অসি য়াম্না ঙন্না লৈখিদবা ওইরবসু মহাক্কী তেনখ্রবা পুন্সিগী তাঙ্কক অসিদা তৌবা য়াবা থবক কয়া পাঙথোকপীরম্মী। মদুগীদমক মহাক্কী মফমদা লৈ কত্তুনা মণিপুরী সাহিত্য চাওখৎপা য়াবা তোপিক্তা সিম্পোজিয়াম কয়া অমা পাঙথোক্তুনা লাক্লি। মসিগী শরুক অমা ওইনা ঙসিগী থৌরম অসি পাঙথোকপনি।
থৌরম অদুগা মরী লৈননা দাঃ লোংজম আনন্দনা ‘হৌজিক্কী মণিপুরী সাহিত্য অমসুং লোনয়ান’ হায়বা হীরমদা পাঙথোকখিবা সিম্পোজিয়াম অদুগী ৱাঙাঙলোয় ওইখি। থৌরম অদুদা শরুক য়াখিবা খোরিরোলবু পামজবশিংনা লৈখিদ্রবা কবি হৱাইবম নবদ্বীপচন্দ্রগী ফোটোদা লৈ কত্তুনা ইকায়খুম্নবা ঊৎখি।
পনবা য়াই, ইং কুমজা ১৯৩০ গী থাগী চেফোঙ ‘য়াকাইরোল’ দা হৱাইবা নবদ্বীপচন্দ্রনা চাং নাইনা শৈরেং ইদুনা হাপ্লম্মী। মহাক্না ইরম্বা শৈরেংশিংদা মণিপুরী লোলগী ফজবা মশক, অচুম্বা ৱাহৈনা লেংশিনবগী হৈ-শিংবা কয়া অপাবশিংনা ঊখি। লাইবক থীবদি মহাক্কী মখূৎমক্না ইবা শৈরেংশিংগী নোট বুক অদু লান মমাঙদা মাঙখিদুনা থিবা ফংখিদ্রে হায়রি।
সোর্স: পোক্নফম
0 কমেন্ট:
কমেন্ট তৌবিয়ু