জুদোদা মণিপুরনা গোল্ড মেদল ২, সিলভর মেদল ২, ব্রোঞ্জ মেদল ২ অদুগা বোক্সিংদনা ব্রোঞ্জ মেদল ৩ লৌবা ঙমখ্রে।
ইম্ফাল, নভেম্বর ০৭ : গোৱানা য়ূম্বু ওইদুনা হৌজিক হৌজিক চত্থরিবা ৩৭ শুবা নেসনেল গেমসকী ওইনা ঙসি তোঙান-তোঙানবা দিসিপ্লিনশিংদা মণিপুরগী শান্নরোয়শিংনা গোল্ড মেদল ২, সিলভার মেদল ২, ব্রোঞ্জ মেদল ৫ পূন্না মেদল ৯ লৌবা ঙমখ্রে।
জুদো মশান্নগী ওইনা ঙসিসু মণিপুরগী শান্নরোয়শিংনা গোল্ড মেদল ২ লৌবা ঙমখি। ঙসি গোল্ড মেদল লৌখ্রবা জুদোকাশিং অদুদি কেজি ৬৬ কেটগোরিগীদা এল জগদিশ অমসুং কেজি ৪৮ গী কেটেোরিদা এল সনাতোম্বীনি। কেজি ৪৮ গী কেটগোরিদা এল মোনালিশানা সিলভর অদুগা কেজি ৬৩ গী কেটগোরিদা ঐচ সুনিবালানা সিলভার মেদল লৌবা ঙমখি। অদুগা কেজি ৫২ অমসুং কেজি ৬৩ গী কেটগোরিদা মথংশিৎনা এন সর্দা অমসুং আই কল্পনানা ব্রোঞ্জ মেদলশিং লৌবা ঙমখিবনি।
ঙরাং নেসনেল গেমসকী ওইনা জুদো হৌদোকপা নুমিৎতা মণিপুরনা গোল্ড মেদল ২ লৌবা ঙমখিবনি। কেজি ৭০ গী কেটগোরিদা টি ইনুংঙানবীনা গোল্ড মেদল ১ অদুগা কেজি ৭৮ গী কেটেোরিদা এম ইন্দুবালানা গোল্ড মেদল অমা লৌবা ঙমখিবনি। জুদো মশান্না নেসনেল গেমসকী ওইনা হয়েং লোইশিল্লগনি। লোইশিনবা নুমিৎতসু মণিপুরগী শান্নরোয়শিংনা মেদল লৌবা ঙমগনি হায়বগী চাওনা থাজবা লৈ।
অমরোমদা, বোক্সিং মশান্নগী ওইনা ইলিট মেনগী কেজি ৪৮-৫১ কেটগোরিগী ওইনা ঙসি শান্নখিবা সেমীফাইনেল মেটচ অমদা মণিপুরগী পুখ্রম্বম জেক্সন সার্ভিসেস স্পোর্টস কন্ট্রোল বোর্দ (এস এস সী বি) গী চৌগাথম বিশ্বামিত্রগী মখূৎতা ৪-১ দা মায়থীহৌবদগী ফাইনেল য়ৌবা ঙমখিদ্রে। মদুনা মরম ওইরগা জেক্সননা ব্রোঞ্জ মেদলদা লৈহৌখিবনি।
অমরোমদা, ইলিট উইমেনগী কেজি ৪৮-৫০ কেটগোরিগী ঙসি শান্নখিবা সেমীফাইনেল মেটচতা গোৱাগী সাক্সিনা মণিপুরগী আশালতা চনুবু মায়থীবা পীরম্লগা ফাইনেল চঙখ্রে। আশালতা চনুসু ফাইনেল য়ৌবা ঙমদবদগী ব্রোঞ্জ মেদলদা তাহৌখিবনি। অতোপ্পা মণিপুরগী নুপী বোক্সার ওজিবালা থৌনাওজমসু ব্রোঞ্জ মেদলদা লৈহৌরে। ইলিট উইমেনগী কেজি ৫২-৫৪গী কেটগোরিদা ওজিবালা থৌনাওজমনা উত্তর প্রদেশকী প্রজাপতি আইসেগা থিন্নখি। মদুদা প্রজাপতি আইসেনা ওজিবালাবু ৪-১ দা মায়থীবা পীরম্লগা ফাইনেল চঙখিবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু