য়ু এস এ গী নিউ ইয়র্কতা শজিবু চৈরাউবগী থৌরম পাংথোকখ্রে
নিউ ইয়র্ক, মার্চ ২৩ : হৌখিবা ২০ মার্চ, ইরাই নুমিৎতা নোর্থ আমেরিকান বাংলাদেশ মণিপুরী সোসাইটি (এন এ বি এম এস), নিউ ইয়র্কনা শিনলাংদুনা, শজিবু চৈরাওবগী থৌরম (৩৪২৪ মলিয়াকুম) হরাও তয়াম্না পাংথোকখ্রে। নিউ ইয়র্ককি কুইন্সতা লৈবা কমিউনিটি হোল অমদা নৈনা-মিফম, রাউন্ড টেবিল ডিস্কাশন অমসুং ঈশৈ-জগোয়গী থৌরম কয়াগা লোয়ননা নোংমগী ওইবা থৌরম অদু পাংথোকখিবনি।
গেস্ট অব অনর বিনালক্ষ্মী নেপ্রমবু সোসাইটি অসিগী প্রসিদেন্ট সুনীল সিংহনা তরাম্না ওকপগী মতাং অমা
মনিপুরগী শক্নাইরবা হিউম্যান রাইটস এক্টিভিস্ট, ইন্টারনেশনেল পিস ব্যুরো ( আই পি বি)গী ভাইস প্রসিদেন্ট, গ্লোবেল এলায়েন্স ওফ ইন্দিজিনস পিপল, জেন্ডর জাস্টিস এন্ড পিস ওর্গানাইজেশনগী ফাউন্দর অমদি ময়াম্না শিংথারবা মনিপুর ওমেন গান সার্ভাইভর্স নেটৱার্ককি ডিরেক্টর বিনালক্ষ্মী নেপ্রমনা গেস্ট অব অনর ওইদুনা পাংথোকখিবা থৌরম অদুদা নিউ ইয়র্ক সিটিগী অকোয়বদা লৈবা মৈতৈ অয়াম্বনা শরুক য়াখি হায়রি। গেস্ট অব অনর বিনালক্ষ্মী নেপ্রমনা হায়, “পোক্নফম লমদমদগী তাম্না লৈরবসু অসুমাইনা নাৎকি ওইবা থৌরমদা য়াওবা ফংবসি য়াম্না নুঙাইজৈ, ঐখোয় মালেমগী থাক্তা মাইনোরিটি রাইটসকি মতাংদা পুন্না তৌবিনগদবা থবক য়াম্না লৈরি।''
মরু ওইবা থৌরম পরেং হৌদ্রিঙৈদা, শিন লাংলিবা লূপ অসিগী থৌবুরেল অমদি কমিউনিটিগী অহল-লমন, শক্নাইবশিংগা বিনালক্ষ্মী নেপ্রমগা পুন্না ৱারী কয়া শান্নখি। মনিপুরদা থোক্লিবা কুকি-মৈতৈগী থোকহন্নিংদ্রবা ইস্যু, ক্রাইসিস অমসুং ডায়াস্পোরা কমিউনিটিগী ইস্যু কয়াগী মতাংদসু মশা-মশাগী ৱাখল্লোন কয়াসু ফোংদোকনখি হায়রি।
সোসাইটি অসিগী প্রসিদেন্ট সুনীল সিংহনা থৌরম মপূ অমসুং এক্স জেনারেল সেক্রেটারী হামোম নানাচানা কন্ডাক্ট তৌখিবা নৈনা-মিফম অদুদা অতৈসু ৱা ঙাংবিখি সোসাইটি অসিগী জেনারেল সেক্রেটারী মুতুম অপু, চাউবা মেমোরিয়েল মণিপুরী আই পি মিউজিয়ামগী ফাউন্ডার হামোম তনুবাবু অমদি মফম অদুদা লৈরিবা কমিউনিটিগী অহল লমন অমসুং সোসাইটি অসিগী থৌমি কয়াসু ৱা ঙাংখি। থৌরম অদুগী অরোইবদা মালেমগী মীওই খুদিংগী নুঙাই য়াইফবা, খুন্নাইসিদা ঈং-তপ্পা চাওখৎপা পুরকপা ওইরসনু হায়না তাইবং শেম্বা মপুদা থৌনিজখি হায়রি।
থৌরমগী অরোইবদা নুংথিলগী চাক্লেন চামিন্নদুনা থৌরম অদু লোয়শিনখি।
0 কমেন্ট:
কমেন্ট তৌবিয়ু