• 51
• ২৮শে সেপ্টেম্বর ২০২৬ ইং
• Share on:

মণি অবুজমগী 'লৌনম লাংদা থুরবা' - এম এ হাসিম

লাইরিক্কি মমিং : লৌনম লাংদা থুরবা (শৈরেং)
অইবা : লুৱাংচা অবুজম মনিভদ্র
অফোঙবা : বাংলাদেশ মণিপুরী সাহিত্য সংসদ
অহানবা ফোওবা: ২০২২

মণি অবুজমগী 'লৌনম লাংদা থুরবা' মিংথোনবা শৈরেং লাইরিক অসি পাজরে। লাইরিক্কী নুংগী ওইবা ৱাবু ঐনা কমদৌনা ইতীক নত্তনা নৈনরুগনি। অদুম্নদি ওইরগা ৱাহৈ অমা অনী হায়দনদি লৈথোকপা ঙমদ্রে। মরম অসিনা ঙসি, লাইরিক অসি পাজরুবদা ফাওরকপা ৱাহৈ মঙা তরা পাউদমজরি।

লুৱাংচা অবুজম মনিভদ্র বাংলাদেশ মৌলবীবাজার জিলাগী কমলগঞ্জ থানাগী মনুং চনবা ভানুগাছকী হোমেরজান মৈতৈশিংনা নীলকুঠি নৎত্রগা নগর হায়নসু খঙনবা খুঙ্গংদগীনি। লাইরিক ইনীংলুবগী মরম কবিনা পাউদম্মী। মহাক্লা ক্লাস সেবেন/আইত তম্বা মতম অদু ফাওবদা মীতৈলোন্দা ইবা লাইরিক য়াম্না মরাঙ কায়না থেংনজবা ফৎখিদে, য়াম্ন তাঙনা থোকই। মহাক্না হায় মদুদি মহাক লাইফ স্ট্রগলনা মরম ওইবনা ইবগী মায়কৈদা থোইনা মায় ওনশীনবা ঙমখিদে অদুবু ইবগী খোংচৎতি লেপখিদে, তপ্ন-তপ্না হৌখি।

লাইরিক অসি 'বাংলাদেশ মণিপুরী সাহিত্য সংসদ' (বামসাস) কী থৌবুরেল ওইবিরিবা বাংলাদেশ মৈতৈগী সাহিত্য খোংচৎতা লুচিং পুরেল ওইবিরিবা কবি এ কে শেরাম ওজাগী হোৎনজমন্না লাইরিক অসি পুথোকখিবনি তাকপিরি। অপেনবা পোকচৈ।

মণিপুরী লোল (মৈতৈলোন) অসিগী তাঙ্কক খুদিংদা থৱায় পীরিবা নুংশিরবা শৈরোল 'ইমা লোল্' অসি য়াম্না নীংথিবা অমসুং থোইদোক-হেন্দোক্না মতীক-ময়াই চেনবা মৈতৈলোনবু শৈথাবা শৈরেং অমা কবিনা খুদোল তৌরকই:

ইমা লোল্
ইমা লোলনা ঙাঙলসি
ইমা লোলনা শক্লসি
ইমা লোলনা শোল্লসি
ইমা লোল নিংলসি।
ইমা লোলমা মঙ মঙলসি
ইমা লোলনা খবোম থন্না লাউরসি
ইমা লোল চাওখৎ থৌদাং লৌরসি
ইমা লোল্ মতিক্ মঙাল্ ফুদোকহল্লসি
ইমা লোল্ মালেম শিন থুংনা ঙালহল্লসি
ইমা লোলগী নুমিৎনা লাকপসিদা
নৌনা অমুক ৱাশক্ লৌরসি
ইমা লোল্ কৈদৌঙৈ মীরায়রোইসি।

কবিনা হায়:
"ইমা লোলনা ঙাঙলসি, ইমা লোলনা শক্লসি..."  হায়না পল্লিবসি কবিগী লোল (mother tongue) অসিবু ঐখোয়গী ঙাঙবা, শৈশকপা, থৌগল তৌবা অমসুং মঙ মঙবগী পুম্নমক্তা শীজিন্নদুনা ঐখোয়গা ইমা লোলগা খাইদোকপা য়াদবা অমা ওইরিবসি উৎলি।
ইমা লোলবু চাওখৎহনবা অমসুং মালেমদা মমিং লৈহনবা, ইমা লোলবু মালেম শীনবা থুংনা মাগী মতীক-ময়াই উৎথোকহনবা, ইমা লোলগীদমক্তা থৌদাং লৌবা অমসুং মালেমগী থাক্তা কাহনবগী ৱাখল্লোন অমসুং ইথিল পীরি।

ৱাশক অমসুং থৌরাঙঃ
"ইমা লোলগী নুমিৎনা লাকপসিদা, নৌনা অমুক ৱাশক্ লৌরসি..." হায়রিবা অসিনা মখা তান আন্তর্জাতিক ইমালোল নুমিৎ (International Mother Language Day- February 21) অমসুং ইমালোলগী নুমিৎ থৌরমশিংদা ইমা লোলবু কাউথোক্তনবা অমসুং কৈদৌঙৈদা মীরায়দনবা (কৈদৌঙেদা মাওহন্দনবা) নৌনা ৱাশক লৌনবা থৌরাঙ পীরি। লোইবা লৈতবা ইমালোলবু নুংশিবা অমসুং মতীক চাবা অসি শৈরেং অসিনা য়াম্ন ফজনা উৎলি। কবি অসি শৈরেংদা লৈতেং হাপ্তুনা ইবা পকচৈ। য়েংবা য়াই:
অরাপ্পদা লেপ্পগা
ইনাক্ত লৈরবগা মানা লাপথোকখ্রে
শাগৎলুবা মাঙলান নিংখায়খ্রে
ইহাঙ হাঙনা অসুম লৈহৌরে
মতমগী খোঙলৈনা পুদুনা চৎগ্রে
................... 
.....…............
উনা উনা উশিন্নদবা শারদুনা
নুমিৎকী মঙাল ফংদবা থাজনা।

কবিগী মথক্কী শৈরেং অসি লৈতেং ( Alliterative Devices/Figure of Speech) অসিদা Alliteration য়াওরি। পাবা নুংঙাইহল্লি। লাইরিক্কী লামায় ১১ দা 'মীওইবা' হায়না মিংথোনবা শৈরেং অমা থেংনৈ। কবিনা শৈরেং অসি ইন্তরোগেতিব মেতাফর ওইনা ৱাহং হংলকই মদুদি ঐখোয়গী ফজরবা মালেম অসিদা ইচীন-ইনাও অমগা অমগা হাৎনরিবা অসিদা করম্না ফজবা মালেম ওইরগনি, কৌগনি। কবিনা হায়ঃ কদায়দনো ঐখোয়গী মিরমলেন মশা হিংনবগী মীবু হাত্তোক্লি... কদায়নো ঐখোয়গী মীনুংশি/চাবা ফঙদবনা মথবাক শরু কাপখৎলি।

'Refugee Blues' by W. H. Auden (1939) লাইরিক অসিদা কবিনা হায়রিবা অসিগা খরমখৈ মান্নৈ।

Say this city has ten million souls, Some are living in mansions, some are living in holes:
Yet there's no place for us, my dear,
yet there's no place for us.
হিংদবদি য়াদে অদুনা 'শিন্থরি পিরাং' মিংথোনবা শৈরেংদা কবিনা অসুন্না হায়:
... শিন্থরি পিরাং হরাও মথোই কারদুনা পুক্নিঙদা অপেনবা ফাওবগী মীৎলু পিরাং উত্থোকলি পিরাং লৎনবা লৈতনা মীমাঙদা ফোংনা চাউথোকচৈ শিন্থরিবা পিরাংগী। (শিম্বরি পিরাং, লা. ৩০)
মসিদি হিংবদা মায় পাকপগী পিরাং ওইনি। Robert Herrick (1591-1674) অমদি মাগী Classic Poem 'Tears' হায়বা ময়েক অদু নীংশিংহল্লি:
"Tears are the noble language of the eye..." Robert Herrick
বাংলাদেশতা লৈবা মৈতৈ অমসুং মৈতৈ পাঙল কবিশিং কল্লকচৈ। মখোয়গী ৱাহৈ-ৱাতা খুফোঙদোক ফজবা লৈ।

কবিনা মীওইবনা হিংলবগী মতু হিংনা হিংনা লৌনম লাংদা পুরকই। অদুনা মহাক্কী মিংথোল শৈরেং ওইরিবা 'লৌনম লাংদা থুরবা' শৈরেং অসি পাদবা ঙমদে:
"ঐদি নঙগী লৌনম লাংদা খুরবা চেক্লানি। পুবিউ ঐবু নঙনা পুনিঙবা মায়গৈ তম্না/লৈজদে ইতিফমদগী নান্থোক্লা চেনবা/ঐগী অপাম পামদগী মমল লৈতে নফমদা/নঙগী অপাম্বনা ওইরি ঐগীসু অপাম্বা।"
শৈরেং অসিসু ফজবা অমা ওইরি। শৈরেং অসিদা কবিনা অসুম্না লৌনম লাংদা থুরুবগী ৱারী লীনা লীনা কবিনা হায়:
'...ঐনা হৌজিক ফাওবা হিংলিবা/ঐগী অখাঙ কনবগী শক্তিনি/নঙনা থাক্লিবা লৌনম লাংদি/নঙগী কল্লক মীয়াম্বগী শক্তিনি।"
শৈরেং অসি পারুবদা থম্মোয়দা খল্লুই কয়াদা মান্নরিবা Maya Angelou গী Caged Bird'
"The caged bird sings
with a fearful trill
of things unknown
but longed for still
for the caged bird
sings of dream."
মীওইবনা মায় পাকপা মতমদা মীনা চেনশিল্পি।
মীওইবনা অৱা-অনা তারবা মতমদা কনানসু মনাক্ত লাক্তে। অদুনা 'পুন্সি লানঙম' হায়বা শৈরেং অসিদা কবিনা পেন্না ফোঙদোকই।
"...ষন অশিবা মনাক্তা লেপ্পগা প্রায়শ্চিত নংঙি মতা

ননাক্ত লেপ্পিনবা কনামতা উবা ফংদে 
লেপ্পু লেপ্পবদি লানঙমনি খনখ্রমান্নে...।

হিংলবনিনা কবিনা অসুম্না নীংতম্বা শৈরেং ইরকই। মহাক্কী শৈরেংদা মায়োন লোঙলবসু মপূংদি পুন্সি নৈনবনি। মীওইপোক মপুগী অশেংবা চাউরবা খুদোলনি। পোক্লবদি শোয়দনা শিগনি। শৈরেং অসি য়েংবিয়ু -- নুংশি কিশি:
পোক্লবদি পুন্সিগী অহৌবা লৈশেমলোল মপুগী অথোয়বা খুদোল/শিনরকপা থৌদাং  লৌরি পুন্সিনা।
......................
অশিবদি পুন্সিগী অরোইবা
নোংদমখোল মপুগী শোয়ফদ্রবা
পোকপু পোক্লবদি নোংমদি শোয়দে।
"Life is real! Life is earnest!
And the grave is not its goal;
Dust thou art, to dust returnest,
Was not spoken of the soul."
- Henry Wadsworth Longfellow কবিগী শৈরেং লাইরিক অসি 'মৈচাক' হায়না মিংথোনবা শৈরেং অমনা লোইশিল্লি। লামায় ১১২ পানবা শৈরেং লাইরিক অসিগী অরোইবা লামায়নি। পামিন্নসি,
মৈচাক
চাক্লবা ময়াম্ চাক্লা লোইখ্রে
অতৈ অহেনবা চাক্নিংঙাই লৈত্রে
 তাঙ্গোই মপৈ ওনগদবদা ঙায়রে।

পাঙ্গল মতম্ ফরিঙৈ তাঞ্জাদা 
অয়িঙ অশা তুজুংবা লৈখিদে 
ৱাখলনা য়ুুবা মফমদা য়ৌরুরি

ৱাখল্ মাসু মমি শাম্লক্লে
পলেপফম্ খঙদনা ইতোম ককঙাওনরে
চৎকদবা লম্বি চঙখিদবনা লম্মুক্নরুরে।

John Keats কী শৈরেং 'When I have Fears' অনী অসি পামিন্নবা য়াই। কবিগী শৈরেং মায় পাক্লে হায়বা য়াই। মতীক অদুমক চায়। ৱাহৈ-ৱাতা খরা থৈদোক-থৈজীন লৈরিবা অসিদি লৈবা তাবনি। লৈফমগী, ৱাঙাঙগী মখা পোল্লি। মসি হায়দুনসু অশোয়বা লৈরে হায়জবা নত্তে। কবিগী শৈরেং লাইরিক মায় পাক্লবনি। মতুংদা পুথোরক্কদবা লাইরিক ঙাইজরি। থাগৎচরি।