`` হিংননবা থবক শুবদবু ময়াংগী থবক, মৈতৈগী থবক হায়বা লৈব্রা ''
ইম্ফাল, ওক্টোবর ১৫: মতম অমগী মণিপুরগা ঙসি ঙসিমক ওইরিবা ফীভমগা তোঙান তোঙানবা হীরমশিংদা পুংহোং হোংবা ফীভমশিং লৈরকপগা ইরোয়ননা মীতৈ মচাশিংগী মরক্তগীসু হিংনবগী লানফমদা থবক শুববু ময়াংগী থবক নৎত্রগা মৈতৈগী থবক হায়বা অমমুক লৈব্রা হায়রদুনা লাইরিক লাইশু মতোন লোম্না তম্বসু ঙমহৌদবা অদুগা হিংদবসু য়াদবা মৈতৈ নহারোল কয়া খ্বাইরম্বন্দ কৈথেলদা থোক্তুনা অফং অফংবা থবক শুরকপগা লোয়ননা মপান্দগী লাকপা নন লোকলশিংনা তৌরকপা থবক ইনখাং ফাওবা মহুৎ শিনবা য়াওরক্লে।
পূক্নিং থৌগৎনীংঙাই ওইরবা তোঙান তোঙানবা শিনফমদা খোঙদারক্লবশিংগী মনুংদগী অমা ওইরিবা থাঙ্গা লৱাইগী সাপম শ্বামিনা পাউচে অসিদা হায়, খ্বাইরম্বন্দ ইমা কৈথেলগী অকোয়বদা মৈতৈ মচাশিংনা মশা মশাগী শিনফম ওইনা তৌবা য়াবা থবকশিং তৌদুনা শেল তান্নবা হোৎনরকপগী মশীং হেনগৎলক্লবদি নন লোকলশিংগী মশীং তপ্না তপ্না হন্থরকপসু য়াই হায়খি।
মহাক্না হায়, খ্বাইরম্বন্দ কৈথেলদা লৈরক্তুনা শেন্দান লম্বীদা চঙশিল্লকপা চহী ৩ শুরক্লে। মতম মতমগী ওইনা য়োনবা য়াবা পোৎ চৈশিং য়োল্লি। মতম মতমগী ওইনা য়োনবা য়াবা পোৎ চৈশিং য়োল্লি। পোৎ চৈশিং অদুগী মনুংদা ‘পানি পুরি’ সু য়াওই। করিগুম্বা মতমদা ‘মোমো’ সু য়োল্লি। হরাও কুম্মৈগী মতম অমসুং কাংগী মতমদনা অঙাংগী শান্নপোৎ অমদি বোলনচিংবা য়োল্লি। য়াওশঙদনা পেসকারি, নোংমৈনচিংবসু য়োল্লি। দিৱালিগী মতম হৌজিক লাক্কদৌরে। মমাঙদসু হায়রিবা মতম অসিদা কেন্দল য়োনখি। হন্দকসু য়োনগনি। নিংঙোল চাক্কৌবগীদমক্তনা ফিরোলসু অমুক য়োল্লি হায়খি।
মতম মতমগী মতুংইন্না পোৎ চৈশিং হোংদোক হোংজিন তৌদুনা য়োল্লিবসি শেন্দোং খরদং ওইরবসু ফংনবা হোৎনবনি। মতম মতমগী মতুংইন্না মরী লৈনবা পোৎলমশিং য়োনবসু শেন্দোং ফংবা হেল্লি। হৌজিক পানি পুরি য়োল্লিবা অসিদসু শেন্দোং ফংদবদি নত্তে। নোংমদা লুপা লিশীং ১গী মথক্তা ফংই। পানি পুরি য়োন্নবগৎী শেম শাবা মথৌ তাবা থাও লৈবা, হৱাই লৈবা অমসুং মঙ্গে মহি শেম্বা য়াওনা ষ্টোপকী কেরোসিন লৈনবা হোৎনবদা লুপা লিশীং ১ রোম চঙই। অদুবু শেম্লবা মতুংদদি লুপা ২৪০০/২৫০০ রোম শিৎপা ঙম্মী। মরম অসিনা নোংমদা য়ামদ্রবদা লুপা লিশীং ১গী মথক্তা শেন্দোং ফংই হায়রি।
অহানবদা য়োনবা হৌগৎলকপদদি পোৎশিৎ ৱাৎলম্মী অদুবু হৌজিক্তি মৈতৈ মচানসু শেমদুনা য়োল্লকপনা মীয়াম্না লৈদুনা চানবগী চাংসু তপ্না তপ্না হেনগৎলক্লে। অচাপোৎ ওইবনা য়োন্নীংবা মমলদা য়োনবগী খুদোংচাবদি লৈতে। অদুবু হিংনবগীদমক্তদি মরু ওইবা পাম্বৈ অমা ওইরে হায়খি।
কৈথেল মনুঙদা য়োনবনা মী য়াম্না চিনবা মতমদা য়োনবা নুংঙাইতবা, য়োনবা য়ারক্তবা অমসুং য়োনফম লৈতবসু য়াওই। অদুগুম্বা মতমদা কৈথেলগী মসি/কাচিনদা চঙশিল্লগা লম্বী অচৎ অওক তৌবশিংদা অমুক য়োননবা হোৎনৈ। মহাক মশাগী চাবা থকপগী কাইথোকখ্রগা য়ূমদা থা অমদা লুপা লিশীং ২০ থাবা ঙম্লে হায়খি।
মহাক্কী লৈফমনা কৈথেল ফম্বী ইমা ইবেলশিংগী পোৎ চৈশিং শংবা ওইনা অহিং লেকই। অহানবদদি য়োন্ননবা পোৎ চৈশিং থাংদোক থাংজিন তৌবসু য়াওরকখি। অদুবু হৌজিক্তি অতোপ্পা মমান্নবা অমদা হায়রিবা থবক অদু শিন্নথোকখ্রে অদুগা ইমা ইবেলশিংগী পোৎ চৈ শংবগী মমল লুপা ২০-৩০ লৌনরম্বনি অদুবু মহাক্কী ওইনদি হৌজিক্তি লৌদ্রে হায়খি।
ক্লাস টেন তম্বা হৌরক্লগা মখা তানা তম্বা ঙমখিদবদগী তোকখি। য়ূমদা লৈদুনা থবক শুবা নোম্বা খরা চৎলম্মী অদুবু মদুনা তুং কোয়বা য়ারক্তবদগী কৈথেল ফম্বী ইমাশিংগী পোৎ চৈশংবা অমসুং থাংদোক থাংজি তৌবা ওইনা হৌরক্লগা ঙসিদি পানি পুরি শেমদুনা য়োনবা য়াওনা মতম মতমগী ওইবা পোৎলমশিং য়োন্দুনা হিংবা ঙম্লকপনি। অহানবা থোরকপদা য়াম্না ইকায়রম্মী। মায় ফাওবা খুমজিল্লগা য়োল্লম্মী অদুবু হৌজিক্তি ইকায়দ্রে। খঙন-চান্নবা লাকপদা ফাওবা পোৎ য়োনশিনবা হৈরে হায়রকখি।
মহাক্না মখা তানা হায়, মণিপুরগী মীয়াম্না থবক ফংদে অমসুং শেল তিংদ্রগদি থবক তৌবা য়াদে হায়দুনা খন্দোক্তুনা লৈবা চুমলোই। লৈঙাক্কী থবক খক্তনা থবক নত্তে। থম্মোয় শেংনা খাংবা কনবগা লোয়ননা তৌগে হায়বা অমা য়াওনা তৌরকপা মতমদা হিংলোইদবগী মরম লৈতে। মণিপুরদা লাকপা নন লোকলশিংনা শেল তাল্লগা তুংশিনবা অমসুং ময়ুমদা থাবগী হৈনবী লৈরিবা অসিগুম্না ঐখোয়সু তৌবা য়াই। ঐখোয়গী মরক্তগী হীরম খুদিংমক্তা চোংথোরক্তুনা থবক তৌরক্লগদি মপান্দগী লাকপা নন লোকলশিংগী মশীংসু শোয়দনা হন্থরক্কনি হায়খি।
অমরোমদা, খ্বাইরম্বন্দ কৈথেলদা অকে অমৌগী পোৎ য়োনবনা শিনফম ওইরক্লবা লাইশ্রম মোচানা হায়, অহানবদা কৈথেলগী পোৎ চৈশিং শংবা ওইনা কেদোগী মখাদা লৈদুনা থোরকপনি। হৌজিক্তি চহী ৩ রোম ফাজিল্লক্লে। নোংমদা লুপা ৫০০ রোম ফংই। অদুবু কুহ্মৈ ফিয়োং থোরকপা মতমদদি খরসু হেন্না ফংই। পোৎ শুংশিৎ শিৎতবা নুমিৎসু য়াওই। অদুগা খ্বাইরম্বন্দ কৈথেল মনুঙদা মীযাম্না চিল্লগসু য়োনবা য়াদে হায়দুনা তাল্লকপা য়াওই।
পুলিসকী মায়কৈদগীসু য়ারিবমখৈদি য়েংথোক য়েংশিন তৌবী। অদুবু কৈথেল পোৎলক্তা মী চিল্লকপা নৎত্রগা ভিআইপশিং খোঙনা লাকপা য়াওরগদি য়োনফম লৈতবা য়াওই। মহাক নম্বোলগী সঞ্জেনবমদগীনি। মশাগী থবক ফংদনা লৈরম্বদু হৌজিক্তি নুংঙাইবা ফাওরক্লে। ঐখোয় মৈতৈগী মায়কৈদগী অসিগুম্বা শিনফম অসিদা চঙলক্ত্রিঙৈদা মপান্দগী লাকপা নন লোকলশিংনা পোৎ চৈগী মমল য়োন্নিংবা মমলদা য়োল্লম্বা অদুসু ঐখোয় য়াওনা য়োনখৎলকপদগী তৌবা ঙমদ্রে। মরম অসিনা শিনফম অমা ওইনা চপ য়ুংনা তৌগে খল্লগদি মায় পাক্তবা লৈতে হায়রকখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু