হান্নগী মিনিস্তর দাঃ রতনকুমারগী ‘ইমেজিং মণিপুর’ ফোঙখ্রে
ইম্ফাল, সেপ্তেম্বর ২৩ : হান্নগী মিনিস্তর দাঃ কেঐচ রতনকুমারনা ইবা ‘ইমেজিং মণিপুর’ হায়না মিং থোনবা লাইরিক অমা ঙসি জে এন মণিপুর দান্স একাদেমি, ইম্ফালগী ওদিতোরিয়ামদা ফোঙখ্রে।
মণিপুর হিস্তরিকেল সোসাসইতিনা শীন্দুনা সোসাইতি অসিগী ভাইস প্রেসিদেন্ত প্রোফেসার এন বিরাচন্দ্রনা প্রিসাইদ তৌদুনা পাঙথোকখিবা থৌরম অদুদা এম ডি য়ুগী হান্নগী ভাইস চাঞ্চেল্লর প্রোফেসার তোম্বীনা চীফ গেস্ত, মণিপুর য়ুনিভার্সিতিগী হান্নগী দিন প্রোফেসার দব্লিউ নবকুমার অমসুং আর্কাইভিস্ত এন ইন্দ্রমণিনা গেস্ত ওব ওনর ওইনা শরুক য়াখি।
থৌরম অদুদা অইবা দাঃ কেঐচ রতনকুমারনা হায়, মণিপুরগী পুৱারীগী মতাঙদা তোঙান-তোঙানবা ইন্তরপ্রিতেসন থোরক্লিবা অসিদা অচুম্বা অমদি অরানবা কয়া অমা য়াওরি। মসি অচুম্বদা য়ূম্ফম ওইদুনা ইফম থোকই। লম অমসুং পুৱারী নৈনরকপদা ইন্তরপ্রিতেসন অমসুং রিপ্রজেন্তেসন অসি য়াম্না মরু ওই। হিস্তরিকেল ফেক্তশিং অদুদি অদুমক অচুম্বা ওইনা লৈগনি। হিস্তরিকেল ফেক্ত অদুবু কমদৌনা ইন্তরপ্রিত তৌবগে হায়বদুনি য়াম্না মরু ওইরিবসি।
মহাক্কী লাইরিক ‘ইমেজিং মণিপুর’ অসি মহাক্না মমাঙদা ফোঙখিবা অকক্নবা আর্তিকল খরা খোমজিল্লগা পুথোকপনি। মরুওইনা হৌরক্লিবা মহৈরোয় অমসুং নহারোলশিংদা মণিপুরগী পুৱারী অমসুং কলচরগী মতাঙদা কান্নবা খরদং ওইরবসু পীবা ঙমগদ্রা খল্লগা লাইরিক অসি ফোঙবনি হায়না দাঃ রতনকুমারনা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু