স্তেত লেবেল ফেস্তিবেল ওব মণিপুরী ফোক সোং লোইশিনখ্রে
ইম্ফাল, সেপ্তেম্বর ২৩ : মিনিস্ত্রি ওব কলচরগী শেন্থং মখাদা ফিদমনা শীন্দুনা ঙরাংদগী হৌদুনা জৱাহরলাল নেহেরু মণিপুর দান্স একাদেমি, ইম্ফালদা চত্থরকপা স্তেত লেবেল ফেস্তিবেল ওব মণিপুরী ফোক সোং অদু ঙসি লোইশিনখ্রে।
লোইশিনবগী থৌরম অদুদা জে এন মণিপুর দান্স একাদেমিগী দিরেক্তর পুখ্রম্বম বিলাশ, গুরু ইবেমপিশক কলচরেল একাদেমিগী ফাউন্দর প্রেসিদেন্ত লৈমপোকপম আনন্দি দেবী অমদি স্তেত কলা একাদেমি এৱার্দি লৌরেম্বম বেদবতিনা অথোইবা মীথুংলেনশিং ওইনা শরুক য়াখি।
ফেস্তিবেল অসিদা আর্তিস্ত তরেৎ-তরেৎ য়াওবা পেনা, খুলং ঈশৈ অমদি খুনুং ঈশৈগী অপূনবা আর্তিস্ত ২১ না শরুক য়াখি। ফিদমগী সেক্রেতরি শামুরাইলাৎপম অরুনানা হায়, ফিদম অসি য়াম্না নৌরিবা ওর্গানাইজেসন অমা ওইরবসু ঐখোয়গী কালচারদা থৱায় য়াওজবা অমদি ঙাওজবা ওর্গানাইজেসন অমনি।
মহাক্না হায়, মণিপুরী ফোক সোং অসি হেন্না চাওখৎহন্নবগী পান্দমদা ফিদমনা ফোক সোংগী লমদা খঙ-হৈরবা লমদম অসিদা লৈরিবা ওজাশিংগা তানরগা মিনিস্ত্রি ওব কলচরদগী শেন্থং খরা লৌথরগপা অসিগুম্বা প্রোগ্রাম অসি পায়খৎপনি।
মহাক্না হায়, ইপা-ইপুশিংনা থম্বীরম্বা পেনা, খুলং ঈশৈ অমসুং খুনুং ঈশৈনচিংবসি ঙসিগী হৌরক্লিবা আর্তিস্তশিংদা খঙহন্দুনা থায়নদগী লৈজরক্লবা মণিপুরী ফোক সোংশিং অসি তাশিন খোমজিন্দুনা অমুক নৌহৌননা হিংগৎহনবা মথৌ তাই হায়বগীদমক অসিগুম্বা ফেস্তিবেল অসি পাঙথোকপনি।
সোর্স: পোক্নফম
0 কমেন্ট:
কমেন্ট তৌবিয়ু