সিলেট মণিপুরী কাং এসোসিয়েশন (এসকা)-না শক্নাইরবা অইবা এ কে শেরামবু তরাম্না ওকখ্রে
সিলেট, জুন ১৩ : ঙরাং ১২ জুন, ২০২৬ ইরাই নুমিৎ, নয়াবাজার মান্দোবতা চত্থরিবা '' অহানবা ওজা শগোলশেম বিনোদ নীংশিং ইন্টার মণিপুরী কাং টুর্নামেন্ট ২০২৬'' তা সিলেট মণিপুরী কাং এসোসিয়েশন (এসকা)-না শক্নাইরবা অইবা এ কে শেরামবু তরাম্না ওকপগী থৌরম অমা পাঙথোকখ্রে। পনবা য়াবদি, সিলেট সিটিগী মৈতৈশিংনা খুন্দাবা লৈকায়শিং অমদি বাংলাদেশকী মফম কয়াদা চোয়জাইননা খুন্দারিবা মৈতৈশিংগি মনুংদা কাং মশান্না অসি শৌগৎপা ওইনা নয়াবাজার মনিপুরী পাড়ানা শিল্লাংদুনা সিলেট মনিপুরী কাং এসোসিয়েশন গী মতেং লৌরগা '' অহানবা ওজা শগোলশেম বিনোদ নীংশিং ইন্টার মনিপুরী কাং টুর্নামেন্ট ২০২৬'' এপ্রিল ১৭, ২০২৬ তগি চত্থরকপনি। টুর্নামেন্ট অসিদা কাংখুৎ তরা তরেৎ (১৭) অমসুং নুপী কাংখুৎ নিপান (৮) শরূক য়ারি।
কেএইচ. সমেন্দ্রনা কন্ডাক্ট তৌবা তরাম্না ওকপগী থৌরম অদুদা সিলেট মণিপুরী কাং এসোসিয়েশন (এসকা)'গী প্রেসিডেন্ট য়ূম্নাম নৃপেননা থৌরম মপু, কবি এ কে শেরাম না চিফ গেস্ট অমসুং গেস্ট ওব ওনার ওইনা নয়াবাজারগী খুল অহল কৃষ্ণমনি সিংহ, সিলেট দেবালয় রথযাত্রা উদযাপন পরিষদকী প্রেসিডেন্ট এল. প্রশান্ত কুমার সিংহ, বাংলাদেশ মণিপুরী যুব সমিতিগী সেক্রেটারি লাড়ু সিংহ, বাংলাদেশ মণিপুরী সাহিত্য সংসদকী জেনারেল সেক্রেটারি নামব্রম শংকর, কবি রওশন আরা বাঁশি খূৎহৈবম, সোশ্যাল ওয়ার্কার সুরজিৎ সিংহ, সিরাজুল ইসলাম, সনজিত সিংহ অমসুং কে. রাজনীশ সিংহ মঙাল শরূক য়াখি। থৌরমগী অহানবদা বাংলাদেশকী শক্নাইরবা অইবা অমসুং কবি এ কে শেরামদা লেংয়ান অমসুং ক্রেস্ট পীদুনা ইকাইখুম্নবা উৎখি ।
এসকা'গী প্রেসিডেন্ট য়ূম্নাম নৃপেননা কাং টুর্নামেন্ট অসি হৌদোকপগী ৱারোল পীবগা লোয়ননা ওজা এ কে শেরামগী মতাংদসু ৱাফম কয়া থমখি। মথংদা ওজা এ কে শেরাম না মৈতৈগী মশান্না ওইরিবা কাং শান্নবগী মৈহৌরোন অমসুং কাং শান্নবগী নুংগী ওইবা ৱারী কয়াদং শন্দোক্না হায়খি।
থৌরমগী অরোইবদা নুমীৎ অদুগী টুর্নামেন্টতা শরুক য়াখিবা শান্নরোয়শিংগী মনুংদা অথোয় অহেন তাখিবা শান্নরোয়শিংদা মনা য়েন্থোকখি হায়না সিলেটতগী ফংবা পাউ অদুনা হায়রি।
0 কমেন্ট:
কমেন্ট তৌবিয়ু