আপডেট:
image

সঙাই ফেষ্টিভেলগী মনুং চন্না কাং মশান্না হাপ্পীরকপা অসিনা ইপা ইপুনা থম্বীরম্বা মশান্না অসি চাউখৎলক্লগনি হায়না থাজৈ- এল বোবি

ইম্ফাল, নভেম্বর ৩০ : মণিপুর লৈঙাক্না শীন্দুনা হৌজিক হৌজিক চত্থরিবা মণিপুর সঙাই ফেষ্টিভেল ২০২২ গী মনুং চন্না কাং হায়রিবা ঐখোয়গী ইপা-ইপুশিংনা থম্বীরম্বা মশান্না অসি য়াওহল্লকপা অসিনা মশান্না অসি য়াওহল্লকপা অসিনা মশান্না অসি হেন্না হেন্না চাউখৎলক্লগনি অমদি মশান্না অসি হিংদুনা অদুম লৈরগনি হায়না ইম্ফাল ওয়েষ্ট জিলা পরিষদকী উপ-অধক্ষ্য এল বোবিনা ফোঙদোরক্লি।

ৱাফম অসি ওল মণিপুর কাং এসোসিয়েসন্না য়ুথ এফেয়ার্স এন্দ স্পোর্টস (য়াস) অমদি দিপার্টমেন্ট ওফ টুরিজম গভর্ণমেন্ট ওফ মণিপুরগী তেংবাঙগা লোয়ননা মণিপুর কাংশঙ খুমন লম্পাক্তা পাঙথোক্লিবা ৩০ শুবা ঙানবী মহারানি ধনমঞ্জুরি কাং টুর্ণামেন্ট ২০২২ লোইশিনবগী থৌরমগী অথোইবা মীথুংগী ৱারোল পীরদুনা ফোঙদোকখিবনি।

থৌরম অদুদা ইম্ফাল ওয়েষ্ট জিলা পরিষদকী উপ-অধক্ষ্য এল বোবিনা মখা তানা ফোঙদোকখিবদা, ঐখোয়না ঐখোয়গী ইপা-ইপুশিংনা থম্বীরম্বা অরিবা মশান্নাশিং অসি য়োকখৎমিন্নসি। অরিবা মশান্না অমা ওইরিবা কাং মশান্না অসিবু য়োকখৎতবা য়াদে হায়দুনা চোংথোরক্লিবী নুপী কাং শান্নরোয়শিংবু অমুক্কা হেন্না থাগৎলি। লমদম অসিগী নুপী ওইবী কয়ানা ইমুংগী চিরবা থবক ইনখাং ময়ামগী মরক্তা অসিগুম্বা মশান্না অসিবু য়োকখৎনবগী ৱাখল্লোন্দা থোরক্লিবা অসিমক নুপী অমা ওইনা য়াম্না চাউথোকচৈ হায়নসু মহাক্না মখা তানা ফোঙদোকখি।

ঙসিগী থৌরম অদুদা অখন্নবা মীথুং ওইনা শরুক য়াখিবা সোসেল এন্দ কালচারেল এক্টিভিষ্ট রাকেশ নাওরেমনা থৌরম অদুগা মরী লৈননা হায়খি, ঙানবী মহারানি ধনমঞ্জুরি লমদম অসিদা অনৌবা মহৈগী মঙাল পীখিবী শীংথানিংঙাই ওইরবী মহারানি অমনি। মহাক্না মণিপুরদা ইহান হানবা কোলেজ অমা ওইনা ১৯৪৬তা দি এম কোলেজ অসি লিংখৎখি। মহাক থোইদোক্না মৌ পালাগী মকোক চিংবী অমা ওইনা শীংথানখিবী মহারানি অমসুনি। চুড়াচান্দ মহারাজগা মশাগী চহী ১৯ শুরকপা মতমদা কুমজা ১৯০৫ গী মার্চ ১৭ তা লুহোংদুনা লৈমরেল ফমথোল লাকখিবী মহারানিনি। মহাক কুমজা ১৯৭৫ দা তাইবংপান থাদোকখি। মহাক্না তাংবংপান থাদোকখ্রবসু মহাক্কী মিংদা মণিপুর কাং এসোসিয়েসন্না চহী খূদিংগী কাং টুর্ণামেন্ট পাঙথোরকপা অসিনা মহারানি অসি ঐখোয়গী ইরক্তা মতম চুপ্পগী ওইনা হিংহন্দুনা লৈহল্লে হায়খি।

থৌরম অদুগা মরী লৈননা মহাক্না মখা তানা ফোঙদোকখিবদা, মমাঙদা পাঙথোকখিবা সঙাই ফেষ্টিভেল কয়াদা কাং ফেদারেসন ওফ বাংলাদেশকী নুপা অমদি নুপী কাংখুৎশিং শরুক য়াবা লাকখি। হন্দক সঙাই ফেষ্টিভেল মনুং অসিদা পাঙথোকখিবা কাং টূর্ণামেন্ট অসিদা বাংলাদেশকী কাংখুৎশিং য়াওদবা অসিমক পূক্নিং নুংঙাইতবা ফাওই। লাক্কদবা চহীশিংদদি বাংলাদেশকী কাংখুৎশিং ইনভাইটি তৌবীদুনা মশান্না অমি পাক শন্না য়োকখৎনবা হোৎনবীনবা মণিপুর লৈঙাক্কী পূক্নিং চিংশিঞ্জরি।

য়ুথ এফেয়ার্স এন্দ স্পোর্টস দিপার্টমেন্টনা নেসনেল অমদি ইন্টারনেসনেলগী থাক্তা তোঙানা তোঙানবা মশান্নশিংগী মেদেল লৌরক্লবা শান্নরোয়শিংদা পীরিবা খুদোংচাবা অদুগুম্না কাং মশান্না অসিগী মায় পাক্লবা শান্নরোয়শিংদসু খুদোংচাবা কয়া পীহন্নিংই। অদুম্না খুদোংচাবশিং পীবীরগদি লমদমসিগী হৌরক্লিবা নুপামচা অমদি নুপীমচাশিংনা মশান্না অসিদা অহেনবা মীৎয়েং চঙলক্কনি। অসুম্না অহেনবা মীৎয়েং চঙলক্লগদি মশান্না অসি খক মুৎপা নাইরোই হায়নসু ফোঙদোকখি।

নীংশিংবা য়াবদি, চত্থরিবা কাং টুর্ণামেন্ট অসি থা অসিগী চৈচৎ ২১ দগী পুন্না কাংখুৎ ৮না শরুক য়ারি। কাংখুৎ ৮ অসিগী মনুংদা আসামগী হাইলাকান্দি অমদি কাছাড়গী কাংখুৎশিং য়াওরি। লোয়ননা জিরিবাম দিস্ট্রিক্টকী ওইনসু কাংখুৎ অমা শরুক য়ারি। মণিপুর মনুংগী ওইনা জিরি য়াওনা মণিপুরগী কাংখুৎ তরুক্না শরুক য়ারি। ঙসি পাঙথোকখিবা ফাইনেল মেচতা গোপালদেব কাংখুৎ, য়াইস্কুলনা নিকোন কাংখুৎমণিপরবু পাঞ্জল ১৪-৭ তা মায়থীবা পীদুনা চত্থরিবা টুর্ণামেন্ট অসিগী উইনার গোপালদেব কাংখুৎনা ওইখি।

ঙসি লোইশিনবগী থৌরম অদুদা ইম্ফাল ওয়েষ্ট জিলা পরিষদকী উপ-অধক্ষ্য এল বোবিনা অথোইবা মীথুংলেন, ওল মণিপুর কাং এসোসিয়েসনগী প্রেসিদেন্ট এম জাদুমনিনা থৌরম মপু অমদি সোসেল এন্দ কালচালে এক্টিভিষ্ট রাকেশ নাওরেমনা অথোইবা মীথুং ওইনা শরুক য়াখি।

সোর্স: হুইয়েন লানপাউ  

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু