লৈবাক্কীদমক থৱায়না পোন্থা ওইখ্রবশিংদা কৎথোক্লিবা শৈরেং লাইরিক ‘ঈ অমসুং পি’ -- তোংব্রম অমরজিৎ
... ইপা ইপুশিংগী থৌনা লিংজেলতনা ঙাক্লম্বা মনিপুরগী ঙমখৈদি কৈদৌনুংদা কায়বা খক য়ারোইনা হায়না চোংথোকনরকখি মশিং লাকঙমদ্রবা মনিপুরগী মীয়াম্না জুন ১৮, ২০০১দা ৱাহৈ অহুম “Without Territorial Limit” হায়বসিগী ময়োক্তা। মনিপুর ইমাগীদমক অথৌবা মখোয় ১৮না থৱায়না পোন্থা পীখি। ...মিৎতদি শং শং উরি। নকোংদসু ময়েক শেংনা তারি ইকপ মীরাওখোল, অপুনবগী খোল্লাও, ইমা মনিপুরগী ঙমখৈগীদমক অমত্তা ওইনা লেপখিবা নুমিৎ।
লাইরিক্কী মমিং- ঈ অমসুং পি( ২০০৬)
এদিটর- শরতচান্দ থিয়াম
অফোঙবা- বীমাবতি থিয়াম ওংবীনা
সাথৌলূপকীদমক পুথোকপা
লাইরিক্কী মখল-শৈরেং
লাইরিক্কী মমল- লুপা ১৫০
লমায় মশিং- ১২৮
ঙম্লদরা নীংশিংদবা? ঙমগনি থাজদে। ইমা লৈবাক্তগী হেন্না নুংশিবা ইমা অমা লৈতে মালেমদা। অদুননি হেক হেক লান থোক্লিবা য়েকনবশিংগা ইমা লৈবাক কনবগীদমক্তা। অপুনবগী লিংজেল পাঙ্গলনা হেক হেক তাক্লি ইমা লৈবাক্কীদমক শিবা কিদবা মপারি মমোম লীশিং কয়া লৈরি হায়না। ইপা ইপুশিংগী থৌনা লিংজেলতনা ঙাক্লম্বা মনিপুরগী ঙমখৈদি কৈদৌনুংদা কায়বা খক য়ারোইনা হায়না চোংথোকনরকখি মশিং লাকঙমদ্রবা মনিপুরগী মীয়াম্না জুন ১৮, ২০০১দা ৱাহৈ অহুম “Without Territorial Limit” হায়বসিগী ময়োক্তা। মনিপুর ইমাগীদমক অথৌবা মখোয় ১৮না থৱায়না পোন্থা পীখি।
কবি লাইশ্রম সমরেন্দ্রনা ইরকখি, ‘ঐখোয়’ অশেংবদু ফোংদোক্লি, “ লাঙগদবমখৈ লাঙলুরগা/ লাওগদবমখৈ লাওরুরগা/ হন্থরকই ঐখোয় ভাব তারকই/ খঙলকই ঐখোয় অমত্তনি/ লমদম অসিগী মচা ঙাক্তনি…” (লাঃ ১৫) তুমিন্না অথেংবা অহিংদা ঐখোয় লূ লুকনা ৱাখল খনবা মতমসে থেংমল্লে। অসিগুম্বা লুরবা লৈবাক্কি তাংককসিদা করম্না লৈগনি তুমিন্না অদুনা ৱারবা পুকনি থম্মোয়না হংলক্লি, ‘কনানা শানি থেঙ্গৌ’ এলাংবম সোনামনিনা হংলকলি, “ কদাইদা লৈখ্রে মৈতৈ পাথৌ/ হৌজ-থেংখাং কয়াদা/ য়েকনবা মায়রোং য়া/ কঞ্জবনি নখোয়তনা/ সনা লৈবাক মণিপুর/ মনীং তম্বা মণিপুর…” (লাঃ ২১)
পোক্নফম লমদম অসিবু নুংশিজবতনা থুমহৎলদুনা ইমা লৈবাক অসিগীদমক শৈথাবদা পেন্নাইদ্রবা অশৈবা নোংথোম্বম শ্রীবীরেননা হায়রক্লি, ‘ৱাহৈ পীয়ু, ইমা ৱাহৈ পীয়ু’ ইমা লৈবাক অসিগী খনবদা তশেংনা ৱাদবা ঙমখিদে। অদুনা হায়রক্লিবনি, “ ঐগী ইমা মণিপুর নুংশিবী,/ নঙগী পুৱারীগী লেপ্তনা/ চেন্থরক্লিবা ঈচেলনা,/ ঙসিদি থুংলরেদো,/ ওন্থোকপা তানফম’মদা/ শাথীনা লুরবা হিদেনসিদা।/ ইমা, নঙনা লৈরিবা ফীভমসি/ নোংমা নোংমগী অসুম লুশিল্লক,/ অসুম অসুম লুশিল্লক,/ হেন্না হেন্না লুশিল্লকি।” (লাঃ ২৫)
মুদম্মদ অব্দুর রহমান খুৎহৈবমনসু থম্মোয়দগী থোক্লকপা য়াৱানা পাউমেল্লকলি, ‘তুং ইল্লক্লি ঐখোয়সু নখোয়গী’ “…মখোয়গী পান্দম লৈহৌরিবশিংগী পান্দম/ খেন্নদে মান্নৈ, অমতনি পান্দমঃ “ঈরৈবাক ঈরম্লেন মাঙবা য়ারোই/ ঐখোয়গী ঙমখৈ কায়বা য়ারোই,/ লৈমিন্নসি ঐখোয় হিংমিন্নসি/ ঈরৈবাক্কীদমক অমত্তা ওইনা লেপমিন্নসি!” (লাঃ ৩৩)
‘তাবীদ্রবা তেংথাখোল’ দি শক্লি ঙসিসু লেপ্তনা। মশানা মশাবু মীনমজরবা লুচিংবশিংনা নোকশিন্নরিবা য়েংবা ঙমদে কবিনা। অমম্বদা অচুম্বা থিগদবসি নোংঙানবা ঙাইবা নত্তনা পাম্বৈ লৈত্রি। অসোম ৱাংমগী স্না-কোনুংনদি ঙসিসু তাদ্রি। সাইলেণ্ট প্রোটেস ওইনা ইরক্লি রতন থিয়ামনা ‘অমুবা কোলাস, খোঙচৎ অমদি খোঙবুরোই’ “ অভিশাপ ফংলবা খুন্নাই অমগী/ থমাইখ্রবা, মরোল থোক্ত্রবা, মরৈ ককথৎপীখ্রবা মীওই ময়াম/ মখোল থোক্ত্রবা অহৌবা খোঞ্জেলদা/ শোয়রবা লৈঙাকলোনগী ৱাকৎপগী ঈশৈ শকই/ মমায় য়াওদ্রবা পুং কন্না কন্না য়ৈদুনা/ তাবীগনি খন্না অরাপ্পা লমদমগী স্না- কোনুংনা।” (লাঃ ৩৭)
কবিগী থম্মোয়দি ঙাকপী হৈবীনি। নুংশিবদা য়ুম্ফম ওইদুনা নুংশিবা মীরোল অমা উনিংলি। অপুনবগী মশক অমা শাগৎচনিংই। অদুবু পুৱারীগী তাংকক কয়াদা লেপ্তনা থাজিল্লকখিবা য়েংথিনবগী শিংচেপ্না ঙসিদি পোকনফম লমদমসে কাংলুপ ফুরুপকি চাইনপুং ওইহল্লসি। থম্মোয় শোকনা নুংঙাইজদে কবি শঞ্জেনবম ভানুমতীসু অদুনা ইদবা ঙমদে তেংথাদবসু ঙমদে ইমা মহাক্কিদমক। পাউমেল্লকলি, ‘ঐখোয় ঈচীল ঈনাউনি’ “ ইমা ঐগী নুংশিবী/ পলেম নঙবু পুকতপ্পী/ নচা চানবীনি নহাক্তি…লমদমসিগী ঈশিং-নুংশিৎতা/ মফমসিগী লৈহাও-লৈবাক্তা/ কাঙদোং ফাজরকপা নপারি-নমোমশিং/…ঙসিদি-ঈপাম লমদম মহৌরে/ খাম্বী মৈরীনা কোয়রক্লে/ ৱাখল পীকপা নপারিগী/ ফৎতবগী লাংদা থুররে/ ঈচীল ঈনাউ মরক্তা/ কল্লবা শীংচেপ থাবিরে…” (লাঃ ৪২)
মিৎতদি শং শং উরি। নকোংদসু ময়েক শেংনা তারি ইকপ মীরাওখোল, অপুনবগী খোল্লাও, ইমা মনিপুরগী ঙমখৈগীদমক অমত্তা ওইনা লেপখিবা নুমিৎ। পীরাংনা লৈরাং খুজোক ওই, তেংথাখোলনা লাইশোল ওইদুনা ইকায়খুম্নবা উৎলকলি কবি য়েংখোম বিহারিনা ‘হে অথৌবশা! কৎলি শ্রধাঞ্জলী নখোয়গী মফমদা’ “…ঙসি জুন ১৮ অসি মণিপুরগী ‘ঙমখৈ ঙাকপা নুমিৎ’ পাঙথোকপা নুমিৎনি/…ঙসি অসি নখোয়গী অনৌবা নপোক নুমিৎনি/ ঙসি অসি নখোয়গী অরোইবা নপোক নুমিৎ নত্তে…(লাঃ ৪৮)
ইঙাগী নোংজুদি তমখিবা নত্তে। ইঙাগী অতিয়াদি তরু তরুখি। ইঙাগী নুংশিৎসু মরাল লৈখিদে। লাল্লিবদি মমা লৈবাক মরমদম্বু মজাতিবু করিসু খনদবা মখোয়দুনি। মমা লৈবাক্কিদমক চোংথোক্লকখিবা অথৌবশিংদা খুৎ থাখিবা মখোয়দুনি লমদমসিগী য়েকনবা। পালেম মমাশিংনা নুংশিরবা মচাশিংদা খাংমুথক্তা শেৎন-খায়নহনখিবসু মখোয়ননি। মমা ওইবীশিংগী তেংথাখোলদি ঙসিসু তারক্লি কবি বাচস্পতিময়ুম জয়ন্তাকুমারগী ‘পারী থোইও নুংশিবা(পলেম মমাগী তেংথাখোল)’ হায়বসিদা। নেস্নেলিজমগী স্পিরিট অমা ফাওহল্লক্লি। ইঙা নোংজু মরক্তা পোকনফম নুংশিবগী ঈহূলনা ঈরা চেল্লক্লিবা শৈরেংনি। অদুনা তেংথারক্লি, “ চহী খুদিং লাকপগুম লাক্লি জুন তরানিপাল/ ইঙা নোংজু খোল্লাউরবা তেংথা-নাওইনখিবা।/…চহী মরি হৌখরে ঙসিসু তনৌ-তনৌরি,/ থম্মোয় লৈনা লৈয়োম্নুং ঙসিসু তনিক তনিক্লি।/ অশোকপদি মফমশিং ঙসিসু তঙাং তঙাংলি,/ চৈনাশিংদো হৌখ্রবা ঙসিসু অদুম মফাওরি। …” (লাঃ ৫৫)
ঐখোয়গী লুচিংবশিং অমদি মীয়াম কদায় ফাওবা থম্মোয় শেংলবগে হায়বসি ঙসি দিমেক্রেতিক গভর্মেন্ট অমা লৈরিবা অসিদা হংনরিবা ৱাহংনি। পুকচেল শেংদবা ১০০গী মনুংদা পুকচেল শেংবা ১০/২০নদি অওনবা অহোংবা পুরকপা খরা ৱাগনি অদুনা ফিলোসোফর অমসুং কবি Ralph Waldo Emerson নসু হায়রমখি, “When a whole nation is roaring patriotism at the top of its voice, I am fain to explore the cleanness of its hands and the purity of its heart.” কবি য়ূমলেম্বম ইবোমচানসু ইরকখি পোকনফম ইমানা তুমিন্না লৈবগী মরম। ‘তুমিন্না লৈবী ইমা’ “ নঙসু লৈবাক নীংবা মীনি,/ ঐসু লৈবাক নীংবা মীনি,/ ইরৈবাক নীংবা মী ঙাক্তনি ঐখোয় লোইনমক।/ …সিফাই নত্তবশিংসু মরৈবাক নীংবা মীনি/ মরৈবাক নীংবা মী মখল মখলনি/ হৌনা হৌনা লাওরগা নীংবা মী লৈ/ নোংমৈ পায়রগা নীংবা মীসু লৈ/ পৈশা নির নিরগা মরৈবাক নীংবসু য়াওই/…থৌজাল হৈবী নুংশি চাউবী ইমানি ঐখোয়গী/ করিসু হায়দে মাদি তুমিন্না লৈ/ মচানা লৌবদা হাৎপদা মচানা শাউবদা শেৎলগে য়োল্লগে হায়বদা…” (লাঃ ৬৪) আইরোনিগী টোন অমদা পুরকতুনা মীপুম খুদিংদা ৱাখল খন্থহল্লি। মরু ওইনা ঙসিগী মীরোলদা ওনশিন্দুনা হায়রকপনি লৈবাক নীংবা হায়বদুগী নুংগী ওইবা ৱাহন্থোক অদু খঙনবা। ঙসিসু অদুম্মক চাশিন চুশিন্নদুনা লৈরি। পোকনফম ইমানা তুমিন্না লৈরিবগী মরম খঙমিন্নবা মতম ওইরে।
লোইশিনবা ঙমদনা লৈরিবা কাংলুপ ফুরুপকি থারুম অমদি তোখায়না লৈনিংবশিংদা নুংশিবগী পাউজেল পীনিংবা কয়া লৈরি চীংদসু তমদসু। অদুবু চেনশিল্লকলিবা মতমগী শাফু কল্লবা পোলিতিকেল ওইবা লৈঙাকলোন্না অমদি থৌইনশিন্না মচিন মনাও ওইবশিংগী মফমদা খায়বুং খায়বুং তাহল্লিবা অসিমক চাংয়েং অমনি হায়রক্লি কবি বিরেন্দ্রজিৎ নাওরেম মহাক্কি শৈরেংন ‘ইমা নঙগী’ হায়বসিদা, “ঙসিদি চাংয়েংগী পুংফম্নি;/ মচা মশেল/ পুকচেল খোইজেল তিন্নদবদগী/ হৌরকপা মৈনা/ কুমজা কয়া মৈৱায়রক্লবী/ ইমা নঙগীদমক।/ চাংয়েংসে/ পোলোইগী নত্তে/ অহৌবগীনি… হল্লক্কনি/ চীংথ্রাউ চহুইগী মরক্তা/ তারদুনা তাম্নাগী হারিগী ঈশৈ/ চাইরদুনা মেলৈ চরোং, ক্কাক্লৈ চরোং। অশংবা নুঙশমশিংগী মকোক্তা।/…” (লাঃ ৯৭) চাংয়েং অসিনা লোয়রকপা মতমদি আশা অমা পীরি কবিনা। উরক্লি মোমোন মীনোকনরিবী পলেম্বু পোক্লিবী পোক্নফম ইমাবু। মসিমক ওইবা ওইসনু।
মনিপুরগী ঙসি উরিবা শক্তম, চহী ২০/৩০ মমাংগী মশক, তংদু লৈতাদবা মমি অমদি ফত্তবদা হিদান্নরিবা অমম্বদা হিহোল্লিবা, কাংলুপ ফুরুপশিংগী মরক্তা থোক্লবা থোকহন্নিংদবা থৌদোকশিংগী হার্দ রিএলিতি অমা শাগত্তুনা জুন ১৮গী ইহৌদুদা ইরিকখিবা শৈরেংনি কবি শরতচান্দ থিয়ামগী ‘ইমা লৈবাক’ মমানদি মচাবু নুংশি। পোকনফম লমদম ইমা মহাকনসু নাউকোল্লি পুম্নমক অদুবু মোংফমদি মশিং য়ামখৎলি জুন ১৮ অমা লোইখ্রবসু। ঙরাংতা থোকখিবা থৌদোককূম উহল্লক্লি,“মোংফম,/ মরোল মরোল থানা ৱাংখৎলকলিবা।/…পোকনফম লমদমগী লৈমায়দবু/ ঈগী ইনফি ইল্লদুনা নুপীমচাশিংনা কদায়দা চৎলিবা?...খলসু ওনখৎলকলি/ ইমা লৈবাক অমসুং মোংফম/ অমম্বা মৈখুসু উৎকী মপৈসু/ ৱাংবা তান্নরকপগী হিদান্নবসিমদি/ অয়ুক্কী নোংহৌনা ঙমদ্রি তাইশিন্নবা।/… অদুবু নাশোন পীকনা তারি খোঞ্জেল অমদি/ ঈ থাংলবা মচাগী লাইবক্তা মমাদুনা নুংশিনা চুপ্পগী।”(লাঃ ১২৮)
জুন ১৮গী কাওঙমদ্রবা নুমিৎ অসিবু শৈথাদুনা লাইরিক অসিদা ফজরবা অমদি ৱাহন্থোক লৈরবা শৈরেং কয়া খুদোল তম্লিবা শকনাইরবা কবিশিং মরক্তা ক্ষেত্রিময়ুম সুবদনীগী ‘নহাক লাকপদা’; থাংজম ইবোপিশককী ‘মণিপুর হৌজিক্কী মতমদা ইমাগী মফমদা,’; রঘুবীর থিয়ামগী ‘লৈনম’; রাজকুমার ভুবনস্নাগী ‘মীৎ পাঙঙু ইমা মীৎ পাঙঙু’; মোইরাংথেম বরকন্যাগী ‘নঙগী অপঙবা ৱাখলদগী’ ; সগোলসেম লনচেনবাগী ‘পোৎথারো’ ; দিলিপ ময়েংবমগী ‘ অসিবু ফাগিরা’ ; প্রমো থাংজম ওংবীগী ‘চুখৎমিন্নরসি শান্তিগী মৈরা’ ; লনবোন কবুইগী ‘২০০১ ইংগী জুন ১৮ গী ঈহৌ’ ; অমদি রঘু লৈশাংথেমগী ‘ঙমখৈ ঙাকপা’ পুম্নমক সনাগী ময়েকনা ইদুনা লৈহৌরগদবা শৈরোল ঙাক্তনি।
খোমজিনবা শৈরেং লাইরিক অসিদা তেনতকপা কবিশিংগী বাইও-দাতা, মখোয়গী ফোটো অমদি মখুৎমকনা ইবা খুৎই য়াওবসিনা হেন্না লূম লূম লাওহল্লি। থম্মোয়দগী অমকপা য়াওদনা তেংথাদুনা ইরকখিবা অশৈবা ২১গী শৈরেংশিং অসিনা মণিপুরগী অপুনবা শক্তম ঙাকপদা কাব্রংগী লংলা ওইদুনা ঙমখৈ শম্বলসু চেকশিন্না পুন্দুনা থম্বা ওইসনু।
0 কমেন্ট:
কমেন্ট তৌবিয়ু