লময়ানবা হিজম ইরাবত -তোলেনসানা
খুন্নাইগী মহৌশাগী চৎনবী খরদগী থৈদোক্তুনা অনৌবা মীৎয়েং অমদি অনৌবা ৱাখলদা অনেম-অৱাং লৈতবা সমাজ অমা লিংখৎপা, অচৌ-অশাং নায়দবা সমাজ অমা, চপ মন্নাবা মীৎয়েংদা মীওইবগী হকবু ইকাইখুম্নবা ঙম্ননবা হোৎনবদা সমাজতা হিজম ইরাবতনা অচৌবা থৌদাং লৌখি। অতৈগী মীৎয়েংগা মহাক্কী মীৎয়েংগা খেন্নবা কয়া অমদি তুংদা ওইরক্কদবা খুন্নাইগী মশক অমদি ওইরক্লিবা ফীভম অসিবু য়েংলগা মহাক্না লৌরম্বা থৌদাং কয়াগীদমক হিজম ইরাবতবু ময়াম্না ‘জননেতা ইরাবত’ নত্রগা ‘লময়ানবা ইরাবত’ হায়না খংনরিবনি।
লময়ানবা হিজম ইরাবত
মজাতি অমদি মমা লৈবাক্কী দমক থৱায়না পোন্থা ওইখ্রবা অথৌবা কয়াগী ৱারী ঐখোয়না ইতিহাস পারগা খঙবা ঙম্মী। নিংথৌরেল মতমগী ইতিহাস অদু হঙ্গৎনা অমুক য়েংলুরবদি অকল-অথৌ, মচিল-মনাওগী মরক্তসু নিংথৌ ফম মুন্নবগী ফম্বাল লান, লৈবাক ৱাথোক নচিংবা মীয়ামগী পুন্সি চহিংদা চরাংনহনবগী ইতিহাস কয়াসু উবা ফংঙি। ইতিহাসকী তাঙ্কক কয়াদা অফবা নিংথৌ অমদি মীওৎ-মীনৈ নিংথৌগী শাসন কয়াসু য়াওখি। অদুবু ইফোং ফোঙনা নিংথৌগী মীওৎমীনৈগী মায়োক্তা অমদি প্রজা মীয়ামগী য়াইফনবগীদম থৌনা লৈনা থৌদাং কয়া লৌখিবা মী মশীংদি য়াম্না তাংনা থোকখি। মখোয়শিং অদুবু ঐখোয়না ইকাইখুম্নৈ অমসুং শ্রদ্ধাঞ্জলি কৎলি। মণিপুরী জাতিদসু অদুগুম্বা থৌনা লৈবা অকল অথৌ কয়া লৈবা অকল অথৌ কয়া লৈখি। মখোয়বু ঐখোয়না চহী খুদিং নীংশিংই, শ্রদ্ধাঞ্জলি কৎলি। মখোয়গী মনুংদা শোয়দনা মণিপুরগী লময়ানবা হিজম ইরাবত সিংহসু য়াওরিবনি।
মজাতিবু নুংশিজবতা নত্তনা মহাক্কী পুন্সিগী অয়াম্ব শরুক্তি প্রজা মীচম মীয়ামগী দমক কত্থোকখিবনি। খুন্নাইদা অৱাবতা থেংনদুন লাক্লবা খুন্নাইচাগী পুন্সি মহিংদা মহৌশাদগী লৈরকপা সমাজগী পথাপ কয়াদা অহোংবা পুরক্নাবা হোৎনবদা হিজম ইরাবতনা থৌদাং চাওনা লৌদুনা লাকখি। খুন্নাইগী মহৌশাগী চৎনবী খরদগী থৈদোক্তুনা অনৌবা মীৎয়েং অমদি অনৌবা ৱাখলদা অনেম-অৱাং লৈতবা সমাজ অমা লিংখৎপা, অচৌ-অশাং নায়দবা সমাজ অমা, চপ মন্নাবা মীৎয়েংদা মীওইবগী হকবু ইকাইখুম্নবা ঙম্ননবা হোৎনবদা সমাজতা হিজম ইরাবতনা অচৌবা থৌদাং লৌখি। অতৈগী মীৎয়েংগা মহাক্কী মীৎয়েংগা খেন্নবা কয়া অমদি তুংদা ওইরক্কদবা খুন্নাইগী মশক অমদি ওইরক্লিবা ফীভম অসিবু য়েংলগা মহাক্না লৌরম্বা থৌদাং কয়াগীদমক হিজম ইরাবতবু ময়াম্না ‘জননেতা ইরাবত’ নত্রগা ‘লময়ানবা ইরাবত’ হায়না খংনরিবনি।
হিজম ইরাবত সিংহ, ইং ১৮৯৬ গী সেপ্টেম্বর ৩০ দা পীশুমথোংদা পোকখি। বৃটিশনা মণিপুর খুদুম চনখিবগী চহী মঙা মতুং পোকখিবা মহাক্না অঙাং ওইরিঙৈ মতমদগী মমা লৈবাক নীংতম্বগী মশক অদু উবা ফংলকখিদে। অঙাং ওইরিঙৈ মতমদগী মহাক্কী বুদ্ধি লৌশিং মহাক্কী গুণ কয়াবু মশক খঙদুনা নিংথৌনা মহাক্কী মচা নুপীবু ইরাবতকা লুহোংহনখিবগা লোয়ননা লৈঙাক্কী অচৌবা ফম অমা পীবিখি।
অদুবু মণিপুর নিঙথৌবু মাংদা থম্লগা বৃটিশশিংনা প্রজাগী মথক্তা চত্থখিবা মীওৎ-মীনৈ থৌদোক কয়াবু অঙাং ওইরিঙৈ মতমদগী উদুনা লাকখিবা ইরাবতকী থম্মোয়দা অচৌবা মমি তাদুনা লাকখিবনি। নিঙথৌগী মরী মতা ওইদুনসু বৃটিশকী খুদোম্বীদা চৎপা নিংথৌগী মায়োক্তা মহাক লেপখি। মতম অদুগী সমাজতা অমাং-অশেংগী মিংদা ধর্মগী খুদোংচবা লৌদুনা মতু শোল্লবা মীচম প্রজাশিংবু নৈহৎপীবা, চন্দন শেনখায়, লৌগী খাজনা অসিনচিংবা প্রজা মীয়ামনা থেংনরিবা অৱাবা কয়াবু মহাক্না মহাক্কী অৱাবনি হায়দুনা খুন্দুনা মসিগী মায়োক্তা লেপ্পা হৌরকখি।
লময়ানবা হিজম ইরাবত অমসুং মহাক্কী লোয়নবী আরকে খোমদোনসানা
চীং-তম অনীমক্কী অৱাববু মহাক্না পুন্সিল্লগা অমত্তা ওইবগী অকনবা খোল্লাওগা লোয়ননা খোঙজং চত্থবা হৌখিবা মতমদগী মহাক নিংথৌগী য়েক্নবা অমনি হায়বসি ময়াম্না খঙবা হৌরকখি। খুন্নাইদা নুপীবু নমথনা থম্বা, ওৎ নৈবা নুপীগী নীংতম্বা অমদি নুপীগী হকপু খোঙ্গাওনবা অসিনচিংবগী মায়োক্তা লেপ্তুনা নুপীবু পাঙ্গল থোকহন্নবা লুপ শেমদুনা অনৌবা ৱাখল অমদা নুপীবু থৌগৎপীখি। ঙসি ঙসিমক মণিপুর অমসুং মপান মণিপুরদা মৈরা পায়বী নুপী লুপ কয়া উবা ফংলিবসি মহাক্না মতম অদুদা নুপীশিংবু মীকপ থোকহনখিবা অমদি থৌগৎখিবগী মহৈননি।
ইং ১৯৩৯ গী ‘ঐতিহাসিক নুপীলাল’ মালেমগী পুৱারীদা অপুনবা লীংজেল মান্নবা নুপীগী ঈহৌবু ঙসিসু শীংথাদুনা চহী খুদিং ডিসেম্বরগী ১২ ‘নুপীলাল নুমিৎ’ পাঙথোক্নরি।
ত্রিপুরাদা লময়ানবা হিজম ইরাবতকী মপোক নুমিৎ (সেপ্টেম্বর ৩০) নত্তনা লৈখিদবা নুমিৎ (সেপ্টেম্বর ২৬) নীংশিং নুমিৎসি পাঙথোক্তে। অদুবু ঙসি চহী চাম (চহী ১২৭) হেল্লবা নত্রগা লৈখিদবা চহী ৭২ হেল্লবা ফাওবদা মহাক্না পাম্লম্বা মহাক্কী পান্দম অদু হৌজিক্কী মীরোলশিংনা কদায় ফাওবা নিংবা থুংহল্লে নত্রগা কদায় ফাওবা মহাক্কী পান্দম য়ৌহনবা ঙম্লে হায়বসি ঙসি ঙসিগী মতমসিদা য়াম্না কুপ্না নৈনবগী মথৌনি।
চহী খুদিংগী ইরাবত থাবুম লাক্লগা সেপ্টেম্বর তাং ৩০ নুমিৎ অসিদা লৈসু কৎতুনা সুম পাঙথোক্লগা লাকপসিনা ইরাবতবু খঙবা ঙম্লোয়। ত্রিপুরাগী মৈতৈশিং চহীদা অমুক্তং লৈ কৎপা নত্তনা ঙসিসু লময়ানবা ইরাবতবু মশক খঙদ্রি। ইরাবত নৈনবদসু থোইদোক্না ৱাখল চংদে। মায়থোং য়াম্বা মতিক মগুণনা থম্লবা মহাক্না তৌরু তৌরুবা খুদিংমক খুন্নাইগী য়াইফবা ঙাক্তা ওইরম্মী। খুন্নাই অসিগী তুংদা করি ওইরক্কনি করি ওইরোই হায়বসি মাঙজৌননা উবা ঙম্বগী শক্তি অমা লৈরম্মী। অদুনা মহাক্না তৌরুবা খুদিং শোয়দনা মরম লৈখি হায়বসি ঐখোয় খংবা তাবনি।
ইরাবত নুমিৎনা লাক্লগা থাবুম চুপ্পা ইরাবত সেমিনার পাঙথোক্লগা (ত্রিপুরাদা নত্তে) নৈনরগা ইরাবতবু শ্রদ্ধাঞ্জলি কৎলে হায়বা য়াদে। চহী কয়া ইরাবত সেমিনার, ইরাবত নৈন থৌরম পাঙথোক্লে। মহয়দি জিরো?
ঙসি ঙসিমক মণিপুরদা থোক্লিবা মৈতৈ-কুকি অনীগী থৌদোকশিং অসি মতিক চাবা লুচিংবা লৈরম্লবদি নহান্না ৱারোইশিন পুরকনবা য়ারম্লনি। ইরাবত গুম্বা কত্থোকপা ঙম্বা লুচিংবা মণিপুরদা লৈতে হায়বসি তাক্লবনি। নেশনেলিজমগী অৱাৎপা অমা লৈরবরা হায়বসিনসু কাংখোং চাইবগী মরম ওইরিবরা? তশেংনমকসু মদুমক ওইরবোইরে খল্লে।
কোর্টেসি : মরূপ
0 কমেন্ট:
কমেন্ট তৌবিয়ু