রিতা থোকচোমগী শৈরেং অহুম
লমজিংবিররো
নুংশিগী তেন্না পাল্লুরে
চীন্দা পুবা ঈশৈ শক্তুনা
মাগী শক্তম মাঙদা থম
মায়কৈ খঙদা হোল্লুরে
তোল্লবগী পুন্সি হিনাওসে।
থক্ল-থক্ল হেন্না ঈখৌ লাংবা
নুংশিগী লাইজসু থক্লুরে।
ঈরাক্নরুরে নুংশি ঈপাক্তা
পূক্নিং লমহেনবনা
মায়কৈ খঙদ হোল্লুরে।
মতম্না ঙল্লিঙৈ
নুংশিবা খিবিক্কী তুংনফম ওইরিঙৈ
পাঙ্গল থৌনানা লৈরিঙৈ
নীং তম্লুরা পুন্সিসিনা
হোল্লুরে কোয়না লম্বী লম্ফাংননা।
কোরৌগী মঙালনা শাম্লক্লবদা
মীপাইরক্লবদা নোংলৈ লাক্লনি,
পাঙ্গল থোক্ত্রবা চাক্নীবগুম
চঙজরি নঙগী থোঙজিন্দা
লমজিংবিয়ুনে লমজিং হৈবা মপু।
পূক্নিং লৈকোল
ঐগী পূক্নিং লৈকোলসে
ফজদরা য়েংবিরুলাও
য়েক্নদে কনাসু মফমসিদদি।
চাউথোকচৈ ঐনা
ঐগী পূক্নিং লৈকোলগীদমক।
মহৌশা খূৎশেমগী নোংজুনা
চাইরি ঈশিং লৈরাংশিংদা
লৈরাংশিংনা খৌবোম থন্না থক্লি
চাইথরকপা নোংলিকশিংবু,
অমুকসু চূপশিঞ্জৈ মরাশিংনা।
অয়ুক্কী লীক্লানা চোৎলবা
লৈরাংগী লৈকা খূদিংদা
কোরৌগী মশেক্না য়ৈবদা
মণি-মুক্তানা থাম্বগুম
কয়াদা নীংথিজরিবা য়েংবিরু লাও।
লৈহাও চেল্লবা, খূৎশেম য়াওদ্রবা
ঐগী পূক্নিং লৈকোলনি।
লৈরাংনা লৈকা ফন্না শাৎলকপা
লৈনম্না লৈকাই লানখরে
লাক্না-ফানা ঙমদরে।
মিকুপ অমতং পোথাবিরোলাও
উগনি লৈরাংশিংগী ফজবা
নমগনি নুংশিবা লৈনম
পূক্নিং মকা লামগনি
পুবিরকউ মরুপ-মপাঙ, ইমুঙ মনুঙসু।
উচেক ৱায়াশিংনা
ঊশাদা তোংদুনা
নুংশিনা ঈশৈ শক্লিবা
তান্থা পীবিয়ু নখোয়না
পূক্নিং থৌনা হাপ্পিয়ু মখোয়গী ।
য়েন্নিংথাসু খোঙদোই হুল্লক্লে
নুঙাই ঈনোৎ হাপ্লরে
ঐগী পূক্নিং লৈকোলসে
মালহৌনরে ঙসিদি।
ঙান্থোইররে পূম্নমক্কী মপু মহাকসু।
চাংদম্নবা নৎচদে
চমজরবী ঐগী
মুরা শম্লাংগী বেনীসে
লেন্নজদে কনাদসু
মদোম হায় হুমজবনি
ঐগী হকচাঙগী শাথেক্তা।
থানিল থাবল্লক্তা
রাধাগী বেনীবু
অমুবা লিনগুম খল্লদুনা
মচিঞ্জাক্নি পাইশিল্লুবা ৱাহোংদো
ইকাইবা নংখ্রবনি থাবল্লক্তা।
- ট্যাগ:
- শৈরেং
0 কমেন্ট:
কমেন্ট তৌবিয়ু