আপডেট:
image

রাইটার্স ওফ মণিপুর (রোম) না ফেজ নাইনা লেপ্তনা চত্থরকপা ‘অইবশিংগী তেংবাং খোঙচৎ”  চত্থরি

ম্ফাল, ওক্টোবর ৩১ : রাইটার্স ওফ মণিপুর (রোম) না ফেজ নাইনা লেপ্তনা চত্থরকপা ‘অইবশিংগী তেংবাং খোঙচৎ” কী মঙাশুবা ফেজ হৌখিবগা লোয়ননা খোঙচৎসিগী শরুক অমা ওইনা মীয়ামদগী লুপা ৭/৭ কী মতেং পীবিনবা হায়জবদা মণিপুরগী অমদি মণিপুরগী ৱাংমদা লৈরিবা পুকচেল চাউরবা মীওই কয়ানা মতেং পীবিরকপদগী পুন্না লুপা ৫০,৪০২ ফংবা ঙম্লে হায়না রাইটার্স ওফ মণিপুরগী মীদিয়া কোওর্দিনেটর পি সরতনা থাদোরকপা চেরোল অসিনা ফোঙদোরক্লি।

সোসল নেটৱার্ককী খুত্থাংদা নিবা হৌখিবা মতেং অসি মীয়াম্না লুম্না লৌবীদুনা রাইটার্স ওফ মণিপুরদা হৌজিকসু মতেং পীরকপা লেপত্রি। মীয়াম্না পীবিরকপা শেনফমশিং অসিনা ফি থাল ওইনা লৌথরগা রিলিফ কেম্পতা লৈরিবা অহলশিং অমদি অঙাংশিংগী অরুম্বা ফুরিৎ খোঙগ্রাউ তুহনবগী থবক পায়খৎপা হৌরে। তুরক্লিবশিং অসি রাইটার্স ওফ মণিপুরগী থৌমীশিংনা রিলিফ কেম্পশিংদা য়েন্থোক্কনি।

ফি তুহল্লিবগী মরমদি শুফম নোমফম খঙদ্রবা মতম অসিদা খুৎশুমল খরদং ওইরবসু অৱাবা তাদুনা লৈরিবা ঐখোয়গী ইচল-ইচেশিংনা ফংজহৌনবনি। রাইটার্স ওফ মণিপুরগী ৫ শুবা ফেজ অসিগী অতোপ্পা থৌরাং অমনা রিলিফতা লৈরিবা ফি ককপা অমসুং তুবা ঙম্বা নুপীশিং খনগৎলগা ফি তুনবা মেছিন অমসুং ফি পীথরগা রিলিফ অদুদা লৈরিবশিংগী ফি তুহনবগা লোয়ননা অহেনবা তুরকপা অদুনা রাইটার্স ওফ মণিপুরনা খুৎশুমল পীদুনা লৌখৎলগা অতোপ্পা রিলিফশিংদা য়েন্থোক্কনি।

লমদম অসিগী কনাগুম্বা পুকচেল চাওবীশিংনা হায়ন্না শিজিন্নরবা, শিজিন্নবদি য়ারিবা ফি তুনবা মেছিন পীবিনিংবা নত্রগা মমল খরদং লৌবীরগা য়েন্থোক্নিংবা লৈরবসু রাইটার্স ওফ মণিপুরদা পাউ পীবীয়ু। মীয়াম্না হেন্না খঙবীরি মদুদি নিংথমগী মতম অসি চীংখোং চীংয়াদনা অমুক্কা হেন্না ইংবগী চাং ৱাংই। ময়োল লমদা লৈরিবা ঐখোয়গী ইচা-ইশুশিংদি লৈবা লৈতবা ফুরিৎ খোঙ্গ্রাও অরুম্বা অমতং ফাওবদি থোনবীবা ঙম্লি। অদুগা ময়ুম-মৈনা তুম্না থঅদোকপীখ্রবা মখোয়গীদি কনা-কনাগুম্বনা পাঙলবা নত্রগা লৈঙাক্না পীরকপা মতেং ঙাইবা নত্তনা অতোপ্পা পাম্বৈ লৈত্রি।

মে ৭ তগী হৌদুনা তোঙান-তোঙানবা মফম ৬৭ তা অঙম্বা মতেং পাংদুনা লাকখ্রবা রাইটার্স ওফ মণিপুরনা মাইকৈ অসিদা মীৎয়েং চংদুনা নিংথমগা মরী লৈনবা ফিরোল মতেং পাংনবা থৌরাং অসিবু থাজবীদুনা মণিপুরগী মনুং অমসুং মপানদগী মীওই কয়ানা লেপ্তনা মতেং পাংনরক্লি।

নিংশিংবা য়াই নিউ য়োর্কতা লৈবা নোর্ত আমেরিকান বাংলাদেশ মণিপুরী সোসাইটিনসু রাইটার্স ওফ মণিপুরগী খূৎত্থাংদা দোনেট তৌরকপা কম্বলশিং রিলিফ কেম্পশিংদা য়েন্থোকপগী থবকসু কন্না চত্থরিবনি। শ্যামসখি হায়স্কুলদা হাংবা রিলিফ কেম্পতগী হৌরগা ৱাংখৈ, নিউ কৈথেল মানবী, খাঙবোক, ৱাখা, মৈতৈ লাঙ্গোল, লাংমৈদোং, ৱাঙু অমসুং তাংজেংদা লৈবা রিলিফ কেম্পশিংদা পুন্সি চেংজেন, এঞ্ছাং-নাপি, অঙাংগী চান-থক্নবা পোৎলমশিংগা লোয়ননা কম্বলশিং ইনমেটশিংদা খুৎশিন্নখি।

রাইটার্স ওফ মণিপুরগী থৌমীশিংনা কত্থোকপগা লোয়ননা চৎলিবা অইবশিংগী তেংবাং খোঙচৎ অসিদা অইবা কয়ানা খোংবু ওইরকপগা লোয়ননা অঙম অঙম্বা মতেংসু পীরকপা লেপ্ত্রি। লমদম অসিদা রাইটার্স ওফ মণিপুরনা চংশিল্লক্লিবা মী অমদগী লুপা ৭/৭ মতেং লৌবগী খোঙথাং অসিদসু খোঙচৎ অসিদা অইবা অমা ওইনা ইশামক য়াওরিবনি হায়বসি খন্থবীরগা লৌখৎলিবা নিংথমগী থৌরাং হেন্না মপূং ফাহন্নবা হোৎনমিন্নসি হায়রি।

 

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: