রতন থিয়াম নীংশিং থৌরম পাঙথোকখ্রে
ইম্ফাল, আগস্ত ৯ : মণিপুরী সাহিত্য পরিষদ ত্রিপুরানা শীন্দুনা ঙসি আগরতলাদা লৈবা মণিপুরী লাইব্রেরি এন্দ রিসার্ছ সেন্তরদা রতন থিয়ামবু নীংশিংবগী থৌরম অমা পাঙথোকখ্রে।
ঙসিগী থৌরম অসিদা সাহিত্য একাদেমি এৱার্দি শরতচান্দ থিয়ামনা চীফ গেস্ত, ইস্কোন মণিপুর দিবেলপমেন্ত কাউন্সিলগী জেনরেল সেক্রেতরি সুরারী গোপালনা স্পিসিএল গেস্ত অমসুং মণিপুরী সাহিত্য পরিষদ ত্রিপুরাগী প্রেসিদেন্ত এল বিরমঙ্গল সিংহনা প্রিসাইদ তৌখি।
লৈখিদ্রবা রতন থিয়ামগী ফোতোদা লৈ-শু কৎলবা মতুংদা মিনিত অনী তুমিন্না লেপ্তুনা অৱাবা ফোঙদোকখি। থৌরম অসিগী হৌদোকপগী ৱারোল পীরদুনা পরিষদকী সেক্রেতরি থৌদাম নিলকুমারনা রতন থিয়ামগী মফমদা নীংশিং থৌরম পাঙথোক্তুনা লৈ কৎচবগী খুদোংচাবা অমা ফংজবসি য়াম্না নুংঙাই হায়খি।
থৌরম অসিগী চীফ গেস্তকী ৱারোলদা শরতচান্দ থিয়ামনা ফোঙদোকখিবদা, রতন থিয়ামনা লৈখিদবা হায়বসি মণিপুর খক্কী নত্তনা মালেমগী ওইনা অচৌবা মাঙজবা অমনি। মহাক্না মালেমদা মণিপুরবু মশক তাক্লম্বা অসিমক তুং কোইনা নীংশিংদুনা লৈহৌরগনি। যুগ যুগকী ওইনা মালেমদা লাইপোক অমমম পোক্লকখিবগুম রতন থিয়ামসু যুগ অসিগীদি লাইপোক অমা হায়বদু ওইখ্রবনি। মহাক্না পীরক্লিবা পাউজেল পূম্নমক শান্তি পুরক্নবনি। মহাক্কুম্বা অমা মালেম অসিদা খোঙদারক্তুনা মীওই খুন্নাইগীদমক হোৎনরম্বা হায়বসি পুৱারিগী লামায়দসু মুৎপা নাইদবা লৈহৌরগনি হায়খি।
অৱাবা ফোঙদোকপগা লোয়ননা নীংশিংবগী থৌরম অদুদা শরুক য়াখিবা পূম্নমক রতন থিয়ামগী মরমদসু য়াম্না কুপ্না খন্ন-নৈনখি। ঙসিগী থৌরম অসিগী অরোইবদা মণিপুরী সাহিত্য পরিষদ ত্রিপুরানা চহী খুদীংগী রতন থিয়ামগী মপোক নুমিৎ জানুয়ারীগী ২০ বু নীংশিং থৌরম পাঙথোক্লগনি হায়নসু লাউথোকখি।
সোর্স: পোক্নফম
0 কমেন্ট:
কমেন্ট তৌবিয়ু