মৈতৈ মীতৈগা মরক্তা য়াশিন্নবা পুরকশিঃ লৈশেম্বা
ইম্ফাল, ওক্টোবর ২৫: মৈতৈ অমসুং মীতৈ হায়না অনি থোকপা অসি অথুবদা য়াশিন্নবা পুরকসি, লৈবাক্কী য়াইফনবগীদমক ঐখোয় ইশা ইশানা খল্লিবা ৱাখল্লোনশিং অসি খরা হোংদোক হোংজিন তৌদুনা কত্থোকপা তাই হায়না রাজ্য সভাগী এমপি নিংথৌ লৈশেম্বা সনাজাউবনা ফোঙদোকখ্রে। ৱাফম অসি হয়িং খোংবালদা লৈবা লাইনিংথৌ সনামহিগী শঙলেন্দদা লাইনিংথৌ সনামহি টেম্পল বোর্দ অমদি মণিপুর য়ুনিভার্সিটি ওফ কলচর অনিনা খুৎশম্নরগা রাইট-দি- পেসেজ ওফ সনামহিজম (সনামহি লাইনিংগী পোকপা, লুহোংবা অমসুং কোরৌ নোঙ্গাবগী থৌরমশিং) হায়বা হিরম অসিদা নুমিৎ ১৫নি চুপ্না চত্থগদবা ৱার্কশোপ অমা হৌদোকপগী থৌরমদা ফোঙদোকখিবনি।
থৌরম মপুগী ৱারোল পীরদুনা নিংথৌ লৈশেম্বা সনাজাউবনা মখা তারদুনা হায়, চোইনা লৈরম্লবা মীতৈ ফুরুপ অসি ঙসিদি পুনশিল্লক্লে। ফুরুপ অসিনা অমত্তা ওইরবা মতমদা অতোপ্পা ফুরুপশিং নুংশিনা কোনশিনবা ঙমগনি। সনামহি লাইনিং অসিবু থাজদুনা চৎলিবা অসি মৈতৈ খক্তা নত্তে অতোপ্পা ফুরুপ কয়াসু লৈরি। অদুমক ওইনসু মণিপুরদা মীতৈ ফুরুনা মপাঙ্গল কল্লিবমখৈ মণিপুরগী শক্তম কায়রোই।
ৱার্কশোপ অসিদা শরুক য়ারিবা তোঙান তোঙানবা দিষ্ট্রিক্টশিংদগী দিলিগেট ১৩০ রোম অসিনা ৱার্কশোপ অসিগী কান্নবা লৌবীয়ু। কংলৈপাক্তগী মীতৈ মুৎখিদৌরে হায়না লাওনরক্লবা মতম অসিদা ঙসি হৌদোক্লিবা ৱার্কশোপ অসিদগী ফংলকপা ৱাখল্লোন অসিনা লাইনিং অসি শন্দোকপদা অচৌবা মতেং অমা ওইরগনি হায়না এমপি নিংথৌ লৈশেম্বা সনাজাউবনা মখা তানা ফোঙদোকখি।
থৌরম অদুদা অথোইবা মীথুংগী ৱারোল পীরদুনা পিঐচই মিনিষ্টার এল সুশিন্দ্রোনা হায়, মীওইবা অমা ওইন পোক্লবদি ঐখোয় ইশা ইশাগী ফুরুপ য়োকখৎনবা করিগুম্বা থৌরাং খরা হিংলিংঙৈ মতমদা তৌরমগদবনি। মণিপুরদা চঙলকপা মীতোপ অমত্তনা মণিপুরগী শক্তম কনবীরোই। ঐখোয়গী শক্তম কঞ্জবদি মনিপুর খুনাইগী ফুরুপ খক্তনা কঞ্জগদবনি। মতম অমদা অতোপ্পা লাইনিংদা চৎলুবশিংনা মশা মশাগী লাইনিংদা হল্লকপদা তরাম্না ওকই। ঙসি পাঙথোক্লিবা ৱার্কশোপ অসি য়াম্না মরুওই অমদি তোইনা পাঙথোকপা তঙাইফদে হায়খি।
ঐখোয়গী ফুরুপ অসিদা অশোইবা কয়া লৈ। অদুবু অশোইবা খন্ন-নৈনদুনা লৈরবদি ঐখোয় মনিংহন্দনা অদুমক লৈগনি। মরম অদুনা তৌগদবা থবক থৌবমশিং অদু পাঙথোক্তুনা মাঙলোমদা চঙশিন্নবা হোৎনসি। মীয়াম্বু লুচিংলিবা সিএমগী ৱাখল্লোন অসি তোপ তোপ্পী। মীয়াম্না মাগী মাগী অপান্বা লাইনিং চৎপদা অপনবা পীদবা হায়বসি মহাক্কী ৱাখল্লোননি।
হৌখিবা চহী খরসিদা ষ্টেট অসিদা হিরম খুদিংদা চাওনা অওনবা পুরক্লিবা অসি লৈঙাক অসনিা মীয়ামগী থবক তৌদে হায়গদৌরিব্রা। মশা মশাগী অনিংবা অপাম্বা চৎপদা অয়েৎপা অপনবা পীদবা হায়বসি ঐখোয় খুদিংমক্কী রাইটনি। অদুবু মীয়াম পুন্না অমত্তা ওইনা হিংমন্নিবা হায়বা অসি মণিপুরগী সিএমগী ৱাখল্লোননি হায়নসু মহাক্না ফোঙদোকখি।
মহাক্না হায়, লাইফম অসিদা মতমগী মতুংইন্না পাকথোক চাওথোক্লে। মখা তানা পাকথোক চাওথোকপা মথৌ তারবসু লৈঙাক্না লেপকনি। লাইনিং অসিবু চৎলিবশিংনা ৱাখল তামিন্নদুনা হেন্না শৌগৎপা অমা চঙই। মসিদা মহাক্কী মায়কৈদগীসু পাংবা য়াবা মতেং পাংগনি। মাইবা, মাইবী অমদি পেনাগী লোইশঙ শাবদসু মতেং পাংগনি হায়খি।
লাইনিং অসিবু পামজদুনা লাৎচরিবা মীওই অমদা পামজদুনা লাইচরিবা মীওই অমদা ঐখোয়গী লাইনিংনি লাৎপা য়ারোই হায়রুবা য়ারোই। লাইনিং অসি মৈতৈখক্তগী নত্তে অতোপ্পা ময়ামগীসু য়াওরি হায়বা ৱাখল্লোন অসি ঐখোয় খুদিংমক্তা চেনসি। লমদম অসিদা খুন্দারিবশিং অমত্তা ওইনা পুনশিনবা হায়বা অসি ঐখোয়দগী হৌরগা পুন্নবা হোৎনবা তাই।
সনামহি লাইনিং অসি লমদম অসিদা পাক শন্না পাম্নরে। লাইনিং অসি ঐখোয়গীনি অমদি অতোপ্পনা চৎপা য়ারোই হায়বগী ৱাখল্লোন থাদোকসি। লাইনিং অসি মীয়ামগীনি খল্লবা মতমদা লাইনিং অসি হেন্না চাওখৎকনি। মরম অদুনা লাইনিং অসিবু চৎলিবশিংনা ৱাখল চাওথোক্না খনমিন্নসি। লাইনিং অসিবু হিংহন্নবগীদমক্তা চেন চোংলিবশিংবু থাগৎপা ফোঙদোকই। মখোয়না শেন্নবনা হৌরক্লিবা মীরৈালদা লাইনিং অসি উহনবা ফংগদৌরিবনি। লাইনিং অসিদা থাজবা থমদুনা চৎলিবশিং অমত্তা ওইনা লেপমিন্নসি হায়নসু মিনিষ্টারনা ফোঙদোকখি।
থৌরম অদুদা পিদিএগী চিয়ারমেনসু ওইরিবা লাইনিংথৌ সনামহি টেম্পল বোর্দকী ভাইস প্রেসিদেন্ট এমএলএ এল রামেশ্বর মীতৈ অমদি মণিপুর য়ুনিভার্সিটি ওফ কালচারগী ভিসি প্রোফেসার পাওনম গুনিন্দোনা অখন্নবা মীথুং ওইনা শরুক য়াখি। থৌরম অদুদা ৱার্কশোপ মেটরিয়েল অমসুং সনামহি লাইনিং চৎলবা ইমুং অমগী চৎনা পথাপকী অনিশুবা এদিসনসু ফোঙবগা লোয়ননা চহী ১৮ চুপ্না মৈরা থৌগল তৌরম্বা শংলাকপা নুপা ঈশৈ থৌগল্লোই, মোইরাংথেম মেরাবু অচম্বা খুদোল তমদুনা মহাক্কী থৌদাংবু লৈঙাক্না ইকায়খুম্নবা উৎখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু