মপান লমগী মৈতৈশিংনা লৈনবা গেস্ত হাউস অমা খুরায়দা শারগনিঃ এল সুসিন্দ্রো
ইম্ফাল, অক্টোবর ২৯ : মণিপুরগী ৱাংমদা খুন্দারিবা মৈতৈশিংনা মণিপুরদা লাকপা মতমদা লৈফমগী অৱাবা মায়োক্নহন্দনবগীদমক্তা খুরায় এ সিগী মনুংদা গেস্ত হাউস অমা শারগনি হায়না কেফ এন্দ পি দি অমসুং পি ঐচ ই দি মিনিস্তর এল সুসিন্দ্রোন লাউথোকখ্রে।
মিনিস্তর এল সুসিন্দ্রো অমসুং রাজ্য সভাগী এম পি নিংথৌ সনাজাওবা লৈশেম্বগী বাংলাদেশ খোঙচৎকী মনুং চন্না ঙসি লুচিংবা অনী অসিনা আগরতলাগী অভয়নগরদা লৈবা পুথিবা শঙলেন অমসুং মৈতৈ লৈকায়গী পুখ্রিগী বাউন্দরিনচিংবা য়েংশিনখ্রে।
য়েংশিন খোঙচৎ অদুদা মিনিস্তর সুসিন্দ্রোন হায়খি, মৈতৈ ফুরুপ অসি চাওখৎনবা মণিপুরগী ৱাংমদা খুন্দাখ্রবা মৈতৈশিং য়াওনা ঐখোয় পূন্না হোৎনমিন্নবা অমা চঙই। বাংলাদেশ, ত্রিপুরানচিংবা মণিপুরগী ৱাংমদা খুন্দারিবা মৈতৈশিংনা মণিপুরদা লাকপা মতমদা ত্রিপুরাদগী খোঙশাং ফাওবদি মখোয় লাকপদা ঙমগনি খল্লি। খোঙশাংদগী ইম্ফাল তম্না লাক্নবগীদমক্তা মহাক্কী মায়কৈদগী গাড়ী পীগনি।
মহাক্না হায়, মপান্দা খুন্দাখ্রবা মৈতৈ ইচিল ইনাওশিংনা মণিপুরদা লাকপা মতমদা লৈনবা গেস্ত হাউস অমা খুরায় এ সিগী মনুংদা শাদুনা থম্লগনি। মপান্দা খুন্দারিবা মৈতৈ ইচিল ইনাওশিংনা মণিপুরদা লাকপা মতমদা লৈফমগীদমক্তা মথা শাহল্লোই। গেস্ত হাউস অসি শারবা মতুং মখোয়না মণিপুরদা লাক্নিংলবদি লৈফমগীদমক্তা নিংথৌদা পাউ হান্না ফাওবিরকউ।
সুসিন্দ্রোন মখা তানা হায়খি, ত্রিপুরাদা লৈরিবা মৈতৈ ইচিল ইনাওশিংনা ঐখোয়গী ফুরুপ চাওখৎহন্নবা হোৎনবদা অঙম্বা মতেঙ পাংদুনা তুংগী মীরোলদা ফুরুপ অসি মশক খঙহন্নবা অমসুং ঙসিগী মীরোলবু শিংথাদুনা লৈহৌনবা হোৎনমিন্নসি।
সোর্স: পোক্নফম
0 কমেন্ট:
কমেন্ট তৌবিয়ু