• 590
• ১১ই মার্চ ২০২৫ ইং
• Share on:

মনিপুর য়ুনিভর্সিতি ওফ কলচরগী ভাইস চাঞ্চেলর পাওনম গুনিন্দ্রদা খুম্বোংময়ুম গৌরহরী মধুমতী মাদর লেঙ্গ্যুএজ এৱার্দ, ২০২৫   -- তোংব্রম অমরজিৎ

ঙসি মালেমসিদা লৈরিবা কাংলুপ ফুরুপ কয়া লৈবগী মনুংদা মমালোল লৈজবা অমসুং মশাগী ময়েক লৈজবা ফুরুপ্তি পংয়াম য়ামদে। মালেমসিদা লৈরিবা মীওই বিলিয়ন ৭ হেনবনা ঙাংনরিবা লোল অসি পুন্না লীশিং তরুক হেল্লি হায়না পানরি। অদুবু ময়েক্কা কোন্ননা লৈবদি পংয়াম য়ামদে চনী ফাওবা শুদে। মসিদা মতম অমদা নিংথৌ পাল্লম্বা লৈবাক অমা ওইরিবা অদুগা খা নোংপোক এসিয়াগী লমদমদা মতিং লৈনা পাল্লম্বা লৈবাক অমা ওইরিবা মনিপুরনা চহী চা কয়া মশাগী লোল ময়েক লৈদুনা অরুবা লাইরিক কয়া ইরম্লিবসি হংগৎনা য়েংলুরবদি থিজিন্ননিংঙাই মচাকনা পীক থন্না লৈরি। ইনাক খুনবা লোল অমসুং কলচর অমা লমদম অসিদা লোৎতুনা লৈরি হায়বসি ঐখোয়গী লৈরিবা খুৎই লাইরিকশিং মরু ওইনা পুয়া কয়া নৈনবদা মথং মথং থোক্লক্লি। অরিবা লোনগৈদা লৈরিবা ইনাকখুল্লবা লোনগী পূক্কৈ অসিমক ঙসিগী মীরোলগী অমদি লমদম অসিগী মাংফ-তাফদ্রবা লেংদ্রবা লন অমনি ইপু ইবেনশিং অদুনা থম্লম্লিবসি।

মালেমগী ওইনা লৈরিবা য়ুনেস্কোনা লৌখিবা ৱারেপ অমগী মতুং ইন্না ২০০০দগী হৌনা ফেব্রুৱারি ২১বু মালেমগী ইমালোলগী নুমিৎ হায়না নিংশিং থৌরম পাঙথোকতুনা লাকই। মসিগী পুৱারী অমসু বঙ্গলাদেশ লৈবাক শেমখি। মমালোল বঙ্গলাগীদমক মীওই ৫ সাহিদ ওইখি। অদুগা বঙ্গলাদেশ লৈবাকসু মনিং তম্বা লৈবাক অমা ওইখি ১৯৭১দা। বঙ্গলাদেশকী বঙ্গলা লোল ঙাংবা পুম্নমক মমালোলগীদমক পাম্বোম তিংখি। শিবা নাচুংখিদে। মরমদি লোলদা য়াওরি কলচর অমসুং ত্রেদিসন। লোল অমদা য়াওরি জাতি অমগী শক্তম। লোল অমনা মরাই চাইথরকপদা জাতি অদুসু মরাই চাইথখিগনি। অদুনা কুমসি চহীগী ওইনসু থিম অমা য়ুনেস্কোনা পীখি “Languages Matter: Silver Jubilee Celebration of International Mother Language Day” লুপা ফুদোংবা চহীনি। মালেমগী মফম কয়াদা পাঙথোকনবগুম্না মনিপুরদসু সাহিত্য থৌপাং লূপ্না শিন্দুনা মনিপুর স্তেট সেন্ত্রেল লাইব্রেরি, ইম্ফালগী ওদিতোরিয়মদা হৌনবী মতুং ইন্না ফাইরেনগী ২৩নি পানবা ইরাই নুমিৎ ফেব্রুৱারি থাগীনি তাং ২১দা থৌরম পাঙথোকখি । নুমিৎ অসিদা লমদম অসিগী লেঙ্গ্যুএস এক্তিভিস অমসুং কলচর অমসুং ত্রেদিসনগী স্কোলর অমসু ওইরিবা অদুগা হৌজীক হৌজীক মণিপুর য়ুনিভর্সিতি ওফ কলচরগী ভাইস চাঞ্চেলর পাওনম গুনিন্দ্রদা লেমজনিংঙাই ওইরবা খুম্বোংময়ুম গৌরহরি মধুমতি মাদর লেঙ্গ্যুএস এৱার্দ ২০২৫ নুমিৎ অসিগী অথোইবা লেঙবীরকপা ওইনা শরুক য়াখিবা শকনাইরবা অইবা সাহিত্য একাদেমি এৱার্দি য়ুম্লেম্বম ইবোমচানা মনা লান্থোকপীখি। শকনাইরবা মনিপুরী খোরিলোলগী নোভেলিস্ট ক্ষেত্রি বিরানা থৌরম মপু ওইনা শরুক য়াখি অমদি সাথৌলূপকী প্রসিদেন্ট ওইনা ইশামকনা থৌরম অসিগী নুংগী ওইবা ৱারোলসু থমজখি। হেন্না নুংঙাইরিবদি থৌরম অসিগী অনিশুবা সেসনদা কবুই ফুরুপকি অমদি মনিপুরী খোরিলোলগী অইবা লনবোন কবুইনা শৈদিন মপু ওইদুনা অশৈবা কয়ানা ফজরবা, ৱাহন্থোক লৈরবা শৈরেং কয়া থিখিবসিনি। অদুগা অমুক নীংশিংনিংঙাই ওইরিবনা মনিপুরগী মপালদগী পরেশ কুমার নন্দি (পি কে নন্দি) প্রসিদেন্ট, নেটাজি সুভাস মঞ্চনা, জমসেদপুর, জরখননা থৌরম অসিদা শরুক য়াখিবসিনি। মহাক মনিপুরদা নেতাজিগী আই এন এগী খোঙ্গুল লীবা লাকপনি। মশামক অইবনি। অদুগা নেতাজিগী মরমদা ইবা লাইরিক ভোল্যুম অমা ফোঙখ্রবা মতুংদা অনীশুবা ভোল্যুম ইনবা মনিপুরদা নুমিৎ খরনিগী লাকপনি। ইমালোল ঙাংবা অমসুং ইবগী মরু ওইবগী মতাংদা মহাক্কীসু ৱাফম খরা ফোংদোক্লমখি।

মশাগী মমালোলদা লাইরিক লাইশু তম্বা ফংদবা, মমালোলদা ইবা ফাওবা ফংদবা মীওই ফুরুপ কাংলুপ কয়া মালেমদা লৈরি। ঙসি মালেমদা ঙাংনরিবা লোল কয়াগী মরক্তা অপীকপা ফুরুপ কাংলুপ কয়ানা ঙাংনবা লোল কয়াদি মতমগী অহোংবা অওনবা কয়াদা তপ্না তপ্না মমি শামজিল্লক্তুনা মাংখিবা লোল কয়া য়াওরক্লি। হৌজীক ফাওবদা মালেমদা ঙাংনরম্বা লোল ৫৭৩ রোমদি মাংখ্রে অমসুং মসিবু ঙাংবীনবা তম্বীনবা লৈত্রে হায়না লৌনরি। মাংখ্রিবা লোল অয়াম্বা ইরগা লৈবা নত্তবা অদুগা মশাগী ময়েক লৈতবা অদুগুম্বা লোলনা অয়াম্বা ওইরি। ইন্দিয়াদসু হিমালায়ান বেল্টতা লোল খরদি শিখ্রে হায়না পানরি। অদুবু ইন্দিয়াগী ইনাকখুল্লবা লিঙ্গ্যুস্তিক হেরিতেজ অসিদা হৌজীক ফাওবা লোল ৪৫০ দি মতিং লৈনা হিংলি অদুগা পাক শণ্ণা ঙাংনরি।

মচি ওইবা চীঞ্জাক চাদ্রবা মীওই অমগী হকচাংনা অনা লায়চেন্নবগুম মশাগী মমালোন শিজিন্নদ্রবা মীওই ফুরুপ অদুগী কলচর অমসুং শক্তম নোংম-নোংমগী ময়েং তারকনবা মরম অমা ওইরি। লোল হায়বসিনা মীওই ফুরুপ কাংলুপ অমগী কলচর অমসুং ত্রেদিসনগী থৱায়নি। মসিদা য়াওরি খুনাইগী হৌরকফম। থাজনবী চৎনবী কয়াগী ৱারী পুম্নমক ইমালোল হায়বসিদা শাদোং ওইদুনা পথাং পুথাং নাইনা মৈনা ৱাই তাংনা শমদুনা লাক্লি। চীনবুংদা লৈরিবা লমদম অসিগী ইনাকখুল্লবা খোরিলোল অসিমক ইমালোল লৈরম্বদগী ঙসিগী মীরোলনা হৌখ্রবা মতমগা নকশিন্নবা ঙম্লিবনি। ঙসি মালেমসিদা লৈরিবা কাংলুপ ফুরুপ কয়া লৈবগী মনুংদা মমালোল লৈজবা অমসুং মশাগী ময়েক লৈজবা ফুরুপ্তি পংয়াম য়ামদে। মালেমসিদা লৈরিবা মীওই বিলিয়ন ৭ হেনবনা ঙাংনরিবা লোল অসি পুন্না লীশিং তরুক হেল্লি হায়না পানরি। অদুবু ময়েক্কা কোন্ননা লৈবদি পংয়াম য়ামদে চনী ফাওবা শুদে। মসিদা মতম অমদা নিংথৌ পাল্লম্বা লৈবাক অমা ওইরিবা অদুগা খা নোংপোক এসিয়াগী লমদমদা মতিং লৈনা পাল্লম্বা লৈবাক অমা ওইরিবা মনিপুরনা চহী চা কয়া মশাগী লোল ময়েক লৈদুনা অরুবা লাইরিক কয়া ইরম্লিবসি হংগৎনা য়েংলুরবদি থিজিন্ননিংঙাই মচাকনা পীক থন্না লৈরি। ইনাক খুনবা লোল অমসুং কলচর অমা লমদম অসিদা লোৎতুনা লৈরি হায়বসি ঐখোয়গী লৈরিবা খুৎই লাইরিকশিং মরু ওইনা পুয়া কয়া নৈনবদা মথং মথং থোক্লক্লি। অরিবা লোনগৈদা লৈরিবা ইনাকখুল্লবা লোনগী পূক্কৈ অসিমক ঙসিগী মীরোলগী অমদি লমদম অসিগী মাংফ-তাফদ্রবা লেংদ্রবা লন অমনি ইপু ইবেনশিং অদুনা থম্লম্লিবসি।

 প্রোফেসর পাওনম গুনিন্দ্রো

লমদম অসিগী নাৎ, চৎনবী, থাজনবী, লাইনিং লাইশোল ঙাক শেন্দুনা খোমজিল তাশিন্দুনা তুংগী মীরোলগীদমক থবক তৌরিবা অমসুং পুৱারীগী খোঙ্গুল লীবদা য়াম্না ঙল্লিঙৈ মতমদগী হৌনা চোকথবা লৈতনা থবক তৌরিবা মীওশিংগী মরক্তা পাওনম গুনিন্দ্রসু অমনি। মহাক ইং ১৯৫৭গী মার্চ ১দা কৈশামথোং তোপ লৈরক ইম্ফালদা তাইবঙ খোঙদারকখি। পুনে য়ুনিভর্সিদা এন্সিয়ান ইন্দিয়ান কলচর অমদি আর্কিয়োলোজিদা এম এ ফার্স ক্লাস ফংদুনা য়ুনিভর্সি অসিমক্তদা অমুক ‘পেলিওগ্রাফি ওফ ৱেস্তর্ন ইন্দিয়ান কেব ইন্সক্রিপ্সন’ হায়বা থেসিস অসি ইদুনা পিঐদি ফংখি। চহী ৩৪ হেন্না মনিপুর য়ুনিভর্সিতিগী মণিপুরী দিপার্টমেন্টা মহৈরোই কয়া তাকপী তম্বীরম্বতা নত্তনা মহাকনা লমজিং লমতাক তৌদুনা পিঐচ দি স্কোলর ৩০ হেন্না পুথোক্তুনা অৱাংবা থাক্কী মহৈ তানশিন্দুনা অমদি হেন্না কুপ্না থিজিন হুমজিন্দুনা লমদম অসিগী কলচর অমসুং ত্রেদিসন্দা চাওরবা খুদোল তম্লদুনা লাক্লি। অঙনবা মতমদা ১৯৮৮-২০০০ ফাওবা মণিপুরগী লোইজিং লোয়া শিনবা থুংনা মোতো সাইকল থৌদুনা চোকথবা লৈতনা চৎতুনা হৌরক্লিবা অঙাংশিংদা মহৈরোইশিংদা মৈতৈ ময়েক তম্বীবীদুনা লাকখি। মনিপুরী লোলনা সংবিধানগী নিপালশুবা সেদ্যুলদা চন্ননবা হোৎনবদা চাওনা থৌদাং লৌরকখি। মনিপুরী লোলগী নুমিৎ আগস্ত ২০না লাকপা খুদিং নিংশিংলি মতম অদুগী অহল লমন, অইবা অইবীশিং। নীংশিংদবা য়ারোই এম কে বিনোদিনি। থোইবী দেবী, পণ্ডিত খেলচনদ্রা, নিলকান্তা, সমরেন্দ্রা অসিনচিংবা কয়ানি ইমালোলগীদমক পাম্বোম তিংখিবা। ওজা গুনিন্দ্র ইন্দিয়াগী ওইনা শেম্বা নেস্নেল থাক্তা শেম্বা ঐচ আর দি মিনিস্ত্রি, গোভর্মেন্ট ওফ ইন্দিয়াগী লেঙ্গ্যুএজ পোলিসি ওফ ইন্দিয়াগী মেম্বরনি। CIIL Mysore GIA গী তার্ম অনীরক মেম্বর ওইরমখি। মনিপুর লৈঙাক্কী মৈতৈ ময়েক এক্সপার্ট কমিতিগীসু মেম্বরনি। অসিদসু নত্তনা মনিপুর খোরিলোল অমদি কলচরগী ওইবা লূপশিংগীসু এক্তিব মেম্বর ওইদুনা থবক থৌরম কয়াদা থৱায় য়াওনা ইমালোলগীদমক হোৎনরিবা ওজা অমসুনি। আর্ক্যিওলোজিগী লমদসু য়াম্না পাকনা চাওনা থিজিন হুমজিনবগী এক্সপরিয়েন্স লৈরকখি। মহারাস্ত্রগী মরু ওইবা রোক কেব ইন্সক্রিপ্সনশিং সর্ভে তৌরকখি। মণিপুরগী মফম কয়াদা অঙনবা মতমদা কোয়না চত্তুনা ইপিগ্রাফিকেল রেকোর্দশিং খোমজিন তাশিন্দুনা লাকখি। মসিবু অমুক লাইরিক ওইনা ‘ইপিগ্রাফিকেল রেকোর্দস ওফ মনিপুর’ হায়না মিংথোন্দুনা ফোঙখি। মণিপুরী লোল অমদি কলচরগী লমদা মতম শাংনা পোকনফম পাউচেদা ১৯৮৮-১৯৯৩ ফাওবা মমল য়াম্লবা কলম ইদুনা ইমালোল মণিপুরী অমসুং ইনাকখুল্লবা কলচরবু হেন্না মশক তাকনবা হোৎনদুন লাকই। ঙসিসু লেপ্পা লৈতে। থাং-তাগী শিন্দম লাইরিকসু ইদিতর ওইদুনা ফোঙলকখি। মসিনা স্কুল তম্লিবা অঙাংশিংদা লমদম অসিগী মার্সিয়েল আর্ট ফোর্ম অমা ওইরিবা থাং-তাগী মহৈবু হৌরক্লিবা মীরোলনা খঙহনবদা চাওনা মতেং ওইরি। ঐখোয়না অরিবা খুদিংমক কান্নদ্রবা পোৎলমগুম্না খনবা ৱাখল্লোন অদুদগী মিৎয়েং হোংদোকনবা অরিবা পোৎলম চৈরম, অরিবা লোল, থায়নগী চৎনবীদা মীওই ফুরুপ কাংলুপ অমগী অহিংবা মীরেল শাগোন্নদুনা লৈরি হায়বসি ইকায়খুম্ননিংঙাই ওইরবা ওজা অসিগী রিচার্স পেপরশিং, জর্নেলশিংদা য়াওরিবা মমল য়াম্লবা আর্টীকলশিংনা লেংদ্রবা খুদম ওইদুনা ঙসিগী মীরোলদা পুকনিং লৌশিং পীবদা চাওনা মতেং ওইরি। লমদম অসিদা ফোঙবা চেফোঙশিংদা লোল ময়েক কলচর, আর্ক্যিওলোজীগা মরি লৈনবা হীরম কয়াদা আর্তিকল ৫০ লোম ইদুনা ফোঙখিবা লৈরে। মশানা ইবা লাইরিক পুন্না ৪ ফোঙখ্রে। মসিদসু নত্তনা মহাকনা ইদিটর ওইদুনা লাইরিক ৬ অমসু কলচর, হিস্ত্রিগা অমদি আর্কিওলোজিগা মরি লৈননা ফোংখ্রে। অদুগা রিচার্স জর্নেল ৪গী মহাক ইদিটর ওইদুনা ফোঙখি। সুরিন্দ্র রাজাবাঠ য়ুনিভর্সিতি, থাইলেন্দদা পাঙথোকখিবা ইন্তরনেস্নেল সুরি ফোল্ক ফেস্তিভেলদা মহাকনা খুদোল তমখিবা ‘Manipuri Lammitlon: Place Name Lore of Manipur’ অসিমক য়াম্না মরু ওইবা পেপর অমনি। অসিগুম্বা মালেমগী থাক্তা পাঙথোকপা সেমিনারদা ইরমদম অসিগী অরিবা লোনগৈদা লৈরম্লিবা ইনাকখুল্লবা পুক্কৈগী নিংথিজবা অমসুং খুনাইগী হৌরক ৱারীগী পুৱারী অমা মালেম মীয়ামদা মশক তাক্লিবসিমক শিংথানিংঙাইনি। অসিতসু নত্তনা তোঙান তোঙানবা পেপর কয়া মরু ওইনা অরিবা নুঙদা ইরম্লিবা ইস্ক্রিপ্সন কয়া অনৌবা মীরোলনা খঙনবা থিজিন হুমজিন্দুনা আর্তিকল কয়াসু ইদুনা লাক্লি। ইন্টরনেস্নেল লেভেলদা পেপর মঙা খুদোল তমখ্রে। অদুগা অমুক তি ভি চেনেলশিংগী দোক্যুমেন্টরি ফিল্মশিংগী স্ক্রিপসু ইদুনা লাকখি। খরদং পল্লবদা NE Doordarshan, Guwahati, Metro Channel, Delhi, DDK Imphal, Manipur Film Development Corporation অসিনচিংবশিংনা পুথোকপা তোঙান তোঙানবা দোক্যুমেন্টরিশিং- কংলা, মোন্যুমেন্টস ওফ মনিপুর, পাওনা ব্রজাবাসি, সেক্তা, কনাগীদমক্তনো ঐনা তেংথারিবা, পদ্মা শ্রী অভিরাম, পেনা, মোইবুং, লোক্তাক লেক অসিনচিংবা কয়ানি। মায়থোং য়াম্না কলচর অমসুং ইমালোলগী এক্তিভিস অমনি। ওজাগুম্বা মীওইশিংগী মশিং হেনগৎলক্লবদি লমদম অসি হেন্না মশেক মঙাল লৈগনি। ইমালোল হেন্না চাওখৎনবা হোৎনবদা ঐখোয় খুদিংমকনা ইশা ইশাগী ইমুং, লৈকায়দা খুঙ্গংদা সহর পাক শন্না ইমালোলবু নুংশিনা মরু ওইনা শিজিন্নবা অমদি মথৌ তারি। মীগী লোল শিজিন্নরগা চৎনবী, নৈনবী অমদি লেমজবা ওইনা খল্লিবা ৱাখল্লোন অসি য়ুম য়ুমদগী হোংদোকনবা হোৎনমিন্নসি হায়না ওজা য়ুম্লেম্বম ইবোমচানা অথোইবা লেংবীরকপা ওইনা থমখিবা ৱাফমসি পুম্নমকনা ইথৌদাংনি খন্না হোৎনমিন্নসি। ইমালোল মণিপুরীগী ফজবসু শোয়দনা হেনগৎলক্কনি থাজৈ।