ক্ষেত্রিময়ুম সুবদনিগী ‘অপূনবা খোর্জ্জৈ’ ফোঙখ্রে
ইম্ফাল, মার্চ ০৯ : ক্ষেত্রিময়ুম সুবদনিগী ‘অপুনবা খোর্জ্জৈ’ হায়না মিংথোনবা অইবী কে এস ঐচ সুবদনিগী তোঙান তোঙানবা লাইরিক ৬ পুনশিন্দুনা পুথোকপা ফিক্সন লাইরিক অমা ঙসি ক্বাকৈথেল মোইরাং পুরেলদা লৈবা দোসুয়াল্লি হোলদা ফোঙখ্রে।
ক্ষেত্রিময়ুম য়াইমা মেমোরিয়েল ত্রাষ্ট ( কে ৱাই এম টি) না শিন্দুনা পাঙথোকখিবা লাইরিক ফোঙবগী থৌরমসিদা আর্ট এন্দ কলচরগী কম্মিস্নর এম জয়না অথোইবা মীথুং, মণিপুর ষ্টেট সোসল ওয়েলফেয়ার বোর্দকী হান্নগী চেয়ারপার্সন ডা. আর কে নয়নস্নানা থৌরম মপু অমদি মণিপুরী লেঙ্গ্যুয়েজ এদভাইজরি বোর্দ, সাহিত্য একাদেমি ন্যু দেল্লিগী হান্নগী কনভিনর প্রোফেসর হুইরেম বিহারিনা অখন্নবা মীথুংলেন ওইনা শরুক য়াখি।
থৌরমসিদা য়াইফবা খোমদ্রাম অমদি ডা. লিন্থোইঙম্বী খোমদ্রামনা এদিটর ওইদুনা ঙসি ফোঙখিবা লাইরিক অসি ক্বাদ, মোইরাংগী প্রেসিদেন্ট সলাম তোম্বনা মশক তাকখি। এম জয়না থৌরমগা মরী লৈননা ফোঙদোকখিবদা খুন্নাইসিগী ৱাথোক কয়াদা নুপী ওইবীশিংনা ইচা-ইশু অমদি ইপুরোইবা কন্দবা য়াদে হায়দুনা থৌনা ফনা লান্থেংনবদা নত্তনা লমদম অসিগী অপুনবগী শক্তম ঙাকপদসু থৌদাং য়ারি।
লমদমসিগী মমিং লৈরবা অইবী থোইবি দেবী, এম কে বিনোদিনি, খাইদেম প্রমোদিনি, ডা. যামিনি নচিংবনসু অচৌবা থৌদাং য়াদুনা লাকখিবনি। মখোয়গী মতুংদা অনৌবা অইবী নুপী কয়া হৌজিক নৌহৌননা থোরক্লি। মখোয়বু ঐখোয়না শৌগৎমিন্নসি হায়খি।
কে এস ঐচ সুবদনিনা হায়, অইবী ঐখোয়না পুথোক্লিবা লাইরিকশিংবু পারিবশিংনা ৱাফম কয়া ফোঙদোরকপনা ইবগী লমসিদা মখা তানা চংশিন্দুনা মশক থোকপা লাইরিক পুথোক্নবা হোৎননিংবগী ঈহুল ফাওরি। মখা তানা লাইরিকশিং ইদুনা মীয়ামদা ঈনোৎ পীনবা হোৎনখিগনি হায়খি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু